شي جينپيڭ سىچۋاندا قىزمەت تەكسەرگەندە بىلاي دەپ باسا دارىپتەدى
جاڭا داۋىردە سىچۋاندى باسقارۋدىڭ، سىچۋاندى گۇلدەندىرۋدىڭ تاعى دا تىڭ ساتىعا كوتەرىلۋىن ىلگەرىلەتىپ، جۇڭگو ۇلگىسىندەگى وسىزامانداندىرۋدىڭ سىچۋان تىڭ تاراۋىن قۇلشىنا جازۋ كەرەك
بەيجيڭگە قايتقان جولىندا شانشيدىڭ حانجۇڭىندا قىزمەت تەكسەردى
ساي چي قىزمەت تەكسەرۋدە بىرگە بولدى
جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 7 - ايدىڭ 25 - كۇنىنەن 27 - كۇنىنە دەيىن سىچۋاندا قىزمەت تەكسەردى. سۋرەتتە: 7 - ايدىڭ 25 - كۇنى تۇستەن كەيىن شي جينپيڭ گۋاڭيۋان قالاسى جيانگى اۋدانى سۇييۇن دالىزىندە قىزمەت تەكسەرۋدە.
□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 7 - ايدىڭ 25 - كۇنىنەن 27 - كۇنىنە دەيىن سىچۋاندا قىزمەت تەكسەردى. سۋرەتتە: 7 - ايدىڭ 26 - كۇنى تۇستەن كەيىن شي جينپيڭ دىياڭ قالاسىنىڭ گۋاڭحان قالاسىنا ورنالاسقان سانشيڭدۇي مۇراجايىنىڭ مادەني ەسكەرتكىشتەردى قورعاۋ جانە قالپىنا كەلتىرۋ سارايىندا سول جەردەگى قىزمەتكەرلەرمەن شىن ىقىلاسپەن پىكىر اۋىستىرۋدا.
□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
شينحۋا اگەنتتىگىنىڭ 7 - ايدىڭ 29 - كۇنى سىچۋاننىڭ چىڭدۋىنان \ شانشيدىڭ حانجۇڭىنان بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ تاياۋدا سىچۋاندا قىزمەت تەكسەرگەندە بىلاي دەپ باسا دارىپتەدى: پارتيا 20 - قۇرىلتايىنىڭ رۋحىن جاپپاي ۇيرەنىپ، دايەكتىلەندىرىپ، جاڭا ءداۋىردىڭ جاڭا جورىعىنداعى پارتيانىڭ وزەكتى مىندەتىن مىقتاپ يگەرىپ، جۇڭگو ۇلگىسىندەگى وسىزامانداندىرۋدىڭ عىلمي ءمانى مەن ماندىك تالابىن مىقتاپ يگەرىپ، جوعارى ساپالى دامۋ سىندى وسى ماڭداي الدى مىندەتتى مىقتاپ يگەرىپ، جاڭا دامۋ ۇستانىمىن دايەكتىلەندىرۋدى، جاڭا دامۋ ارناسىن قالىپتاستىرۋدى، بىرگە بايۋدى جەبەۋدى ەكونوميكالىق، قوعامدىق دامۋدىڭ ءار جاعىمەن، جالپى بارىسىمەن ساباقتاستىرىپ، دامۋ ءتاسىلىن، دامۋ قوزعاۋشى كۇشىن، دامۋ سالاسىن، دامۋ ساپاسىن جاڭالاۋدى ىشكەرىلەي ىلگەرىلەتىپ، ەلىمىزدىڭ جوعارى ساپالى دامۋىنىڭ جاڭا جاعدايىن اشۋ كەرەك. سىچۋان بۇكىل ەلدىڭ كەلەلى جاعدايىنان ءوزىنىڭ ستراتەگيالىق ورنى مەن ستراتەگيالىق بورىشىن ىلگەرىلەي يگەرىپ، جەرگىلىكتى ورىننىڭ ءىس جۇزىندىگىن تياناق ەتىپ، دامۋ وي جەلىسى مەن نەگىزگى قامال الۋ بەتالىسىن ايقىنداپ، ارتىقشىلىقتى ساۋلەلەندىرىپ، ولقىلىقتى تولىقتاپ، عىلىم - تەحنيكادا جاڭالىق اشۋ قابىلەتىن جوعارىلاتۋ، وسىزاماندانعان كاسىپ سالاسى جۇيەسىن قۇرۋ، اۋىل - قىستاقتى گۇلدەندىرۋدى ىلگەرىلەتۋ، ەكولوگيالىق ورتانى وڭاۋدى كۇشەيتۋ سياقتى جاقتاردا جاڭا سەرپىلىس جاساۋعا قۇلشىنىپ، جاڭا داۋىردە سىچۋاندى باسقارۋدىڭ، سىچۋاندى گۇلدەندىرۋدىڭ تاعى دا تىڭ ساتىعا كوتەرىلۋىن ىلگەرىلەتىپ، جۇڭگو ۇلگىسىندەگى وسىزامانداندىرۋدىڭ سىچۋان تىڭ تاراۋىن قۇلشىنا جازۋ كەرەك.
