شي جينپيڭ، لي چياڭ، جاۋ لىجي، ۋاڭ حۋنيڭ، حان جىڭ، ساي چي، ديڭ شۋەشياڭ، لي شي قاتارلىلار ءتوراعالار مىنبەسىنەن ورىن الدى
لي جانشۋ مەملەكەتتىك حالىق قۇرىلتايى تۇراقتى كوميتەتىنىڭ قىزمەتىنەن بايانداما جاسادى
ەڭ جوعارى حالىق سوتى مەكەمەسىنىڭ قىزمەتىنەن باياندامانى جانە ەڭ جوعارى حالىق پروكۋراتۋراسىنىڭ قىزمەتىنەن باياندامانى تىڭدادى جانە قارادى
مەملەكەتتىك كەڭەس قۇرىلىمدارىنىڭ رەفورما جوباسى جونىندەگى تۇسىنىكتى تىڭدادى
3 - ايدىڭ 7 - كۇنى 14 - كەزەكتى مەملەكەتتىك حالىق قۇرىلتايىنىڭ 1 - ءماجىلىسى بەيجيڭ حالىق سارايىندا ەكىنشى جالپى جيىنىن وتكىزدى. 13 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ تاپسىرۋىمەن كوميتەت باستىعى لي جانشۋ جالپى جيىنعا مەملەكەتتىك حالىق قۇرىلتايى تۇراقتى كوميتەتىنىڭ قىزمەتىنەن بايانداما جاسادى.
□ سۋرەتتى شينحۋا اگەنتتىگىنىڭ ءتىلشىسى لي تاۋ تۇسىرگەن
شينحۋا اگەنتتىگىنىڭ 3 - ايدىڭ 7 - كۇنى بەيجيڭنەن بەرگەن حابارى. 14 - كەزەكتى مەملەكەتتىك حالىق قۇرىلتايىنىڭ 1 - ءماجىلىسى 3 - ايدىڭ 7 - كۇنى تۇستەن كەيىن بەيجيڭ حالىق سارايىندا ەكىنشى جالپى جيىنىن وتكىزىپ، مەملەكەتتىك حالىق قۇرىلتايى تۇراقتى كوميتەتىنىڭ قىزمەتىنەن باياندامانى جانە ەڭ جوعارى حالىق سوتى مەكەمەسىنىڭ قىزمەتىنەن باياندامانى، ەڭ جوعارى حالىق پروكۋراتۋراسىنىڭ قىزمەتىنەن باياندامانى تىڭدادى جانە قارادى، مەملەكەتتىك كەڭەس قۇرىلىمدارىنىڭ رەفورما جوباسى جونىندەگى تۇسىنىكتى تىڭدادى.
شي جينپيڭ، لي چياڭ، جاۋ لىجي، ۋاڭ حۋنيڭ، حان جىڭ، ساي چي، ديڭ شۋەشياڭ، لي شي قاتارلىلار جيىنعا قاتىناستى.
جيىنعا قاتىناسۋعا ءتيىستى ۋاكىل 2977 ادام، قاتىناسقانى 2943 ادام، 34 ادام قاتىناسا المادى، قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.
ءماجىلىس ءتوراعالار القاسىنىڭ تۇراقتى ءتوراعاسى، اتقارۋشى ءتوراعاسى لي حۇڭجۇڭ جيىندى باسقاردى.
