”ساۋلىقتى قوسىپ، قوزىنى قايتارىپ الۋ“ باعىمشىلىق جاڭا ۇلگىسى باستالدى
□ انار بۇلت \ شينجياڭ گازەتىنىڭ ءتىلشىسى دۋ جيانحۇي
8 - ايدىڭ 10 - كۇنى بايىنعولين موڭعۇل اۆتونوميالى وبلىسىنىڭ سويىس قوي كاسىپ سالاسىنىڭ ”ساۋلىقتى قوسىپ، قوزىنى قايتارىپ الۋ“ باعىمشىلىق ۇلگىسىنىڭ باستالۋ سالتى باعراش اۋدانىنداعى شينجياڭ شيڭمۋيۋان اۋىل شارۋاشىلىعى شەكتى جاۋاپكەرشىلىك سەرىكتەستىگىندە (تومەندە قىسقارتىلىپ ”شيڭمۋيۋان“ سەرىكتەستىگى دەلىنەدى) وتكىزىلدى. سول كۇنى حوشۇت اۋدانى بۋيىن باعىمشىلىق شارۋالار كاسىپتىك سەلبەستىك كووپەراتيۆىنىڭ تەحنيكاعا جاۋاپتىسى ليۋ يۇيپيڭ قۋانا بۇل اراداعى ”ساۋلىقتى قوسىپ، قوزىنى قايتارىپ الاتىن“ 104 حۋياڭ قويىن كووپەراتيۆكە باعۋعا اكەلدى.
”ساۋلىقتى قوسىپ، قوزىنى قايتارىپ الۋ“ − بايىنعولين وبلىسىنىڭ سويىس قوي كاسىپ سالاسىنىڭ دامۋىن جەدەل ىلگەرىلەتىپ، ەگىن شارۋاشىلىعى ءوڭىرىنىڭ سويىس قوي كاسىپ سالاسىنداعى بوگەتتەردى تالقانداۋداعى جاڭا ۇلگى.
بيىل 3 - ايدا بايىنعولين وبلىسى جياڭسۋ ولكەسىنىڭ يانچىڭ قالاسىنان 10 مىڭ حۋياڭ ءناسىلدى قويىن ەنگىزىپ، شيڭمۋيۋان سەرىكتەستىگىن تياناق ەتىپ حۋياڭ ءناسىلدى قوي بازاسىن قۇرىپ، باعىمشىلىقتى دامىتۋ ويى بار شارۋا وتباسىلارىن ءناسىلدى قويمەن جانە تەحنيكالىق قىزمەت وتەۋمەن قامداپ، شارۋا وتباسىلارىن ورتا، شاعىن كولەمدى باعىمشىلىقتى دامىتۋعا جەتەكتەپ، ەگجەي - تەگجەيلى باسقارۋدى اتقارىپ، شارۋا وتباسىلارىن ءونىمدى ارتتىرىپ، كىرىستى جوعارىلاتۋعا باستادى.
بايىنعولين وبلىسى ەنگىزگەن حۋياڭ ءناسىلدى قويى كوپ ءتولدى گەنگە يە، جەرگىلىكتى ورىن جاساندى جولمەن ۇرىقتاندىرۋ سياقتى تەحنيكالار ارقىلى ونىڭ كوپ ءتولدى گەنىنەن پايدالانىپ ساپ تۇقىمدى كوبەيتۋ جانە بۋدانداستىرۋ سىناعىن جاسادى، ءاربىر قوي جىلىنا، از دەگەندە، 2 قوزى تولدەيدى، 2 جىلدا 6 قوزى تولدەيدى.
”تولدەۋ مولشەرى جوعارى بولسا، كىرىس تە جوعارى بولادى“. بايىنعولين وبلىستىق مال شارۋاشىلىعى قىزمەت پۋنكتىنىڭ ورىنباسار باستىعى، اۋىل شارۋاشىلىعىن جالپىلاستىرۋ اعا زەرتتەۋشىسى زورك بىلاي دەدى: ”ءبىز ءناسىل قاينارىنان سويىس قوي كاسىپ سالاسىن كولەمدەندىرۋ، ولشەمدەندىرۋ، زەردەلىلەندىرۋ دەڭگەيىن ىلگەرىلەتىپ، 1 -، 2 -، 3 - كاسىپتىڭ توعىسا دامۋىن جۇزەگە اسىردىق“.