7 - ايدىڭ 25 - كۇنىنەن 27 - كۇنىنە دەيىن شي جينپيڭ سىچۋان ولكەلىك پارتكومنىڭ شۋجيى ۋاڭ شياۋحۇيدىڭ جانە ولكە باستىعى حۋاڭ چياڭنىڭ سەرىك بولۋىندا ىلگەرىندى - كەيىندى گۋاڭيۋان، دىياڭ سياقتى جەرلەرگە بارىپ تەكسەرۋ - زەرتتەۋ جۇرگىزدى.
7 - ايدىڭ 25 - كۇنى تۇستەن كەيىن شي جينپيڭ الدىمەن گۋاڭيۋان قالاسى جيانگى اۋدانىنا بارىپ، سۇييۇن دالىزىندە قىزمەت تەكسەردى. بۇل ارا ەرتە زامانداعى گۋانجۇڭ جازىعىنان سىچۋان ويپاتىنا باراتىن بايىرعى سىچۋان جولىنىڭ ماڭىزدى جول بولىگى، مۇندا قازىرگە دەيىن ەڭ كەمەلدى ساقتالعان بايىرعى زاماندا بەكەت جولىندا قولمەن ەگىلگەن بايىرعى ساۋىر ارشا شوعىرى بار. شي جينپيڭ بايىرعى سىچۋان جولىنىڭ دامۋ بارىسى، سۇييۇن ءدالىزىنىڭ جالپى تۇلعالىق جاعدايى جونىندەگى تانىستىرۋدى تىڭداپ، بايىرعى جولمەن جاياۋ ءجۇرىپ، مىڭ جىلدىق بايىرعى ساۋىر ارشالارىنىڭ ءوسۋ جاعدايىن تەكسەرىپ كورىپ، تاريحتاعى ساۋىر ارشالارىنىڭ ەگىلۋ، قورعالۋ جاعدايىن تاپتەشتەي سۇرادى. ول بىلاي دەپ اتاپ كورسەتتى: دۇنيە جۇزىندەگى ەڭ ۇلكەن وسى قولمەن ەگىلگەن بايىرعى ساۋىر ارشاسى ورمانىنىڭ وسىنشاما ۇزاق ۋاقىت جالعاسا الۋى، وسىنشاما جاقسى قورعالۋى ميڭ داۋىرىنەن باستاپ جاريالانىپ اتقارىلعان ”ءمانساپتىلار مەن حالىقتىڭ اعاش كەسۋگە ءوزارا تيىم سالۋى“، ”اعاشتى وتكىزىپ بەرىپ تاڭبانى وتكىزۋ“ سياقتى تۇزىمدەردىڭ بۇگىنگە دەيىن جالعاسىپ، سالتقا اينالۋىنىڭ ارقاسى، اسىرەسە، جەرگىلىكتى بۇقارانىڭ ۇرپاقتار بويى بىرگە قورعاۋىنىڭ ارقاسى. بۇل بىزگە مىناداي وي سالادى: ەكولوگيالىق وركەنيەت قۇرىلىسىن يگەرۋ ءۇشىن، ءسوز جوق، ءتۇزىم جۇلگەسىن ويداعىداي ورناتىپ، ءتۇزىمدى اتقارۋدى ويداعىداي يگەرۋمەن بىرگە، قالىڭ حالىق بۇقاراسىنىڭ بەلسەندىلىگىن، ىرىقتىلىعىن، جاسامپازدىعىن تولىق جۇمىلدىرىپ، جاڭا داۋىردەگى ەكولوگيالىق وركەنيەت قۇرىلىسىنىڭ جەتىستىكتەرىن بەكەمدەۋ، دامىتۋ كەرەك. اتتاناردا ول جەرگىلىكتى ورىنداعى جاۋاپتى جولداستارعا بايىرعى، ايگىلى اعاشتاردى ويداعىداي قورعاپ، جۇڭحۋانىڭ تاڭداۋلى ءداستۇرلى مادەنيەتىن ويداعىداي جالعاستىرۋدى قاداعالاي تاپسىردى.
