شي جينپيڭ باستالۋ سالتىنا قاتىناستى ءارى وسى كەزەكتى جوعارى مەكتەپ وقۋشىلارى جازعى سپورت جارىسىنىڭ باستالعاندىعىن جاريالادى

ساي چي، ديڭ شۋەشياڭ، دۇنيە ءجۇزىنىڭ جەر - جەرىنەن كەلگەن باسشىلار جانە سيلى قوناقتار قاتىناستى

　　31 - كەزەكتى دۇنيە ءجۇزى جوعارى مەكتەپ وقۋشىلارى جازعى سپورت جارىسى 7 - ايدىڭ 28 - كۇنى كەشتە سىچۋان ولكەسىنىڭ چىڭدۋ قالاسىندا سالتاناتپەن باستالدى. سۋرەتتە: مەملەكەت ءتوراعاسى شي جينپيڭ ءتوراعالار مىنبەسىندە كوپشىلىككە قول بۇلعاپ قۇرمەت بىلدىرۋدە.

□ سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن

　　31 - كەزەكتى دۇنيە ءجۇزى جوعارى مەكتەپ وقۋشىلارى جازعى سپورت جارىسى 7 - ايدىڭ 28 - كۇنى كەشتە سىچۋان ولكەسىنىڭ چىڭدۋ قالاسىندا سالتاناتپەن باستالدى. شي جينپيڭ، ساي چي، ديڭ شۋەشياڭ قاتارلى پارتيا مەن مەملەكەت باسشىلارى باستالۋ سالتىنا قاتىناستى.

□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

　　شينحۋا اگەنتتىگىنىڭ 7 - ايدىڭ 28 - كۇنى چىڭدۋدان بەرگەن حابارى. جوعارى مەكتەپ وقۋشىلارى جازعى سپورت جارىسىنىڭ سالتاناتىن بىرگە قىزىقتاپ، جاستىقتىڭ اسەم سيمفونياسىن بىرگە جازادى. 31 - كەزەكتى دۇنيە ءجۇزى جوعارى مەكتەپ وقۋشىلارى جازعى سپورت جارىسى 7 - ايدىڭ 28 - كۇنى كەشتە سىچۋان ولكەسىنىڭ چىڭدۋ قالاسىندا سالتاناتپەن باستالدى. مەملەكەت ءتوراعاسى شي جينپيڭ باستالۋ سالتىنا قاتىناستى ءارى وسى كەزەكتى جوعارى مەكتەپ وقۋشىلارى جازعى سپورت جارىسىنىڭ باستالعاندىعىن جاريالادى.

　　ساي چي، ديڭ شۋەشياڭ، سونداي - اق دۇنيە ءجۇزىنىڭ جەر - جەرىنەن كەلگەن باسشىلار جانە سيلى قوناقتار باستالۋ سالتىنا قاتىناستى.

　　ءتۇن قۇشاعىندا دۇڭانحۋ دەنە تاربيە باقشاسىنىڭ نەگىزگى دەنە تاربيە الاڭىندا اسەم شام - شىراقتار جامىراپ، كوركى كوز ءسۇرىندىردى. اشىلۋ سالتى باستالاردان بۇرىن چىڭدۋداعى جوعارى مەكتەپتەردەن كەلگەن وقۋشىلار ومىرشەڭدىككە تولى ادەبيەت - كوركەمونەر كونسەرتىن ۇسىنىپ، سالتانات الاڭىن قىزۋ دۋمانعا بولەدى.

　　ساعات 19دان 58 مينۋت وتكەندە «بەيبىتشىلىك − تاعدىرلاس ورتاق تۇلعا» مۋزيكا اۋەنىمەن شي جينپيڭ مەن حانىمى پىڭ لييۋان حالىقارالىق جوعارى مەكتەپ وقۋشىلارى دەنە تاربيە بىرلەستىگىنىڭ ۋاقىتشا ءتوراعاسى ەدەر قاتارلىلارمەن بىرگە ءتوراعالار مىنبەسىنە قادام تاستاپ، كورەرمەندەرگە قول بۇلعاپ قۇرمەت ءبىلدىردى. بۇكىل الاڭدا ۇزاققا دەيىن قىزۋ قول شاپالاق ءۇنى كوتەرىلدى.

