انار بۇلت \ شينجياڭ گازەتىنىڭ ءتىلشىسى ليۋ ي 8 - ايدىڭ 6 - كۇنى ۇرىمجىدەن حابارلايدى. اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسىنەن ۇعىسۋىمىزشا، كەزەكتە تۇتاس رايوندا ءبيداي ورىلعان جەر اۋدانى 13 ميلليون 100 مىڭ مۋدان اسىپ، سايكەس مەزگىلدەگىدەن 630 مىڭ مۋ ارتقان، جازعى استىقتىڭ 90 پايىزعا جۋىعى جينالىپ بولعان.
بيىلعى جازعى جيىن - تەرىن، جازعى تۇقىم سەبۋ، جازعى باپتاۋ قىزمەتى باستالعاننان بەرى رايونىمىزداعى ءار دارەجەلى اۋىل شارۋاشىلىعى، اۋىل - قىستاق تاراۋلارى ەگىس ۋاقىتىن مىقتى يگەرىپ، ماشينالاردى عىلمي، ۇيلەسىمدى ورنالاستىرىپ، شارۋالارعا ءتيىمدى اۋا رايى شارت - جاعدايىنان پايدالانىپ، ءبيداي ورىلىپ بولا سالا، دەرەۋ جۇگەرى ەگۋگە جەتەكشىلىك ەتتى. قازىر وڭتۇستىك شينجياڭدا ءبيداي نەگىزىنەن جينالىپ بولدى، سولتۇستىك شينجياڭدا جانە شىعىس شينجياڭدا ءبيدايدىڭ ％87ى جينالىپ بولدى. سونىمەن قاتار جەر - جەر جازعى ەگۋ قىزمەتىن جوعارى ساپالى ىلگەرىلەتىپ، 8 ميلليون مۋدان استام جەرگە ءتۇرلى ەگىس داقىلدارىن قايتا ەكتى، اۋىل شارۋاشىلىعى تەحنيكتەرى اتىز باستارىنا بارىپ، شارۋالارعا سۋ مەن تىڭايتقىشتى باپتاۋ، تىڭايتقىش پەن ءدارىنى تەڭشەۋ سياقتى تەحنيكالىق شارالار جونىندە جەتەكشىلىك جاساپ، دەرت - دەربەزدەن ءبىر تۇتاس ساقتانۋ، ءبىر تۇتاس جونگە سالۋ جانە جاسىل ساقتانۋ - تىزگىندەۋ جۇمىسىن ورىستەتتى، قازىر تۇتاس رايوندا اتىزداعى ەگىس داقىلدارىنىڭ ءوسۋ جاعدايى جاقسى، كۇزگى استىقتان مول ءونىم الۋعا بولاتىندىعى بايقالدى.
اۋا رايى تاراۋلارىنىڭ مەجەسىنە قاراعاندا، بيىل 7 - ايدان 8 - ايعا دەيىن تۇتاس شينجياڭدا اۋا تەمپەراتۋراسى تۇلعالىق جاقتان جوعارى، جاۋىن - شاشىن ازداۋ بولادى ەكەن. كەزەكتە ءار دارەجەلى اۋىل شارۋاشىلىعى، اۋىل - قىستاق تاراۋلارى سۋ يگىلىگى تاراۋلارىمەن سەلبەستىكتى نىعايتىپ، اۋىل شارۋاشىلىعىندىق سۋارۋعا پايدالانىلاتىن سۋ جوسپارىن عىلمي رەتتەپ، اۋىل شارۋاشىلىعىن سۋارىلاتىن سۋمەن قامتاماسىز ەتۋگە، ءونىمدى ورنىقتىرۋعا، كىرىستى ارتتىرۋعا شىنايى كەپىلدىك ەتتى. سونىمەن قاتار شارۋالارعا تەحنيكالىق جاقتان جەتەكشىلىك ەتۋدى اناعۇرلىم كۇشەيتىپ، جۇگەرىنى سۋمەن، تىڭايتقىشپەن قامتاماسىز ەتۋ، جۇگەرى جاسىل قۇرتى سياقتى دەرت - دەربەزدەردى تەكسەرۋ، ساقتانۋ، جويۋ قىزمەتىن ويداعىداي ىستەدى.
كەلەسى قادامدا جەر - جەر ىندەتتەن ساقتانۋ - تىزگىندەۋ قىزمەتىن جاقسى ىستەۋ العى شارتىندا، ءتۇرلى تاسىلدەرمەن، اۋىل شارۋاشىلىعى ءوندىرىسىن تارتىپپەن ۇيىمداستىرىپ، ىندەت جاعدايى سەبەبىنەن ەگىس داقىلدارى ورىلماي قالۋ جانە اتىز باپتاۋ، تۇقىم ءسىڭىرۋ جۇمىسى دەر كەزىندە جۇرگىزىلمەۋ، تياناقتانباۋ ماسەلەسىنىڭ تۋىلۋىن باتىل جويدى. سونىمەن قاتار كەلەر جىلعى دۇمبە ءبيدايدى ەگۋ جاعدايىن الدىن الا تەكسەرىپ، ەگىستىك جەردىڭ قۇنارلىلىعىن قورعاۋ كومەك قاراجاتى مەن سويا بۇرشاق، جەر جاڭعاعى ارناۋلى قوسىمشا قاراجاتىن دەر كەزىندە ناق اقشا بويىنشا بەرىپ، شارۋالاردىڭ استىق ەگۋ، ازىقتىق مايدى كوبەيتۋ بەلسەندىلىگىن تولىق جۇمىلدىرىپ جانە قورعاپ، استىق، ماي ءوندىرىسىن ورنىقتىرىپ، استىق پەن مايدان تاعى دا مول ءونىم الۋعا نەگىز قالادى.