13 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ تاپسىرۋىمەن كوميتەت باستىعى لي جانشۋ جالپى جيىنعا مەملەكەتتىك حالىق قۇرىلتايى تۇراقتى كوميتەتىنىڭ قىزمەتىنەن بايانداما جاسادى. لي جانشۋ باياندامادا بىلاي دەپ اتاپ كورسەتتى: وتكەن ءبىر جىلدا شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، مەملەكەتتىك حالىق قۇرىلتايى تۇراقتى كوميتەتى پارتيا 19 - قۇرىلتايىنىڭ، 20 - قۇرىلتايىنىڭ رۋحىن مۇقيات دايەكتىلەندىرىپ، زاڭ شىعارۋ قىزمەتىن جوعارى ساپامەن جاقسى ىستەۋگە تاباندى بولدى، 5 زاڭ جاسادى، 9 زاڭعا وزگەرىس ەنگىزدى، زاڭدىق ماسەلەلەر مەن كەلەلى ماسەلەلەرگە قاتىستى 4 قاۋلى ماقۇلدادى، ءبىر زاڭدىق تۇسىنىك جاسادى؛ باقىلاۋ قىزمەتىن جوعارى ساپامەن جاقسى ىستەۋگە تاباندى بولىپ، 5 زاڭنىڭ اتقارىلۋ احۋالىن تەكسەرىپ، 23 باقىلاۋ قىزمەتى بايانداماسىن تىڭدادى جانە قارادى، ارناۋلى تاقىرىپتىق سۇراستىرۋ ورىستەتىپ، 8 ءتۇرلى ارناۋلى تاقىرىپتا تەكسەرۋ - زەرتتەۋ جۇرگىزدى؛ ۋاكىلدەر قىزمەتىن جوعارى ساپامەن جاقسى ىستەۋگە تاباندى بولىپ، ۋاكىلدەردىڭ 487 كەڭەستىك جوباسىن، 9349 ۇسىنىسىن ءبىر جاقتى ەتىپ، ۋاكىلدەردىڭ تۇراقتى كوميتەتتىڭ، ارناۋلى كوميتەتتەردىڭ، قىزمەت كوميتەتتەرىنىڭ قىزمەتىنە قاتىناسقانى جالپى 100 ادامنان (رەت) استى؛ سىرتقى ىستەر قىزمەتىن جوعارى ساپامەن جاقسى ىستەۋگە تاباندى بولدى؛ مەملەكەت ورگاندارىنداعى قىزمەتكەرلەردەن 393 ادامدى (رەت) زاڭ بويىنشا مىندەتكە تاعايىنداپ، مىندەتىنەن قالدىرىپ، 13 - كەزەكتى مەملەكەتتىك حالىق قۇرىلتايىنىڭ 5 - ءماجىلىسى بەلگىلەگەن مىندەتتەردى تولىق ورىندادى.
لي جانشۋ باياندامادا بىلاي دەدى: 13 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ 5 جىلدىق مىندەت وتەۋ مەرزىمى پارتيا مەن مەملەكەت ىستەرى قارىشتاپ دامىعان ۇلى تاريحي وزگەرىس مەزگىلىنە تۋرا كەلدى. تۇراقتى كوميتەت ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، پارتيا ورتالىق كوميتەتىنىڭ بەدەلى مەن ورتالىقتانعان ءبىر تۇتاس باسشىلىعىن باستان - اياق باتىل قورعاپ، پارتيانىڭ نازارياسى مەن لۋشيان، باعىت - ساياساتتارىن باتىل دايەكتىلەندىرىپ، حالىق قۇرىلتايى قىزمەتىنىڭ دۇرىس بەتالىسىن مىقتاپ يگەرىپ، پارتيا ورتالىق كوميتەتىنىڭ كەلەلى شەشىمدەرى مەن ورنالاستىرۋلارىنا تىعىز ىلەسىپ، حالىق بۇقاراسىنىڭ تاماشا تۇرمىسقا دەگەن تىلەگىمەن تىعىز جاناسىپ، مەملەكەتتى باسقارۋ جۇيەسى مەن باسقارۋ قابىلەتىن وسىزامانداندىرۋدى ىلگەرىلەتۋ قاجەتىن تىعىز ارقاۋ ەتىپ، جالپى بارىستىق حالىق دەموكراتياسىنىڭ كەلەلى ۇستانىمىن دايەكتىلەندىرىپ، بارلىق ۋاكىلدەرگە تىعىز سۇيەنىپ، زاڭ شىعارۋ ۇقىعىن، باقىلاۋ ۇقىعىن، شەشىم جاساۋ ۇقىعىن، مىندەتكە تاعايىنداۋ جانە مىندەتىنەن قالدىرۋ ۇقىعىن زاڭ بويىنشا جۇرگىزىپ، پارتيا مەن حالىق جۇكتەگەن داڭقتى مىندەتىن شىنايى اتقارىپ، پارتيا ورتالىق كوميتەتىنىڭ ماڭىزدى تاپسىرماسىن ورىنداۋ، حالىقتىڭ ءۇمىتىن اقتاۋ سىندى ايبىندى ۋادەنى ورىنداۋعا قۇلشىندى.