دىياڭ قالاسى گۋاڭحان قالاسىنىڭ باتىس سولتۇستىگىندەگى يازى وزەنىنىڭ وڭتۇستىك جاعاسىنا ورنالاسقان، نەشە مىڭ جىلدىڭ الدىنداعى بايىرعى سىچۋان وركەنيەتىنىڭ كەلبەتى مەن دامۋ دەڭگەيىنە ۋاكىلدىك ەتەتىن سانشيڭدۇي ەسكى جۇرتى − سول داۋىردەگى چاڭجياڭ الابىنداعى مادەنيەت مازمۇنى ەڭ باي، كولەمى ەڭ ۇلكەن استانا ەسكى جۇرتى سانالادى. 7 - ايدىڭ 26 - كۇنى تۇستەن كەيىن شي جينپيڭ سانشيڭدۇي مۇراجايىنىڭ جاڭا سارايىنا كەلىپ، ”عاسىرلىق ارمانعا تالپىنۋ“، ”ساۋلەتتى استانا“، ”اسپان، جەر، ادام، ءتاڭىر“ سياقتى كورمەلەردى ەكسكۋرسيالاپ، سانشيڭدۇي ەسكى جۇرتىن قازۋ بارىسىمەن جانە بايىرعى سىچۋان وركەنيەتىنىڭ جەتىستىكتەرىمەن تانىستى. سانشيڭدۇي مۇراجايىنىڭ مادەنيەت مۇرالارىن قورعاۋ جانە قالپىنا كەلتىرۋ سارايىندا شي جينپيڭ مادەنيەت مۇرالارىن قورعاۋ، قالپىنا كەلتىرۋ قىزمەت اۋماعىنا كىرىپ، مادەنيەت مۇرالارىن قورعاۋ، قالپىنا كەلتىرۋ قىزمەتىنىڭ ءتارتىبىن، جاي - جاپسارىن جانە ەڭ جاڭا تەحنيكالاردى تاپتەشتەي تەكسەرىپ كورىپ، سول ورىنداعى قىزمەتكەرلەرمەن ىقىلاسپەن اڭگىمەلەستى. شي جينپيڭ بىلاي دەپ اتاپ كورسەتتى: سانشيڭدۇي ەسكى جۇرتىنىڭ ارحەولوگيالىق جەتىستىكتەرىنىڭ دۇنيە جۇزىندە اتاعى بار، ول 4000 جىلدان استام ۋاقىتتىڭ الدىنداعى وركەنيەت جەتىستىكتەرىن ايگىلەپ، جۇڭحۋا وركەنيەتىنىڭ كوپ نەگىزدى، ءبىر تۇلعالىلىعى، بايىرعى سىچۋان وركەنيەتى مەن ورتا جازىق وركەنيەتىنىڭ ءوزارا ىقپالى سياقتىلار جونىندە اناعۇرلىم پارمەندى ارحەولوگيالىق ناقتى دالەل ازىرلەپ بەردى. مادەنيەت ەسكەرتكىشتەرىن قورعاۋ، قالپىنا كەلتىرۋ − ۇزاق ۋاقىتتىق مىندەت، مەملەكەتتىڭ قولداۋ تەبىنىن زورايتىپ، دارىندىلار قوسىنى قۇرىلىسىن كۇشەيتىپ، قاتاڭ دا ىجداعاتتى ۇستا رۋحىن ساۋلەلەندىرىپ، ءبىر - بىرلەپ ىستەپ، ۇزاق ۋاقىت تاباندىلىق كورسەتىپ، ءتىپتى دە زور ناتيجەگە قول جەتكىزۋ كەرەك. شي جينپيڭ پارتيا ورتالىق كوميتەتى اتىنان سانشيڭدۇي مۇراجايى جاڭا سارايىنىڭ سالىنىپ پايدالانۋعا بەرىلگەندىگىن قىزۋ قۇتتىقتادى، قالىڭ ارحەولوگيا قىزمەتكەرلەرىنە شىن جۇرەكتەن العىس ايتتى جانە وسكەلەڭ قۇرمەت ءبىلدىردى.
7 - ايدىڭ 27 - كۇنى تۇستەن بۇرىن شي جينپيڭ سىچۋان ولكەلىك پارتكوم مەن ولكەلىك ۇكىمەتتىڭ قىزمەت مالىمەتىن تىڭداپ، سىچۋاننىڭ ءتۇرلى قىزمەتتەردە قول جەتكىزگەن ناتيجەلەرىن تۇراقتاندىردى، سىچۋاننىڭ عىلىم - تەحنيكادا جاڭالىق اشۋ مەن عىلىم - تەحنيكا جەتىستىكتەرىن كادەگە جاراتۋدى ىلگەرىلەتۋ جاعىندا بىردەي كۇش سالۋىن، وسىزاماندانعان كاسىپ سالاسى جۇيەسىن قۇرۋ جاعىندا دالمە - ءدال كۇش سالۋىن، اۋىل - قىستاقتى گۇلدەندىرۋدى ىلگەرىلەتۋ جاعىندا جاپپاي كۇش سالۋىن، چاڭجياڭ وزەنىنىڭ، حۋاڭحى وزەنىنىڭ جوعارعى اعارىنىڭ ەكولوگيالىق قالتقىسىن بەكەمدەۋ جاعىندا ۇزدىكسىز كۇش سالۋىن ءۇمىت ەتتى.
