انار بۇلت \ شينجياڭ گازەتىنىڭ ءتىلشىسى حي حۇڭۋي 9 - ايدىڭ 4 - كۇنى تاشكەنتتەن حابارلايدى. 9 - ايدىڭ 4 - كۇنى 2023 - جىلعى (12 - كەزەكتى) وزبەكستان − جۇڭگو شينجياڭ تاۋار كورمەسى (تومەندە قىسقارتىلىپ ”وزبەكستان كورمەسى“ دەلىنەدى) وزبەكستاننىڭ استاناسى تاشكەنتتە اشىلدى.
اشىلۋ سالتىندا وزبەكستان اۋىل شارۋاشىلىق مينيسترلىگىنىڭ ورىنباسار مينيسترى كاحرامون يولداشيەۆ وزبەكستاننىڭ ورىنباسار زۇڭليى جامشيد قوجايەۆتىڭ قۇتتىقتاۋ حاتىن وقىدى. قۇتتىقتاۋ حاتىندا مىنالار اتاپ كورسەتىلدى: جۇڭگو − وزبەكستاننىڭ نەگىزگى ەكونوميكا - ساۋدا سەلبەستىك سەرىكتەرىنىڭ ءبىرى، وزبەكستان مەن جۇڭگو ماڭىزدى ستراتەگيالىق سەرىكتەر، ەكى جاق تەڭ تۇرعىدا ءوزارا پايدا جەتكىزۋ، ءوزارا قۇرمەت ەتىپ، تاتۋ كورشى، دوس بولىپ، ءوزارا تيىمدىلىك جاساپ، تەڭ يگىلىككە كەنەلۋ رۋحى بويىنشا قارىم - قاتىناستى دامىتتى، ەكى جاقتى قارىم - قاتىناس كۇن سايىن تولىسىپ، ورنىقتى بولىپ، ەكى جاقتى ساۋدا تەز قارقىنمەن ارتتى. وزبەكستان كورمەسى قازىرگە دەيىن 11 كەزەك ءساتتى وتكىزىلىپ، ىقپالى كەڭ بولدى. جۇڭگو كاسىپورىنشىلارىنىڭ وسى رەتكى كورمە - ءماجىلىستى وراي ەتىپ، قارجى قوسىپ، ىرگە تەبۋ، ءوزارا تيىمدىلىك جاساۋ نىساندارىنا كەلىسۋىن ءۇمىت ەتەمىن، وزبەكستان جاق جۇڭگو كاسىپورىندارىنىڭ وزبەكستاندا دامۋىنا بارلىق قاجەتتى قولداۋلاردى كورسەتەدى.
اۆتونوميالى رايوندىق پارتكومنىڭ تۇراقتى مۇشەسى، اۆتونوميالى رايوننىڭ ورىنباسار ءتوراعاسى ءيۇسۇپجان مامەت اشىلۋ سالتىنا قاتىناستى ءارى اۆتونوميالى رايوندىق پارتكوم مەن ۇكىمەت اتىنان جۇڭگولىق، شەتەلدىك سيلى قوناقتاردى قارسى الاتىندىعىن ءبىلدىردى. ول بىلاي دەدى: ”ءبىر بەلدەۋ، ءبىر جولدى“ بىرگە قۇرعان 10 جىلدان بەرى جۇڭگونىڭ شينجياڭى وزبەكستانمەن بىرگە قۇلشىنىپ، ەكى ەل باسشىلارى كەلىسكەن ورتاق تانىمدى تياناقتاندىرىپ، ەكى جاق حالقىنا ناقتى پايدا جەتكىزدى. بولاشاقتا جۇڭگونىڭ شينجياڭى وزبەكستاننىڭ جەرگىلىكتى ورىندارىمەن ارا دوستىق بارىس - كەلىستى ۇزدىكسىز كەڭەيتىپ، ساۋدا، قارجى قوسۋ، قاتىناس، ەنەرگيا، نەگىزدىك قۇرىلعى، عىلىم - تەحنيكا، وقۋ - اعارتۋ، گۋمانيتارلىق ىستەر سياقتى سالالارداعى سەلبەستىكتى ۇزدىكسىز تەرەڭدەتىپ، جاڭا داۋىردەگى جۇڭگو − وزبەكستان ەكونوميكا - ساۋدا سەلبەستىگىنىڭ جاڭا ارناسىن بىرگە تۇلعالاپ، ”ءبىر بەلدەۋ، ءبىر جولدى“ بىرگە قۇرۋدىڭ جوعارى ساپالى دامۋىن ىلگەرىلەتۋگە تىڭ دا بەلسەندى ۇلەس قوسادى.
اشىلۋ سالتى اياقتاعاننان كەيىن تاعى جۇڭگو شينجياڭ − وزبەكستان كاسىپورىندارىنىڭ ەكونوميكا - ساۋدا اۋىس - كۇيىس ءماجىلىسى وتكىزىلدى، شينجياڭ ساۋدانى ىلگەرىلەتۋ قوعامى، جۇڭگو شينجياڭ ساۋدا - زات اينالىمى (توبى) شەكتى سەرىكتەستىگى قاتارلىلار وزبەكستان جاقپەن كەلىسىم جاساستى.