　　الاڭنىڭ ورتاسىندا جۇڭگو مادەنيەت مۇرالارىنىڭ نىشانى سانالاتىن ”كۇن سامۇرىعى“ دوڭگەلەنە اينالىپ، 12 التىن جولاق شۇعىلا شاشتى. وت - شاشۋلار كەڭىستىكتە كەرى شەگەرىپ ساناۋ سيفرلارىن تۇلعالاپ، الاڭداعى كورەرمەندەر سيفرعا ىلەسىپ بىركەلكى ۇنمەن داۋىستادى. سالتانات ءۇنى ىشىندە ءتۇستى جارقىلداق كەشكى اسپاندى قۇلپىرتتى. چىڭدۋ جوعارى مەكتەپ وقۋشىلارى جازعى سپورت جارىسىنىڭ باستالۋ سالتى رەسمي باستالدى.

　　دالياڭشاندىق بالالار شىرقاعان «مەملەكەت تۋى، مەملەكەت تۋى، قانداي اسەم» اتتى ءاننىڭ جانە 56 ۇلت جاستارى بىرگە ورىنداعان «وتاندى جىرلايمىز» اتتى ءان اۋەنىمەن 8 قۇرمەت قاراۋىلى نىق قادام تاستاپ، جۇڭحۋا حالىق رەسپۋبليكاسىنىڭ مەملەكەت تۋىن قورعاپ الاڭعا كىردى. بارلىق ادام ورىندارىنان تۇرىپ، جۇڭحۋا حالىق رەسپۋبليكاسىنىڭ مەملەكەت ءانىن اسقاقتاتا ورىندادى. بەس جۇلدىزدى قىزىل تۋ باياۋ كوتەرىلىپ، جەلمەن جەلبىرەدى.

　　ساعات 20دان 7 مينۋت وتكەندە سپورتشىلاردىڭ الاڭعا كىرۋ سالتى باستالدى، 113 مەملەكەت پەن وڭىردەن كەلگەن جوعارى مەكتەپ وقۋشىلارى دەنە تاربيە ۋاكىلدەر ۇيىرمەسى سىچۋان قامقاسىنىڭ ناقىشى تۇسىرىلگەن ”اسەم جولمەن“ ىركەس - تىركەس الاڭعا كىرىپ، بۇكىل الاڭداعى كورەرمەندەردىڭ قىزۋ قارسى الۋىنا بولەندى. وتاعاسى ەل جۇڭگونىڭ ۋاكىلدەر ۇيىرمەسى الاڭعا ەڭ سوڭىندا كىردى، شي جينپيڭ ورنىنان تۇرىپ قول بۇلعاپ قۇرمەت ءبىلدىردى، بۇكىل الاڭ دۋمانعا شومدى، قول شاپالاق ءۇنى، سالتانات ءۇنى تولاس تاپپادى. جۇڭگو ۋاكىلدەر ۇيىرمەسىندە جالپى 700دەن استام ادام بار، ولاردىڭ اراسىندا جارىسقا قاتىناساتىن 411 سپورتشى وسى كەزەكتى جوعارى مەكتەپ وقۋشىلارى جازعى سپورت جارىسىنداعى بارلىق 18 ۇلكەن جارىس تۇرىنە قاتىناسادى.

　　چىڭدۋ جوعارى مەكتەپ وقۋشىلارى جازعى سپورت جارىسى ۇيىمداستىرۋ القاسىنىڭ ءتوراعاسى حۋاي جينپىڭ ارناۋ ءسوز سويلەپ، چىڭدۋ جوعارى مەكتەپ وقۋشىلارى جازعى سپورت جارىسىنىڭ ۇيىمداستىرۋ القاسى اتىنان دۇنيە جۇزىندەگى ءار ەلدەن جانە وڭىردەن كەلگەن سپورتشىلاردى، جاتتىقتىرۋشىلاردى، تەحنيكالىق قىزمەتكەرلەردى، قوناقتاردى قىزۋ قارسى الاتىندىعىن ءبىلدىردى، ولاردىڭ دەنە تاربيە رۋحىن ساۋلەلەندىرىپ، جاستىق كەلبەتتەرىن ايگىلەپ، ىنتىماقتى، دوستىقتى سومداۋىن تىلەدى.