شي جينپيڭ بىلاي دەپ اتاپ كورسەتتى: عىلىم - تەحنيكادا جاڭالىق اشۋ ارقىلى دامۋدىڭ جاڭا سالاسىن، جاڭا جارىس جولىن اشۋ، دامۋدىڭ جاڭا قوزعاۋشى قۋاتىن، جاڭا باسىمدىعىن سومداۋ − ۇلكەن اۋقىم ءارى جوعارى ساپالى دامۋدىڭ كوكەي تەستى تالابى، ءسوز جوق، جاڭالىق اشۋعا، اسىرەسە، عىلىم - تەحنيكادا جاڭالىق اشۋعا سۇيەنىپ قوزعاۋشى كۇشتىڭ جاڭالانۋىن جانە قوزعاۋشى قۋاتتىڭ اۋىسۋىن جۇزەگە اسىرۋ كەرەك. سىچۋان جوعارى مەكتەپتەرى مەن عىلمي زەرتتەۋ قۇرىلىمدارى مول بولۋ، جاسامپاز دارىندىلار شوعىرلانۋ باسىمدىعىن جانە كاسىپ سالاسى جۇيەسى ءبىرشاما كەمەلدى، كاسىپ سالاسى نەگىزى مىعىم بولۋ باسىمدىعىن ساۋلەلەندىرىپ، عىلىم - تەحنيكادا جاڭالىق اشۋعا جانە عىلىم - تەحنيكا جەتىستىكتەرىن كادەگە جاراتۋعا بىردەي كۇش سالۋى كەرەك. عىلىم - تەحنيكادا جاڭالىق اشۋ جۇيەسىن كەمەلدەندىرىپ، مەملەكەتتىڭ ستراتەگيالىق عىلىم - تەحنيكا كۇشىمەن جانە بايلىعىمەن بەلسەنە ءتۇيىلىسىپ، جاڭالىق اشۋ بايلىعىنىڭ ورنالاسىمىن ساپالىلاندىرىپ، كەمەلدەندىرىپ، ءبىر توپ شەشۋشى، وزەكتى تەحنيكالاردان قۇلشىنا قامال الىپ، باتىس بولىك ءوڭىرىنىڭ جاڭالىق اشۋ بيىگىن قۇلشىنا تۇلعالاۋ كەرەك.
شي جينپيڭ بىلاي دەپ باسا دارىپتەدى: سىچۋان ەلىمىزدىڭ دامۋىنداعى ستراتەگيالىق ىشكى ءوڭىر، مەملەكەتتىڭ دامۋ كەلەلى جاعدايىندا، اسىرەسە، باتىس بولىكتى قاۋىرت اشۋ ستراتەگياسىن اتقارۋدا وزگەشە ءارى ماڭىزدى ورىنعا يە. جاساۋ كاسىبىنىڭ وزگەشە باسىمدىعىنا سۇيەنىپ، مەملەكەتتىڭ كاسىپ سالاسى تىزبەگىنىڭ، قامداۋ تىزبەگىنىڭ حاۋىپسىزدىگىنە بەلسەنە قىزمەت وتەپ، شىعىس بولىك تەڭىز جاعالاۋى وڭىرلەرىندەگى كاسىپ سالاسىنىڭ جاڭا ورنالاسىمىمەن جوعارى ساپالى ءتۇيىلىسۋى كەرەك. ەرەكشەلىككە يە، باسىمدىققا يە كاسىپ سالالارى مەن ستراتەگيالىق جاڭادان گۇلدەنگەن كاسىپ سالالارىن دامىتۋدى نەگىزگى قامال الۋ بەتالىسى ەتىپ، ءداستۇرلى كاسىپ سالالارىن جاڭالاۋدى، دەڭگەيىن جوعارىلاتۋدى جەدەلدەتىپ، بولاشاق كاسىپ سالالارىن كورەگەندىكپەن ورنالاستىرىپ، سيفرلى ەكونوميكا مەن تۇلعالىق ەكونوميكانىڭ تەرەڭ توعىسۋىن جەبەپ، سىچۋاندىق ەرەكشەلىك پەن باسىمدىققا باي وسىزاماندانعان كاسىپ سالاسى جۇيەسىن قۇرۋ كەرەك. جاڭاشا ەنەرگيا جۇيەسىن عىلمي جوبالاپ، قۇرىپ، سۋ، جەل، كۇن نۇرى، سۋتەگى، تابيعي گاز سياقتى كوپ ەنەرگيالاردىڭ ءبىرىن - ءبىرى تولىقتاپ دامۋىن جەبەۋ كەرەك. استىق جانە ستراتەگيالىق كەن ونىمدەرى بايلىعى سياقتىلاردى ءوندىرۋدى، ونىمەن قامداۋدى كۇشەيتىپ، مەملەكەتتىڭ ماڭىزدى العاشقى ساتىداعى ونىمدەرمەن قامداۋدى قامتاماسىز ەتەتىن ستراتەگيالىق بازاسىن تۇلعالاۋ كەرەك. ”سىچۋان مەن چۇڭچيڭ ءبىر تۇتاس جۇيە“ دەگەنگە تاباندى بولىپ، چىڭدۋ − چۇڭچيڭ ءوڭىرىنىڭ سايكەسە دامۋىن كۇشەيتىپ، باتىسقا ەسىك اشۋدىڭ ستراتەگيالىق بيىگى مەن حالىقارالىق باسەكەگە قاتىناسۋدىڭ جاڭا بازاسىن قۇرىپ، باتىس بولىكتىڭ جوعارى ساپالى دامۋىن جەبەيتىن ماڭىزدى ارتۋ ۇيەگىنە جانە جاڭا قوزعاۋشى كۇش قاينارىنا تەزىرەك اينالۋ كەرەك.