لي جانشۋ باياندامادا بىلاي دەدى: 5 جىلدان بەرى، نەگىزگى زاڭعا وزگەرىس ەنگىزۋ جوباسىن ماقۇلداپ، 47 زاڭ جاساپ، 111 رەت زاڭعا وزگەرىس ەنگىزىپ، زاڭدىق تۇسىنىك، زاڭدىق ماسەلەلەر مەن كەلەلى ماسەلەلەرگە قاتىستى 53 قاۋلى، قارار شىعارىپ، ءالى ماقۇلدانباعان 19 زاڭ جوباسىن، قاۋلى جوباسىن قارادى؛ 182 باقىلاۋ قىزمەتى بايانداماسى مەن باسقا باياندامالاردى تىڭداپ جانە قاراپ، 30 زاڭ مەن قاۋلىنىڭ اتقارىلۋ جاعدايىن تەكسەرىپ، 11 رەت ارناۋلى تاقىرىپتا پىكىر الۋ، 33 ءتۇرلى ارناۋلى تاقىرىپتا تەكسەرۋ - زەرتتەۋ جۇرگىزدى؛ ۋاكىلدەردىڭ 2282 كەڭەستىك جوباسىن، ۋاكىلدەردىڭ 43 مىڭ 750 ۇسىنىسىن تۇگەلدەي ءبىر جاقتى ەتىپ بولدى، ۋاكىلدەردىڭ كەڭەستىك جوبالاردى، ۇسىنىستاردى ءبىر جاقتى ەتۋ قىزمەتىنە رازىلىعى ％98كە جەتتى؛ شارت پەن ماڭىزدى كەلىسىمنەن 36 ءتۇرىن بەكىتۋدى نەمەسە قوسۋدى ۇيعاردى؛ مەملەكەت ورگاندارىنداعى قىزمەتكەرلەردەن زاڭ بويىنشا 1515 ادامدى (رەت) مىندەتكە تاعايىندادى، مىندەتىنەن قالدىردى. باستىسى، مىناداي قىزمەتتەردى ورىستەتتى: ءبىرىنشى، نەگىزگى زاڭدى اتقارۋدى جاپپاي دايەكتىلەندىرىپ، نەگىزگى زاڭنىڭ بەدەلى مەن ابىرويىن قورعادى؛ ەكىنشى، جۇڭگوشا سوتسياليستىك زاڭ جۇيەسىن كەمەلدەندىرىپ، كەمەلدى زاڭمەن دامۋدى جەبەپ، شەبەرلىكپەن جونگە سالۋدى قامتاماسىز ەتتى؛ ءۇشىنشى، نەگىزگى زاڭنىڭ حالىق قۇرىلتايىنا بەرگەن باقىلاۋ ۇقىعىنان ويداعىداي پايدالانىپ، دۇرىس باقىلاۋ، ءونىمدى باقىلاۋ، زاڭ بويىنشا باقىلاۋ جۇرگىزدى؛ ءتورتىنشى، حالىق قۇرىلتايى ۋاكىلدەرىنىڭ رولىن ساۋلەلەندىرىپ، حالىقتىڭ ۇنىنە جاۋاپ قاتۋدى ورىندادى؛ بەسىنشى، حالىق قۇرىلتايىنىڭ سىرتقا باعىتتالعان قارىم - قاتىناس ابزالدىلىعىن ساۋلەلەندىرىپ، پارتيا مەن مەملەكەتتىڭ ديپلوماتيالىق كەلەلى جاعدايىنا قىزمەت وتەدى؛ التىنشى، ساياسي قۇرىلىستى ءبىر تۇتاس باسشىلىققا الىپ، تۇراقتى كوميتەتتىڭ وزىندىك قۇرىلىسىن شىنايى كۇشەيتتى.
