جۇڭگو مۇگەدەكتەر بىرلەستىگىنىڭ مەملەكەتتىك 8 - قۇرىلتايى بەيجيڭدە اشىلدى

　　شي جينپيڭ، لي چياڭ، جاۋ لىجي، ۋاڭ حۋنيڭ، ساي چي قۇرىلتايعا بارىپ قۇتتىقتادى، ديڭ شۋەشياڭ پارتيا ورتالىق كوميتەتى، مەملەكەتتىك كەڭەس اتىنان ارناۋ ءسوز سويلەدى

　　9 - ايدىڭ 18 - كۇنى جۇڭگو مۇگەدەكتەر بىرلەستىگىنىڭ مەملەكەتتىك 8 - قۇرىلتايى بەيجيڭ حالىق سارايىندا اشىلدى. سۋرەتتە: جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ءتوراعالار مىنبەسىندە قۇرىلتايعا قاتىناسقان ۋاكىلدەرگە قۇرمەت بىلدىرۋدە.

　　□ سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

　　9 - ايدىڭ 18 - كۇنى جۇڭگو مۇگەدەكتەر بىرلەستىگىنىڭ مەملەكەتتىك 8 - قۇرىلتايى بەيجيڭ حالىق سارايىندا اشىلدى. شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ قاتارلىلار ءتوراعالار مىنبەسىنەن ورىن الىپ، قۇرىلتايدىڭ اشىلعاندىعىن قۇتتىقتادى.

　　□ سۋرەتتى شينحۋا اگەنتتىگىنىڭ ءتىلشىسى پاڭ شيڭلەي تۇسىرگەن

　　شينحۋا اگەنتتىگىنىڭ 9 - ايدىڭ 18 - كۇنى بەيجيڭنەن بەرگەن حابارى. جۇڭگو مۇگەدەكتەر بىرلەستىگىنىڭ مەملەكەتتىك 8 - قۇرىلتايى 9 - ايدىڭ 18 - كۇنى تۇستەن بۇرىن بەيجيڭ حالىق سارايىندا اشىلدى. شي جينپيڭ، لي چياڭ، جاۋ لىجي، ۋاڭ حۋنيڭ، ساي چي قاتارلى پارتيا مەن مەملەكەت باسشىلارى قۇرىلتايعا بارىپ قۇتتىقتادى، ديڭ شۋەشياڭ پارتيا ورتالىق كوميتەتى، مەملەكەتتىك كەڭەس اتىنان ارناۋ ءسوز سويلەدى.

　　حالىق سارايىنىڭ ۇلكەن زالىندا شامدار جايناپ، قىزۋ دۋماندى سالتانات لەبى ەسەدى. ءتوراعالار مىنبەسىنىڭ جوعارى جاعىنا ”جۇڭگو مۇگەدەكتەر بىرلەستىگىنىڭ مەملەكەتتىك 8 - قۇرىلتايى“ دەگەن ءماجىلىس بەلگىسى اسىلعان، ارتىنداعى پەردەنىڭ ءدال ورتاسىنداعى جۇڭگو مۇگەدەكتەر بىرلەستىگىنىڭ بەلگىسى ەرەكشە كوز تارتادى، 10 نارت قىزىل تۋ ەكى جاعىنا ءبولىنىپ قويىلعان. زالدىڭ 2 - قاباتىنداعى تەكشەگە ”شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، پارتيا 20 - قۇرىلتايىنىڭ رۋحىن جاپپاي دايەكتىلەندىرىپ، قالىڭ مۇگەدەكتەردى جۇڭگو ۇلگىسىندەگى وسىزامانداندىرۋ بارىسىندا اناعۇرلىم باقىتتى، تاماشا تۇرمىس جاراتۋعا ىنتىماقتاستىرايىق جانە باستايىق“ دەگەن ۇلكەن كەرمە تۋ ىلىنگەن. بۇكىل ەلدىڭ جەر - جەرىنەن كەلگەن 600دەن استام ۋاكىل 85 ميلليون مۇگەدەكتىڭ ماڭىزدى تاپسىرماسىن ارقالاپ قۇرىلتايعا قاتىناستى.

　　تۇستەن بۇرىن ساعات 10دا جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ قاتارلىلار قۇرىلتاي الاڭىنا كىردى، بۇكىل الاڭنان قىزۋ قول شاپالاق ءۇنى كوتەرىلدى.

     قۇرىلتاي ايبىندى جۇڭحۋا حالىق رەسپۋبليكاسىنىڭ مەملەكەت ءانى اۋەنىمەن باستالدى.

　　ديڭ شۋەشياڭ پارتيا ورتالىق كوميتەتى، مەملەكەتتىك كەڭەس اتىنان «جۇڭگو ۇلگىسىندەگى وسىزامانداندىرۋ بارىسىندا مۇگەدەكتەردىڭ اناعۇرلىم باقىتتى، تاماشا تۇرمىسىن بىرگە جاراتايىق» دەگەن تاقىرىپتا ارناۋ ءسوز سويلەپ، قۇرىلتايدىڭ اشىلعاندىعىن قىزۋ قۇتتىقتادى، بۇكىل ەلدەگى قالىڭ مۇگەدەكتەرگە، مۇگەدەكتەردىڭ تۋىس - تۋعان، دوس - جاراندارىنا، مۇگەدەك ىستەرى قىزمەتكەرلەرىنە ىقىلاستى سالەم جولدادى. مۇگەدەكتەر ىستەرىنە كوڭىل بولگەن، قولداۋ كورسەتكەن قوعامنىڭ ءار سالاسىنداعى قايراتكەرلەرگە شىن جۇرەكتەن العىس ايتتى.