شي جينپيڭ بىلاي دەپ اتاپ كورسەتتى: كەدەيلىكتەن ارىلتۋدان قامال الۋ جەتىستىگىن بەكەمدەپ، اۋىل - قىستاقتى گۇلدەندىرۋدى سىچۋاندى باسقارۋدىڭ، سىچۋاندى گۇلدەندىرۋدىڭ كورنەكتى ورنىنا قويىپ، استىق، ءتىرى شوشقا، مايلى داقىل سياقتى ماڭىزدى اۋىل شارۋاشىلىق ونىمدەرىن ورنىقتى ءوندىرۋ، ونىمەن قامداۋعا كەپىلدىك ەتۋ جاۋاپكەرشىلىگىن اناعۇرلىم ويداعىداي ارقالاۋ كەرەك. تۇقىم جانە ەگىستىك جەر سىندى ەكى ماڭىزدى ءتۇيىندى مىقتاپ يگەرىپ، ساپالى تۇقىم مەن قۇنارلى اتىزدى سايكەستىرۋدى كۇشەيتىپ، جاڭا داۋىردەگى اناعۇرلىم جوعارى دەڭگەيدەگى ”ىرىستى القاپ استىق قامباسىن“ تۇلعالاۋ كەرەك. كاسىپ سالاسىن دامىتۋ، اۋىل - قىستاق قۇرىلىسى، اۋىل - قىستاقتى باسقارۋ سياقتى جاقتاردا نازاردى بۇقارانىڭ اڭىسى كۇشتى بولعان، يگەرۋگە بولاتىن، بىرنەشە جىل يگەرسە - اق ءونىمى كورىنەتىن بىرنەشە ىسكە شوعىرلاندىرىپ، بايلىقتى شوعىرلاندىرىپ، سەرپىلىس جاساۋدى جەدەلدەتىپ، بەلگى سيپاتتى جەتىستىك قالىپتاستىرۋ كەرەك. جىجياڭنىڭ ”مىڭ قىستاق ۇلگى كورسەتۋ، 10 مىڭ قىستاقتى رەتتەۋ - وڭاۋ ينجەنەرياسى“ تاجىريبەسىنەن ۇيرەنىپ، قولدانىپ، نازاردى كىشكەنە كىرىسۋ تۇيىندەرىنە شوعىرلاندىرىپ، قاجىماي - تالماي، ۇزاق ۋاقىت قۇلشىنۋ كەرەك. اۋىل - قىستاق ۇيلىك جەر رەفورماسىندا تومەنگى شەكتى ساقتاۋ كەرەك. جەردى اينالىمعا سالۋ وتكەلىن مىقتى يگەرۋ كەرەك، اينالىمعا سالۋ ورايىنان پايدالانىپ ”اۋىل شارۋاشىلىعىنان باسقا ىستەرگە“ ىستەتۋگە بولمايدى. قوعامدىق قامتاماسىزداندىرۋ جۇيەسى بويىنشا قالا مەن اۋىلدى ءبىر تۇتاس جوسپارلاۋدى كۇشەيتىپ، نەگىزگى الەۋمەتتىك قىزمەت وتەۋدىڭ قالا مەن اۋىلدا بىركەلكىلەنۋىن ىلگەرىلەتۋ كەرەك.