لي جانشۋ باياندامادا بىلاي دەدى: 5 جىلدىق اماليات حالىق قۇرىلتايى ءتۇزىمىنىڭ عىلمي ءمانى، نەگىزگى ەرەكشەلىگى جانە ماندىك تالابى جونىندەگى تانىمىمىزدى ونان ارى تەرەڭدەتتى، اتاپ ايتقاندا، ءسوز جوق، جۇڭگو كوممۋنيستىك پارتياسىنىڭ باسشىلىعىنا تاباندى بولۋ، ءسوز جوق، شي جينپيڭ جاڭا ءداۋىر جۇڭگوشا سوتسياليزم يدەياسىنا تاباندى بولۋ، ءسوز جوق، جۇڭگوشا سوتسياليستىك ساياسي دامۋ جولىنا تاباندى بولۋ، ءسوز جوق، جالپى بارىستىق حالىق دەموكراتياسى كەلەلى ۇستانىمىنا تاباندى بولۋ، ءسوز جوق، حالىق قۇرىلتايى تۇزىمىنە تاباندى بولۋ، ءسوز جوق، نەگىزگى زاڭدا بەلگىلەنگەن مەملەكەتتىڭ ءتۇبىرلى مىندەتىنە، دامۋ جولىنا، كۇرەس نىساناسىنا تاباندى بولۋ كەرەك.
مۇنان بىلايعى ءبىر جىلداعى قىزمەتتەر جونىندەگى ۇسىنىستا لي جانشۋ بىلاي دەپ اتاپ كورسەتتى: 2023 - جىل − پارتيا 20 - قۇرىلتايىنىڭ رۋحىن جاپپاي دايەكتىلەندىرۋدىڭ، تياناقتاندىرۋدىڭ باستاما جىلى، تۇراقتى كوميتەتتىڭ قىزمەتى: ءبىرىنشى، نەگىزگى زاڭدى اتقارۋ جانە زاڭ شىعارۋ قىزمەتىن جاقسى ىستەۋ؛ ەكىنشى، حالىق قۇرىلتايىنىڭ باقىلاۋ ونىمدىلىگىن ارتتىرۋ؛ ءۇشىنشى، ۋاكىلدەر قىزمەتى دەڭگەيىن جوعارىلاتۋ؛ ءتورتىنشى، حالىق قۇرىلتايىنىڭ سىرتقا باعىتتالعان قارىم - قاتىناس قىزمەتىن ويداعىداي ىستەۋ؛ بەسىنشى، تۇراقتى كوميتەتتىڭ وزىندىك قۇرىلىسىن كۇشەيتۋ.
ەڭ جوعارى حالىق سوتى مەكەمەسىنىڭ باستىعى جوۋ چياڭ ەڭ جوعارى حالىق سوتى مەكەمەسىنىڭ قىزمەتىنەن باياندامادا بىلاي دەپ اتاپ كورسەتتى: 2022 - جىلى بۇكىل ەلدەگى سوت مەكەمەلەرىنىڭ قىزمەتتەرى ورنىقتىلىق بارىسىندا ىلگەرىلەدى. ەڭ جوعارى حالىق سوتى مەكەمەسى 18 مىڭ 547 دەلونى قاراۋعا قابىلداپ، 13 مىڭ 785 دەلونى قاراپ اياقتاتتى؛ جەرگىلىكتى ءار دارەجەلى حالىق سوتى مەكەمەلەرى مەن ارناۋلى حالىق سوتى مەكەمەلەرىنىڭ قاراۋعا قابىلداعان دەلوسى 33 ميلليون 704 مىڭ، قاراپ اياقتاتقان، اتقارىپ اياقتاتقان دەلوسى 30 ميلليون 810 مىڭ، دەلو جابۋ نىسانا سوماسى 9 تريلليون 900 ميلليارد يۋان بولدى.
