شينحۋا اگەنتتىگىنىڭ 5 - ايدىڭ 24 - كۇنى بەيجيڭنەن بەرگەن حابارى. 5 - ايدىڭ 24 - كۇنى مەملەكەت ءتوراعاسى شي جينپيڭ ەريترەيانىڭ زۇڭتۇڭى يساياسپەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 30 جىلدىعىن قۇتتىقتادى.
شي جينپيڭ بىلاي دەپ اتاپ كورسەتتى: ديپلوماتيالىق قارىم - قاتىناس ورناتقان 30 جىلدان بەرى جۇڭگو مەن ەريترەيا قارىم - قاتىناسى حالىقارالىق قۇبىلمالى وزگەرىستەردى باستان وتكەرىپ، ەكى جاق باستان - اياق شىنايى دوس بولىپ، قول ۇستاسا بىرگە العا باسىپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىرىن - ءبىرى باتىل قولدادى. تاياۋدا يساياس زۇڭتۇڭ ءساتتى تۇردە جۇڭگودا مەملەكەتتىك ساپاردا بولدى، ءبىز ەكى ەلدىڭ قارىم قاتىناسىن اناعۇرلىم ىشكەرىلەي تەرەڭدەتۋ جانە ورتاق كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە ىشكەرىلەي پىكىر اۋىستىرىپ، كوپتەگەن ماڭىزدى ورتاق تانىمعا كەلدىك.
شي جينپيڭ بىلاي دەپ باسا دارىپتەدى: مەن جۇڭگو − ەريترەيا قارىم - قاتىناسىنىڭ دامۋىنا ايرىقشا ءمان بەرەمىن، يساياس زۇڭتۇڭمەن بىرگە قۇلشىنىپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 30 جىلدىعىن وراي ەتىپ، ءوزارا قولداۋدى بەكەمدەپ، جان - جاقتى سەلبەستىكتى كۇشەيتىپ، جۇڭگو − ەريترەيا ستراتەگيالىق سەرىكتەستىك قارىم - قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتۋدى قالايمىن.
يساياس مىنالاردى ءبىلدىردى: ەريترەيا مەن جۇڭگونىڭ دوستىعى ارىدان باستاۋ العان، جۇڭگو ەريترەيا حالقىنىڭ ۇلتتىق تاۋەلسىزدىككە قول جەتكىزۋى ءۇشىن ادامگەرشىلىك جانە زاتتىق جاقتان قولداۋ كورسەتتى. وتكەن 30 جىلدا ەريترەيا − جۇڭگو قارىم - قاتىناسى ۇزدىكسىز دامىدى. تاياۋدا مەن ءساتتى تۇردە جۇڭگودا مەملەكەتتىك ساپاردا بولىپ، ءتوراعا شي جينپيڭمەن ىشكەرىلەي كەڭەستىم. مەن ەريترەيا مەن جۇڭگونىڭ دوستىق، سەلبەستىك قارىم قاتىناسىنىڭ اناعۇرلىم جوعارى ساتىعا كوتەرىلىپ، ءارقايسى سالانى قامتىعان جان - جاقتى سەلبەستىگى مەن سايكەستىگىن كورىپ قاباعات قۋاندىم. يساياس بىلاي دەپ باسا دارىپتەدى: مەن وسى ءبىر قۋانىشتى ساتتە، ەريترەيا، جۇڭگو ەكى ەلدىڭ ستراتەگيالىق قارىم - قاتىناسىنىڭ بولاشاعىنا دەگەن بەرىك سەنىمىم مەن تاماشا تىلەگىمدى قايتالاي بىلدىرگىم كەلەدى.