شي جينپيڭ بىلاي دەپ باسا دارىپتەدى: سىچۋان − چاڭجياڭ وزەنىنىڭ جوعارعى اعارىنداعى ماڭىزدى سۋ قاينارى ساقتالعان جەر، حۋاڭحى وزەنىنىڭ جوعارعى اعارىنداعى ماڭىزدى سۋ قاينارىمەن تولىقتايتىن ءوڭىر ءارى جەر شارىنداعى ورگانيزمدەردىڭ الۋان تۇرلىلىگىن قورعاۋداعى ءتۇيىندى ءوڭىر، سوندىقتان ەكولوگيالىق وركەنيەت قۇرىلىسى سىندى وسى كەلەلى ءىستى ويداعىداي ىستەۋ كەرەك. تاۋ، سۋ، ورمان، اتىز، كول، جايلىم، قۇمدى ءبىر تۇلعالى قورعاۋعا جانە جۇيەلى وڭاۋعا تاباندى بولىپ، مەملەكەت جەرى كەڭىستىگىن باسقارۋدى، مەڭگەرۋدى جانە ۇنامسىز تىزىمدىك بويىنشا باسقارۋدى كۇشەيتىپ، جاراتىلىستىق قورىقتى، ەكولوگيانى قورعاۋدىڭ قىزىل سىزىعىن باقىلاۋ - باسقارۋ ءتۇزىمىن قاتاڭ تياناقتاندىرۋ كەرەك. مەملەكەتتىك باقشانى نەگىزگى تۇلعا ەتكەن جاراتىلىستىق قورىق جۇيەسىن جەدەل قۇرۋ كەرەك. جايلىمدى، ورماندى، وزەندى، كولدى، سازدىقتى تىنىقتىرۋدى جۇزەگە اسىرۋ كەرەك. كاسىپ سالاسى قۇرىلىمىن، ەنەرگيا قۇرىلىمىن، قاتىناس - تاسىمال قۇرىلىمىن، جەردەن پايدالانۋ قۇرىلىمىن رەتتەۋدى، ساپالىلاندىرۋدى جەدەلدەتىپ، بايلىقتان شوعىرلى، ۇنەمدى پايدالانۋدى ىلگەرىلەتىپ، جاسىل، تومەن كومىر قىشقىل گازدى ءوندىرىس، تۇرمىس ءتاسىلىن بەلسەنە دارىپتەۋ كەرەك. كوك اسپاندى، تۇنىق سۋدى، تازا توپىراقتى قورعاۋ شايقاسىن اناعۇرلىم جوعارى ولشەممەن ويداعىداي جۇرگىزىپ، ەكولوگيالىق ونىمدەردىڭ قۇنىن جۇزەگە اسىرۋ مەحانيزمىن بەلسەنە قاراستىرىپ، ەكولوگيانى قورعاۋ تولەمى مەحانيزمىن كەمەلدەندىرىپ، ەكولوگيالىق ورتانى وڭاۋدىڭ وسىزاماندانۋ دەڭگەيىن جوعارىلاتۋ كەرەك.
شي جينپيڭ بىلاي دەپ اتاپ كورسەتتى: سىچۋان − جاراتىلىستىق اپات كوپ تۋىلاتىن جەر، شۇعىل جاعدايعا توتەپ بەرۋدى باسقارۋ جۇيەسىن اقاۋسىزداندىرىپ، شۇعىل جاعدايعا توتەپ بەرۋ قۋاتى قۇرىلىسىن كۇشەيتىپ، ۇزاق ءونىمدى مەحانيزم قالىپتاستىرىپ، اپاتتان ساقتانۋ، اپات زيانىن ازايتۋ، اپاتتان قۇتقارۋ قابىلەتىن جۇيەلى جوعارىلاتۋ كەرەك. 7 -، 8 - ايلاردا چاڭجياڭ وزەنى الابى نەگىزگى تاسقىن مەزگىلىنە كىرەدى، تاسقىننان ساقتانىپ، اپاتتان قۇتقارۋ تۇلعالىق جاۋاپكەرشىلىگىن جاپپاي تياناقتاندىرىپ، تاسقىننان ساقتانۋ، تاسقىنعا قارسى اتتانۋ، اپاتتان قۇتقارۋ سىندى ءتۇرلى توتەپ بەرۋ، دايىندىق قىزمەتىن ويداعىداي ىستەۋ كەرەك. اپاتتان عىلمي قۇتقارىپ، قوسالقى اپاتتاردىڭ تۋىلۋىنان ساقتانىپ، ادامداردىڭ جارالانۋىن، ءولىم - ءجىتىمىن جانە مال - مۇلىك زيانىن بارىنشا ازايتىپ، قالىپتى ءوندىرىس - تۇرمىس ءتارتىبىن تەز قالپىنا كەلتىرۋ كەرەك. ءوندىرىس حاۋىپسىزدىگى جاۋاپكەرشىلىك ءتۇزىمىن ناقتى، ەگجەي - تەگجەيلى تياناقتاندىرىپ، ءوندىرىس حاۋىپسىزدىگىندەگى كومەسكى اپاتتاردى جاپپاي ءبىر - بىرلەپ تەكسەرىپ، اۋىر، ەرەكشە ۇلكەن ءوندىرىس حاۋىپسىزدىگى شىرعالاڭدارىنىڭ تۋىلۋىنان باتىل ساقتانىپ جانە ونى تەجەپ، حالىقتىڭ ءومىرى مەن مال - مۇلكىنىڭ حاۋىپسىزدىگىن شىنايى قامتاماسىز ەتۋ كەرەك.