جوۋ چياڭ باياندامادا مىنالاردى ءبىلدىردى: 5 جىلدان بەرى، ەڭ جوعارى حالىق سوتى مەكەمەسى شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، شي جينپيڭنىڭ زاڭمەن باسقارۋ يدەياسىن ىشكەرىلەي دايەكتىلەندىرىپ، پارتيا 19 - قۇرىلتايىنىڭ جانە 19 - كەزەكتى ورتالىق كوميتەتتىڭ ءار رەتكى جالپى ماجىلىستەرىنىڭ رۋحىن جاپپاي دايەكتىلەندىرىپ، پارتيا 20 - قۇرىلتايىنىڭ رۋحىن مۇقيات ۇيرەنىپ، دايەكتىلەندىرىپ، نەگىزگى زاڭ مەن زاڭداردا جۇكتەلگەن مىندەتىن ادالدىقپەن وتەپ، حالىق سوتى مەكەمەسى قىزمەتىندە جاڭا وزگەرىس، تىڭ دامۋدى جۇزەگە اسىرۋدى جەبەدىك. ءبىرىنشى، مەملەكەتتىڭ حاۋىپسىزدىگىن، قوعامنىڭ تىنىشتىعىن، حالىقتىڭ اماندىعىن باتىل قورعادىق؛ ەكىنشى، جاڭا دامۋ ارناسىن قالىپتاستىرۋعا زاڭ بويىنشا قىزمەت وتەپ، جوعارى ساپالى دامۋدى ىلگەرىلەتتىك؛ ءۇشىنشى، ءادىليانى حالىق ءۇشىن جۇرگىزۋدىڭ جۇڭگوشا جولىمەن ويداعىداي جۇرۋگە تاباندى بولدىق؛ ءتورتىنشى، قوعامدىق ادىلدىك پەن تۋراشىلدىقتى قورعاۋدىڭ ەڭ سوڭعى قورعانىس شەبىن باتىل ساقتادىق؛ بەسىنشى، ءادىليا ءتۇزىلىسى رەفورماسى مەن زەردەلى سوت مەكەمەسى قۇرىلىسىندا كەلەلى ىلگەرىلەۋشىلىككە قول جەتكىزدىك؛ التىنشى، ادال، كىرشىكسىز، جاۋاپكەرشىلىك ارقالايتىن سوت مەكەمەسىنىڭ قۇرىش قوسىنىن سومدادىق.
باياندامادا جوۋ چياڭ 2023 - جىلعى قىزمەت جونىندە 5 جاقتان ۇسىنىس قويدى: شي جينپيڭنىڭ زاڭمەن باسقارۋ يدەياسىن جەتەكشى ەتىپ، جۇڭگوشا سوتسياليستىك زاڭمەن باسقارۋ جولىمەن بۇلجىماي ءجۇرۋ؛ دامۋ مەن حاۋىپسىزدىكتى اناعۇرلىم ويداعىداي ءبىر تۇتاس جوسپارلاپ، جوعارى دەڭگەيلى حاۋىپسىزدىك پەن جوعارى ساپالى دامۋعا زاڭ بويىنشا قىزمەت ەتۋ؛ حالىقتى وزەك ەتۋگە تاباندى بولىپ، ءادىليانى حالىق ءۇشىن جۇرگىزۋدى، ءادىليانى ءادىل جۇرگىزۋدى تىڭعىلىقتى ىلگەرىلەتۋ؛ ءادىليا ءتۇزىلىسى رەفورماسىن تەرەڭدەتىپ، سوت جۇرگىزۋ جۇيەسى مەن سوت جۇرگىزۋ قابىلەتىن وسىزامانداندىرۋدى جەدەل ىلگەرىلەتۋ؛ پارتيانى جاپپاي قاتاڭ باسقارۋعا، سوت مەكەمەسىن قاتاڭ باسقارۋعا تاباندى بولىپ، سوت مەكەمەسى قوسىنى قۇرىلىسىن كۇشەيتۋ.