　　حالىقارالىق جوعارى مەكتەپ وقۋشىلارى دەنە تاربيە بىرلەستىگىنىڭ ۋاقىتشا ءتوراعاسى ەدەر ارناۋ سوزىندە جۇڭگو ۇكىمەتىنىڭ جانە سىچۋان ولكەسىنىڭ، چىڭدۋ قالاسىنىڭ جانە بارلىق قاتىناسۋشىلاردىڭ كۇتكەن ءۇمىتتى جەردە قالدىرماعان دەنە تاربيە سالتاناتىن بىرگە دايىنداعاندارىنا شىن جۇرەكتەن العىس ايتتى، جارىسقا قاتىناسقان سپورتشىلارعا ىزگى تىلەك ءبىلدىردى.

　　ساعات 21دەن 16 مينۋت وتكەندە باستالۋ سالتى جان تەبىرەنتەر ءساتتى قارسى الدى. مەملەكەت ءتوراعاسى شي جينپيڭ: چىڭدۋ 31 - كەزەكتى دۇنيە ءجۇزى جوعارى مەكتەپ وقۋشىلارى جازعى سپورت جارىسى باستالدى! دەپ جاريالادى. سول ساتتە بۇكىل الاڭ دۋمانعا شومدى، كوزدىڭ جاۋىن الاتىن وت - شاشۋ كەڭىستىككە كوتەرىلىپ، حانزۋشا - اعىلىشىنشا ”قارسى الامىز“ دەگەن جازۋلاردى ايشىقتادى.

　　ەلىمىزدىڭ تاڭداۋلى جاس سپورتشىلارىنىڭ جانە ەرىكتىلەردىڭ 8 ۋاكىلى حالىقارالىق جوعارى مەكتەپ وقۋشىلارى دەنە تاربيە بىرلەستىگىنىڭ تۋىن ۇستاپ الاڭعا كىردى. حالىقارالىق جوعارى مەكتەپ وقۋشىلارى دەنە تاربيە بىرلەستىگىنىڭ ءان اۋەنىمەن حالىقارالىق جوعارى مەكتەپ وقۋشىلارى دەنە تاربيە بىرلەستىگىنىڭ تۋى باياۋ كوتەرىلىپ، بەس جۇلدىزدى قىزىل تۋمەن قاتار بيىك جەلبىرەدى.

　　سپورتشى تاڭ زىتيڭ، تورەشى ليۋ جياڭ جەكە - جەكە جارىسقا قاتىناساتىن بارلىق سپورتشىلار جانە تەحنيكالىق قىزمەتكەرلەر اتىنان سەرت بەردى.

　　سوڭىنان «ارمانعا قانات قاققان جاستىق داۋرەن» اتتى تارتىمدى مادەنيەت جانە دەنە تاربيە كونسەرتى قويىلدى. كونسەرت «جاستىق شۇعىلاسى»، «جاستىق جالىنى»، «جاس داۋرەن دوستىعى» سىندى 3 بولىمگە ءبولىندى. «جاستىق شۇعىلاسىندا» ارىنداي ورگە ۇمتىلعان بەينەمەن جاستاردىڭ تىنباي ىزدەنىس جاساعان، نۇرلى بولاشاققا ۇمتىلعان ماڭگىلىك تالپىنىسى ايگىلەندى؛ «جاستىق جالىنىندا» جاس جوعارى مەكتەپ وقۋشىلارىنىڭ قايراتتانا ۇمتىلعان، ومىرشەڭدىك كۇشى تاسقىنداعان بەينەسى ايگىلەنىپ، سپورتتىڭ ادامدارعا سيلاعان قۋانىشى مەن اسقاق سەزىمى اقتارىلدى؛ «جاس داۋرەن دوستىعى» تاراۋىندا جاس جوعارى مەكتەپ وقۋشىلارى مەن سۇيكىمدى ”دوستىق ەلشىسى مىسىق ايۋ“ دۋماندى مۋزيكا ۇنىمەن بيگە باسىپ، جاستىق داۋرەن باس قوسۋىندا دوستىققا قول جەتكىزدى.