شي جينپيڭ بىلاي دەپ باسا دارىپتەدى: 1 - توپتاعى نەگىزگى تاقىرىپتىق تاربيەنىڭ اياقتالۋىنا ءبىر ايدان استام ۋاقىت قانا قالدى، ءار دارەجەلى پارتيا ۇيىمدارى پارتيا ورتالىق كوميتەتىنىڭ ورنالاستىرۋىن تياناقتاندىرىپ، ءساتتى باستاپ، ءساتتى اياقتاتىپ، باستان - اياق ۇستامدى بولىپ، ناقتى ونىمدىلىككە تالپىنۋى كەرەك. نەگىزگى تاقىرىپتىق تاربيەنىڭ ناقتى ونىمدىلىگىن عىلمي، وبيەكتيۆ ساراپتاۋ كەرەك. نازاريا ۇيرەنۋدىڭ ونىمدىلىگىن سىننان وتكىزۋدە پارتيانىڭ جاسامپاز نازارياسىنىڭ كوكەيگە قونىمدى بولعان - بولماعاندىعىنا، ارەكەتتە بەينەلەنگەن - بەينەلەنبەگەندىگىنە، پارتيا مۇشەلەرىنىڭ، كادرلاردىڭ وي جۇگىرتۋگە، قولدانۋعا شەبەر بولعان - بولماعاندىعىنا قاراۋ كەرەك؛ تەكسەرىپ - زەرتتەۋدىڭ ونىمدىلىگىن سىننان وتكىزۋدە قوعام جاعدايىن، حالىق رايىن انىق بىلگەن - بىلمەگەندىگىنە، ءىس جۇزىندىك ماسەلەلەردى شەشكەن - شەشپەگەندىگىنە قاراۋ كەرەك؛ دامۋدى ىلگەرىلەتۋدىڭ ونىمدىلىگىن سىننان وتكىزۋدە جوعارى ساپالى دامۋدا تىڭ سەرپىلىس بولعان - بولماعاندىعىنا، حالىقتىڭ تۇرمىس ساپاسىندا تىڭ ءوسۋ بولعان - بولماعاندىعىنا قاراۋ كەرەك؛ قاداعالاۋ، رەتتەۋ - تۇزەتۋدىڭ ونىمدىلىگىن سىننان وتكىزۋدە ماسەلەنىڭ ءتۇيىنىن ءداپ باسىپ تابا العان - الماعاندىعىنا، رەتتەۋ - تۇزەتۋدىڭ، رەتتەۋ - وڭاۋدىڭ تىڭعىلىقتى بولعان - بولماعاندىعىنا قاراۋ كەرەك؛ كادرلار قوسىنىن تاربيەلەۋ، رەتتەۋ ونىمدىلىگىن سىننان وتكىزۋدە يدەيانىڭ، ۇيىمنىڭ كىرشىكسىز بولماۋ قۇبىلىسىنىڭ تۇزەتىلگەن - تۇزەتىلمەگەندىگىنە، ساياسي كومەسكى قاتەردىڭ جويىلعان - جويىلماعاندىعىنا قاراۋ كەرەك. ونىمدىلىكتى ساراپتاۋدا فاكت ارقىلى سويلەپ، ساراپتاۋدى اشىق يگەرىپ، بۇقارانىڭ باعالاۋىنا مۇمكىندىك بەرىپ، ساراپتاۋدىڭ وبيەكتيۆ، شىنايى بولۋىنا شىنايى كەپىلدىك ەتۋ كەرەك. نەگىزگى تاقىرىپتىق تاربيەنىڭ ونىمدىلىگىن ساراپتاۋدىڭ وتە ماڭىزدى ءبىر جاعى − فورماشىلدىقتىڭ، تورەشىلدىكتىڭ ءونىمدى جويىلعان - جويىلماعاندىعىنا قاراۋ، فورماشىلدىققا، تورەشىلدىككە ءتان نارسەلەرگە ءبىر رەت تەكسەرۋ جۇرگىزىپ، ءتۇپ قاينارىنا تالداۋ جاساپ، اۋرۋىنا قاراي ءدارى بەرىپ، شىن مانىندە ناقتى ونىمدىلىككە جەتۋ كەرەك. باسشىلىق القاسىنىڭ ارناۋلى تاقىرىپتىق دەموكراتيالىق تۇرمىس جيىنى مەن نەگىزگى ساتى پارتيا ۇيىمدارىنىڭ ۇيىمدىق تۇرمىس جيىنىن ويداعىداي اشىپ، ۇيرەنۋمەن، تەكسەرۋمەن، تۇزەتۋمەن ۇشتاستىرىپ، سىن جانە ءوز - وزىنە سىن ورىستەتۋ كەرەك.