ەڭ جوعارى حالىق پروكۋراتۋراسىنىڭ باس پروكۋرورى جاڭ جۇن ەڭ جوعارى حالىق پروكۋراتۋراسىنىڭ قىزمەتىنەن باياندامادا بىلاي دەپ اتاپ كورسەتتى: 5 جىلدان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، مەملەكەتتىك حالىق قۇرىلتايىنىڭ جانە ونىڭ تۇراقتى كوميتەتىنىڭ پارمەندى باقىلاۋىندا، ەڭ جوعارى حالىق پروكۋراتۋراسى قىلمىستىق ىستەر، ازاماتتىق ىستەر، اكىمشىلىك، الەۋمەتتىك يگىلىك ارىز - شاعىمى سىندى ”ءتورت ءىرى پروكۋراتۋرالىق“ جاڭا ارناسىن جاسامپازدىقپەن قالىپتاستىرىپ، حالىقتى بارىنەن جوعارى قويۋدى امالياتتا ايگىلەپ، نەگىزگى زاڭ مەن زاڭداردا جۇكتەلگەن زاڭدىق باقىلاۋ مىندەتىن ىرىقتىلىقپەن اتقارىپ، حالىق پروكۋراتۋرا ىستەرى تىڭنان قارىشتاپ دامۋدى جۇزەگە اسىردى. 2018 - جىلدان 2022 - جىلعا دەيىن بۇكىل ەلدەگى پروكۋراتۋرا ورگاندارى ءبىر جاقتى ەتكەن ءتۇرلى دەلولار 17 ميلليون 336 مىڭ بولىپ، الدىڭعى 5 جىلداعىدان ％40 جوعارىلادى. 2018 - جىلداعىمەن سالىستىرعاندا، 2022 - جىلى شاعىم ايتۋ دەلولارىن قابىلداپ تەكسەرۋ مولشەرى ％8. 2 جوعارىلاپ، ازاماتتىق ىستەر، اكىمشىلىك، الەۋمەتتىك يگىلىك ارىز - شاعىم دەلولارىن ءبىر جاقتى ەتۋ جەكە - جەكە 1.5 ەسە، 3. 3 ەسە جانە ％72.6 جوعارىلادى.
باياندامادا جاڭ جۇن وتكەن 5 جىلداعى قىزمەتتەرگە 6 جاقتان قايىرىلا قارادى: ءبىرىنشى، حاۋىپسىزدىكتى، ورنىقتىلىقتى قورعاپ، ىرىقتى پروكۋراتۋرا ارقىلى جۇڭگونىڭ باسقارۋىنا دەم بەردى؛ ەكىنشى، نازاردى كەلەلى جاعدايعا قىزمەت وتەۋگە شوعىرلاندىرىپ، ىرىقتى پروكۋراتۋرا ارقىلى جوعارى ساپالى دامۋدى جەبەدى؛ ءۇشىنشى، ءادىليانى حالىق ءۇشىن جۇرگىزۋگە تاباندى بولىپ، ىرىقتى پروكۋراتۋرا ارقىلى حالىق تۇرمىسىنىڭ ىرىس - قۇتىن قامتاماسىز ەتتى؛ ءتورتىنشى، ارىز - شاعىمدى باقىلاۋدى كۇشەيتىپ، ىرىقتى پروكۋراتۋرا ارقىلى ءادىليانىڭ ادىلدىگىن قورعادى؛ بەسىنشى، الەۋمەتتىك يگىلىك ارىز - شاعىمىن كەڭەيتىپ، ىرىقتى پروكۋراتۋرا ارقىلى الەۋمەتتىك مۇددەنى قورعادى؛ التىنشى، پروكۋراتۋرانى قاتاڭ باسقارۋعا تاباندى بولىپ، ىرىقتى پروكۋراتۋرا ارقىلى ىسىلعان قوسىن شىڭدادى.