شيڭمۋيۋان سەرىكتەستىگى ءناسىلدى سويىس قويدى ءوسىرۋدى، جالپىلاستىرۋدى نەگىز ەتكەن ساپ تۇقىمدى كوبەيتۋ فەرماسى، بايىنعولين وبلىستىق مال شارۋاشىلىعى، مال شيپاگەرلىگى مەكەمەسى مۇنى ”ساۋلىقتى قوسىپ، قوزىنى قايتارىپ الۋ“ باعىمشىلىق ۇلگىسىنەن ۇلگى كورسەتۋ كاسىپورنى ەتىپ، بۇل كاسىپورىندى تۇتاس بارىستىق تەحنيكامەن، ۇيرەتۋ قىزمەت وتەۋىمەن قامداپ، باعىمشىلىق ۇلگىسىنىڭ ەرتەرەك تياناقتانۋىن، ەرتەرەك ونىمدىلىك كورسەتۋىن كۇش سالا جەبەدى.
”قازىر 2124 ساۋلىق 3604 قوزى تولدەدى. 1 - توپتاعى تولدەۋ مولشەرى مەن قاتارعا قوسىلۋ مولشەرىنەن قاراعاندا، باعىمشىلىقتى باسقارۋ تاجىريبەلەرىنىڭ، تەحنيكالارىنىڭ تولىسۋىنا ىلەسە، 2 جىلدا 6 قوزى تولدەۋ ماسەلە ەمەس“، - دەدى شيڭمۋيۋان سەرىكتەستىگى حۋياڭ قويى باعىمشىلىق فەرماسىنىڭ جاۋاپتىسى جاڭ ۋي سەنىممەن.
”ساۋلىقتى قوسىپ، قوزىنى قايتارىپ الۋ“ باعىمشىلىق ۇلگىسىن ناقتى قالاي اتقارۋ كەرەك؟ زورك بىلاي دەدى: شيڭمۋيۋان سەرىكتەستىگى شارۋا وتباسىلارىمەن باعىمشىلىق، ساتىپ الۋ كەلىسىمىنە قول قويىسىپ، ”4 +100“ فورمامەن (100 نەگىزدىك ساۋلىق قوي، 4 ءناسىلدى قوشقار) شارۋا وتباسىلارىن تەگىن ءناسىلدى قويمەن قامداپ، تولدەگەن قوزىنى شارۋا وتباسىلارى 45 كۇن باققاندا نەمەسە 18 كيلوگرامعا تولعاندا، شيڭمۋيۋان سەرىكتەستىگى ءبىر تۇتاس جيناپ الادى.
شارۋا وتباسىلارىنىڭ باعىمشىلىقپەن الاڭسىز شۇعىلدانىپ، ۋايىمنان ارىلۋى ءۇشىن، شيڭمۋيۋان سەرىكتەستىگى شارۋا وتباسىلارىن ”كۇتۋشى ۇلگىسىندەگى“ قىزمەت وتەۋمەن قامداپ، ءبىر تۇتاس ءناسىل، جەم - ءشوپ ازىرلەۋ ءتاسىلى، ىندەتتەن ساقتانۋ، تەحنيكالىق قىزمەت وتەۋ، قامسىزداندىرۋ، قايتارىپ ساتىپ الۋ سىندى التى ءبىر تۇتاس مال شارۋاشىلىق كاسىبى شوعىرلانعان تەحنيكاسىن جالپىلاستىردى، قولداندى؛ قوزىنى تومەنگى باعامەن بەلگىلەپ ءبىر تۇتاس ساتىپ الدى.
”شيڭمۋيۋان سەرىكتەستىگى جاقسى باستاما باستاپ، باعىمشىلىقتى دامىتۋ ويى بار شارۋا وتباسىلارىنىڭ دامۋ بولاشاعىن كورۋىنە مۇمكىندىك جاسادى“، - دەدى زورك.
بايىنعولين وبلىستىق مال شارۋاشىلىعى، مال شيپاگەرلىگى مەكەمەسى پارتيا باسشىلىق گرۋپپاسىنىڭ شۋجيى، ورىنباسار مەكەمە باستىعى جاڭ يۇڭ مىنالاردى ءبىلدىردى: ”ساۋلىقتى قوسىپ، قوزىنى قايتارىپ الۋ“ باعىمشىلىق ۇلگىسى شارۋالاردىڭ كىرىسىن ارتتىرۋىنا شارت - جاعداي ازىرلەپ، ولاردى سويىس قوي كاسىپ سالاسى تىزبەگىنىڭ كاسىپ سالاسى جۇمىسشىسىنا اينالدىردى. بۇدان كەيىن مال شارۋاشىلىق ءتۇرىن ساپالىلاندىرۋ مەن شارۋالاردىڭ كىرىسىن ارتتىرۋدى تىعىز ۇشتاستىرىپ، بايىنعولين وبلىسى مال شارۋاشىلىعىنىڭ جوعارى ساپالى دامۋىن ىلگەرىلەتەمىز.