شي جينپيڭ حانجياڭ وزەنى الابىنىڭ تاريحي مادەنيەتىن جالعاستىرۋعا جانە ەكولوگياسىن قورعاۋعا ايرىقشا كوڭىل ءبولدى. 7 - ايدىڭ 29 - كۇنى بەيجيڭگە قايتار جولىندا شي جينپيڭ پويەزدەن ءتۇسىپ، شانشي ولكەلىك پارتكومنىڭ شۋجيى جاۋ يدىنىڭ، ولكە باستىعى جاۋ گاڭنىڭ سەرىك بولۋىندا حانجۇڭ قالاسىنا كەلىپ قىزمەت تەكسەردى. شي جينپيڭ حانجۇڭ قالالىق مۇراجايدىڭ قاتىستى تاريحي مادەني ەسكەرتكىشتەر كورمەسىن ەكسكۋرسيالاپ، حانجۇڭنىڭ تاريحي مادەنيەتىمەن، مادەني ەسكەرتكىشتەردىڭ قورعالۋ جاعدايىمەن تانىستى. ول بىلاي دەپ اتاپ كورسەتتى: مادەني ەسكەرتكىشتەرگە شۇعىلالى وركەنيەت جيناقتالعان، ول تاريحي مادەنيەتتى جالعاستىرىپ، ۇلت رۋحىن ۇلاستىرادى. مۇراجايدىڭ ادامزات وركەنيەتىن قورعاۋداعى، جالعاستىرۋداعى، زەرتتەۋدەگى، ايگىلەۋدەگى ماڭىزدى رولىن ويداعىداي ساۋلەلەندىرىپ، جۇڭحۋانىڭ مادەنيەت تامىرىن ويداعىداي قورعاۋ ءارى مادەني ەسكەرتكىشتەردى جانداندىرىپ، جۇڭحۋا مادەنيەتىنىڭ ىقپال كۇشىن كەڭەيتۋ كەرەك. حانجۇڭنىڭ بامبۋك ساباعى توقىماسى سياقتى بەيزاتتىق مادەني مۇرالارى ۇزاق ۋاقىتتان بەرى ايگىلى بولىپ كەلەدى. ەرەكشە كاسىپ سالاسىن دامىتىپ، زورايتىپ، بۇقارانىڭ كىرىسىن ارتتىرىپ بايۋىنا اناعۇرلىم ويداعىداي باستاماشىلدىق ەتۋ كەرەك. مۇراجايدان اتتاناردا جاقىن ماڭداعى اۋىلداستار قاۋمالاي كەلىپ، ”باس شۋجي، سالەمەتسىز بە“ دەپ قىزۋ ىنتامەن الاقايلاستى. شي جينپيڭ كوپشىلىككە ىقىلاسپەن بىلاي دەدى: 2008 - جىلى ۋىنچۋانداعى جەر سىلكىنىسىندە جەر سىلكىنىسىنە قارسى اتتانىپ، اپاتتان قۇتقارۋ كەزىندە حانجۇڭعا كەلگەنمىن، وسىناۋ جىلداردا بۇل ارانى كوكەيىمنەن شىعارعان ەمەسپىن. وسى رەت بۇل ارانىڭ دامۋىنىڭ، وزگەرىسىنىڭ زور ەكەنىن، قالانىڭ وتە رەتتى ەكەنىن كورىپ قاتتى قۋاندىم. ول كوپشىلىكتىڭ قىزمەتىنىڭ تابىستى، تۇرمىسىنىڭ جاقسى، وتباسىنىڭ باقىتتى بولۋىن تىلەدى.
جولدا شي جينپيڭ حانجياڭ وزەنىنىڭ حانجۇڭ قالا رايونىنان وتەتىن بولىگىندەگى تيانحان سازدىق باقشاسىن تەكسەرىپ، بۇل ارانى قالا تۇرعىندارىنىڭ ”باقىت باقشاسى“ دەپ القادى. شي جينپيڭ بىلاي دەپ باسا دارىپتەدى: حانجياڭ وزەنى مەن ونىڭ سالالارى وڭتۇستىكتىڭ سۋىن سولتۇستىككە جەتكىزۋ ورتا جەلىسى ينجەنەرياسىنىڭ نەگىزگى سۋ قاينارى شوعىرلانعان ءوڭىر جانە قامداۋ ءوڭىرى سانالادى، وسى ءوڭىردىڭ سازدىق بايلىعىن ويداعىداي قورعاۋدىڭ جاۋاپكەرشىلىگى اۋىر، ءمانى تەرەڭ. ەكولوگيالىق باقشا قۇرىلىسىندا تابيعاتقا سايكەسىپ، سازدىق ەكولوگيالىق جۇيەسىن تۇتاس تۇلعالىق جاقتان قورعاۋدى جانە جۇيەلى قالپىنا كەلتىرۋدى كۇشەيتىپ، ەكولوگيانى قورعاۋدىڭ وندىرىسپەن، تۇرمىسپەن ءوزارا توعىسۋىن جەبەپ، ورتاسى كوركەم، جاسىل، تومەن كومىر قىشقىل گازدى، قونىستانۋعا جايلى، ساياحاتتاۋعا قولايلى ەكولوگيالىق قالا قۇرۋعا قۇلشىنۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي تەكسەرۋدە بىرگە بولدى.
لي گانجيە، حى ليفىڭ جانە ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار قىزمەت تەكسەرۋدە بىرگە بولدى، نەگىزگى تاقىرىپتىق تاربيە ورتالىق 12 - جەتەكشىلىك ەتۋ گرۋپپاسىنداعى جاۋاپتى جولداستار مالىمەت بەرۋ ماجىلىسىنە قاتىناستى.