جاڭ جۇن باياندامادا 2023 - جىلعى قىزمەت جونىندە ۇسىنىس قويدى: ءبىرىنشى، شي جينپيڭ جاڭا ءداۋىر جۇڭگوشا سوتسياليزم يدەياسىن ىشكەرىلەي ۇيرەنۋ، دايەكتىلەندىرۋ؛ ەكىنشى، مەملەكەتتىڭ حاۋىپسىزدىگى مەن قوعام ورنىقتىلىعىن باتىل قورعاۋ؛ ءۇشىنشى، زاڭمەن باسقارۋ كۇشىنەن تولىق پايدالانىپ، جوعارى ساپالى دامۋعا قىزمەت ەتۋ؛ ءتورتىنشى، زاڭدىق باقىلاۋ قابىلەتىن جوعارىلاتۋ؛ بەسىنشى، ءادىليا ءتۇزىلىسىنىڭ كەشەندى، سايكەستى رەفورماسىن تەرەڭدەتۋ؛ التىنشى، اۋىر مىندەت ارقالاي الاتىن پروكۋراتۋرا قۇرىش قوسىنىن قۇرۋ.
مەملەكەتتىك كەڭەستىڭ زۇڭليى لي كىچياڭ قاراۋعا ۇسىنعان مەملەكەتتىك كەڭەس قۇرىلىمدارىنىڭ رەفورما جوباسى جونىندەگى كەڭەستىك جوبادا بىلاي دەپ اتاپ كورسەتتى: جۇڭگو كوممۋنيستىك پارتياسىنىڭ مەملەكەتتىك 20 - قۇرىلتايى قۇرىلىم رەفورماسىن تەرەڭدەتۋ جونىندە ماڭىزدى ورنالاستىرۋ جاسادى. پارتيا 20 - كەزەكتى ورتالىق كوميتەتىنىڭ ەكىنشى جالپى ءماجىلىسى «پارتيا مەن مەملەكەت قۇرىلىمدارىنىڭ رەفورما جوباسىن» قاراپ ماقۇلداپ، ونداعى مەملەكەتتىك كەڭەس قۇرىلىمدارى رەفورماسىنا ساياتىن مازمۇنداردى 14 - كەزەكتى مەملەكەتتىك حالىق قۇرىلتايى 1 - ءماجىلىسىنىڭ قاراۋىنا ۇسىنۋعا قوسىلدى. ەندى «پارتيا مەن مەملەكەت قۇرىلىمدارىنىڭ رەفورما جوباسىنا» ساي قالىپتاسقان «مەملەكەتتىك كەڭەس قۇرىلىمدارىنىڭ رەفورما جوباسىن» 14 - كەزەكتى مەملەكەتتىك حالىق قۇرىلتايى 1 - ءماجىلىسىنىڭ قاراۋىنا ۇسىنىپ وتىرمىز.