　　ساعات 21دەن 40 مينۋت وتكەندە نەگىزگى الاۋدى تۇتاندىرۋ سالتى باستالدى. وتكەن ءبىر ايدان استام ۋاقىتتىڭ ىشىندە يتاليانىڭ دۋرينىنان الىنعان دۇنيە ءجۇزى جوعارى مەكتەپ وقۋشىلارى جازعى سپورت جارىسىنىڭ قاسيەتتى الاۋى ىلگەرىندى - كەيىندى بەيجيڭ، حاربين، شىنجىن، چۇڭچيڭ، يبيڭ جانە چىڭدۋ سياقتى جەرلەردەگى كوپتەگەن جوعارى مەكتەپتەر اراسىندا جەتكىزىلىپ، ەڭ سوڭىندا دۇڭانحۋ دەنە تاربيە باقشاسىنداعى نەگىزگى دەنە تاربيە الاڭىنا جەتتى.

　　الاڭنىڭ ورتاسىندا ”كۇن سامۇرىعى“ ناقىشى تۇسىرىلگەن قاسيەتتى الاۋ تاباعى باياۋ كوتەرىلدى. عارىشكەر يە گۋاڭفۋ قاتارلى 31 الاۋگەر الاۋدى بيىك ۇستاپ، الاڭعا كىردى. كوپتىڭ نازار تىگۋىندە الاۋگەرلەر قاسيەتتى الاۋ تاباعىنىڭ الدىنا جۇگىرىپ جەتىپ، قورالانا قالىپ، قولدارىنداعى الاۋمەن ”كۇن سامۇرىعىن“ تۇتاندىردى، قاس - قاعىم ساتتە شار تاراپ نۇرعا شومدى. دۇنيە ءجۇزى جوعارى مەكتەپ وقۋشىلارى جازعى سپورت جارىسىنىڭ قاسيەتتى الاۋى لاۋلاپ، بۇكىل دۇنيە جۇزىندەگى جوعارى مەكتەپ وقۋشىلارىنىڭ كۇن شۋاعىنداي ىزگى تىلەكتەرىن جەتكىزدى.

　　”دۇنيە ءجۇزىن نۇرلاندىرىپ، ءومىر جىرىنا قۇلاق تۇرەيىك“، ”بولاشاقتى نۇرلاندىرىپ، اسەم قيانعا كوز تاستايىق“... جاس جوعارى مەكتەپ وقۋشىلارى قاسيەتتى الاۋ استىندا باس قوسىپ، باستالۋ سالتىنىڭ تاقىرىپتىق ءانى − «ارمانعا جەتەيىكتى» بىرگە شىرقادى، بۇكىل دەنە تاربيە الاڭى شاتتىق تەڭىزىنە اينالدى.

　　باستالۋ سالتىنا قاتىناسقان حالىقارالىق سيلى قوناقتاردان: يندونەزيانىڭ زۇڭتۇڭى جوكو مەن حانىمى يليانا، ماۆريتانيانىڭ زۇڭتۇڭى عازۋاني، بۋرۋنديدىڭ زۇڭتۇڭى ىندايشىمييە، گۆيانانىڭ زۇڭتۇڭى الي، گرۋزيانىڭ زۇڭليى گاريباشۆيلي بار.

　　ۋاڭ ي، لي گانجيە، ۋاڭ شياۋحۇڭ، شىن يچين باستالۋ سالتىنا قاتىناستى.

　　حالىقارالىق جوعارى مەكتەپ وقۋشىلارى دەنە تاربيە بىرلەستىگىنىڭ نەگىزگى اتقارۋشى القالارى دا باستالۋ سالتىنا قاتىناستى.

جالعانىم