مەملەكەتتىك كەڭەستىڭ تاپسىرۋىمەن مەملەكەتتىك كەڭەستىڭ مۇشەسى، قوسىمشا مەملەكەتتىك كەڭەستىڭ باس حاتشىسى شياۋ جيە مەملەكەتتىك كەڭەس قۇرىلىمدارىنىڭ رەفورما جوباسى جونىندە تۇسىنىك جاسادى. شياۋ جيە تۇسىندىرمەدە بىلاي دەپ اتاپ كورسەتتى: مەملەكەتتىك كەڭەس قۇرىلىمدارىنىڭ رەفورماسى − پارتيا مەن مەملەكەت قۇرىلىمدارى رەفورماسىنىڭ ماڭىزدى مىندەتى، ونىڭ ءتۇيىنى − عىلىم - تەحنيكا، فينانستى باقىلاۋ - باسقارۋ، ساندى مالىمەتتەردى باسقارۋ، اۋىل - قىستاقتى گۇلدەندىرۋ، ءبىلىم مەنشىك ۇقىعى، قارتتار قىزمەتى سياقتى ءتۇيىندى سالالارداعى قۇرىلىمداردىڭ قىزمەت جاۋاپكەرشىلىگىن ساپالىلاندىرىپ جانە رەتتەپ، ۇكىمەت فۋنكتسياسىندا بۇرىلىس جاساپ، زاڭمەن باسقارىلاتىن ۇكىمەت قۇرۋدى جەدەلدەتۋ.
بۇل رەتكى مەملەكەتتىك كەڭەس قۇرىلىمدارى رەفورماسىنىڭ ناقتى مازمۇنى مىناداي: عىلىم - تەحنيكا مينيسترلىگىن قايتا قۇرۋ؛ مەملەكەتتىك فينانس باقىلاۋ - باسقارۋ باس مەكەمەسىن قۇرۋ؛ جەرگىلىكتى فينانستى باقىلاۋ - باسقارۋ ءتۇزىلىسى رەفورماسىن تەرەڭدەتۋ؛ جۇڭگو باعالى قاعازدى باقىلاۋ - باسقارۋ كوميتەتىن مەملەكەتتىك كەڭەسكە توتە قاراستى قۇرىلىم ەتىپ رەتتەۋ؛ جۇڭگو حالىق بانكەسىنىڭ بولىمشە، تارماق قۇرىلىم رەفورماسىن ءبىر تۇتاس جوسپارلاپ ىلگەرىلەتۋ؛ مەملەكەت مەنشىگىندەگى فينانس كاپيتالىن باسقارۋ ءتۇزىلىسىن كەمەلدەندىرۋ؛ فينانس باسقارۋ تاراۋلارىنداعى قىزمەتكەرلەردى ءبىر تۇتاس ارناعا ءتۇسىرىپ باسقارۋدى كۇشەيتۋ؛ مەملەكەتتىك ساندى مالىمەت مەكەمەسىن قۇرۋ؛ اۋىل شارۋاشىلىعى، اۋىل - قىستاق مينيسترلىگىنىڭ قىزمەت جاۋاپكەرشىلىگىن ساپالىلاندىرۋ؛ قارتتار قىزمەتى ءتۇزىلىسىن كەمەلدەندىرۋ؛ ءبىلىم مەنشىك ۇقىعىن باسقارۋ ءتۇزىلىسىن كەمەلدەندىرۋ؛ مەملەكەتتىك ارىز - ارمان مەكەمەسىن مەملەكەتتىك كەڭەسكە توتە قاراستى قۇرىلىم ەتىپ رەتتەۋ؛ ورتالىقتاعى مەملەكەت ورگاندارىنىڭ قىزمەتكەرلەر شتاتىن ىقشامداۋ. جوعارىداعى جوبا بويىنشا رەتتەلگەننەن كەيىن، مەملەكەتتىك كەڭەس كەڭسەسىنەن سىرت، مەملەكەتتىك كەڭەستىڭ قۇرامىنداعى تاراۋلار اۋەلگىدەي 26 بولادى.
ءماجىلىستىڭ اتقارۋشى ءتوراعالارى ۋاڭ نيڭ، ليۋ يلياڭ، ليۋ نيڭ، لي شيۋليڭ، چىن گاڭ، جىڭ شانجيە، ني يۋەفىڭ، جيڭ جۇنحاي، لوۋ ياڭشىڭ ءتوراعالار مىنبەسىندەگى اتقارۋشى ءتوراعالار ورنىنا جايعاستى.