　　ديڭ شۋەشياڭ ارناۋ سوزىندە بىلاي دەدى: شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، جاڭا داۋىردەگى 10 جىلدا ەلىمىزدىڭ مۇگەدەكتەر ىستەرى قارىشتاپ دامىعان جاڭا جاعداي اشىپ، ”جاپپاي دوڭگەلەك داۋلەتتى قوعام ورناتۋدا مۇگەدەكتەردىڭ بىردە - بىرەۋىن قاعىس قالدىرۋعا بولمايدى“ نىساناسىن ۋاعىندا جۇزەگە اسىردى. قالىڭ مۇگەدەكتەر ارماندى سەرىك ەتىپ، داۋىرمەن بىرگە العا باسىپ، قايسارلىقپەن كۇرەس جۇرگىزۋ ارقىلى ءاربىر تاماشا ارماندى رەالدىققا اينالدىرىپ، ءىس جۇزىندىك ارەكەتتەرى ارقىلى تالىقپاي تالپىناتىن ۇلى ۇلت رۋحىن جانە ءداۋىر رۋحىن جاندى بەينەلەدى.

　　ديڭ شۋەشياڭ مىنالاردى باسا دارىپتەدى: پارتيانىڭ 20 - قۇرىلتايىندا مۇگەدەكتەردىڭ قوعامدىق قامتاماسىزداندىرۋ ءتۇزىمى مەن قامقورلىق جاساۋ، قىزمەت وتەۋ جۇيەسىن كەمەلدەندىرۋ، مۇگەدەكتەر ىستەرىنىڭ جاپپاي دامۋىن جەبەۋ جونىندە ايقىن تالاپ قويىلدى. شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، باس شۋجي شي جينپيڭنىڭ مۇگەدەكتەر ىستەرىنىڭ دامۋى جونىندەگى ماڭىزدى بايىمداۋلارى مەن ماڭىزدى نۇسقاۋلارىنىڭ، بەكىتۋلەرىنىڭ رۋحىن جاپپاي دايەكتىلەندىرىپ، تياناقتاندىرىپ، تەرەزەسى تەڭ، توعىسقان، بىرگە يگىلىكتەنەتىن قۇن بەتالىسىن مىقتاپ يگەرىپ، مۇگەدەكتەر ءىسىن وسىزامانداندىرۋدى ىلگەرىلەتۋ سىندى تاريحي بورىشتى مىقتاپ يگەرىپ، مۇگەدەكتەردىڭ بىرگە اۋقاتتانۋىن ىلگەرىلەتۋ نىسانا - مىندەتتەرىن مىقتاپ يگەرىپ، مۇگەدەكتەر ىستەرىنىڭ جاپپاي دامۋىن جەبەۋ كەرەك. ءار دارەجەلى پارتكوم مەن ۇكىمەت مۇگەدەكتەر ىستەرىنە باسشىلىق ەتۋ ءتۇزىلىسىن ونان ارى كەمەلدەندىرۋى، ءار دارەجەلى ۇكىمەت مۇگەدەكتەر قىزمەتى كوميتەتتەرى ءبىر تۇتاس جوسپارلاپ سايكەستىرۋدى كۇشەيتۋى، قاتىستى تاراۋلار، ورىندار تىعىز سايكەسۋى، ءار دارەجەلى مۇگەدەكتەر بىرلەستىكتەرى مۇقيات مىندەت وتەپ، جاۋاپكەرشىلىكتى ادا ەتۋى، قالىڭ مۇگەدەكتەر ءوزىن قادىرلەۋ، وزىنە سەنۋ، ءوزىن الۋەتتەندىرۋ، ءوز كۇشىنە سۇيەنۋ رۋحىن ۇزدىكسىز ساۋلەلەندىرۋى، جۇڭگو ۇلگىسىندەگى وسىزامانداندىرۋ بارىسىندا مۇگەدەكتەردىڭ اناعۇرلىم باقىتتى، تاماشا تۇرمىسىن بىرگە جاراتۋى كەرەك.

　　جۇڭحۋا مەملەكەتتىك ايەلدەر بىرلەستىگى پارتيا باسشىلىق گرۋپپاسىنىڭ شۋجيى، شۋجيچۋىنىڭ ءبىرىنشى شۋجيى حۋاڭ شياۋۋي جۇڭحۋا مەملەكەتتىك باس جۇمىسشى ۇيىمى، جۇڭگو كوممۋنيستىك جاستار وداعى ورتالىق كوميتەتى، جۇڭحۋا مەملەكەتتىك ايەلدەر بىرلەستىگى، جۇڭگو ادەبيەت - كوركەمونەرشىلەر بىرلەستىگى، جۇڭگو جازۋشىلار قوعامى، جۇڭگو عىلىم - تەحنيكا قوعامى، جۇڭحۋا مەملەكەتتىك وتانعا ورالعان حۋاچياۋلار بىرلەستىگى، جۇڭحۋا مەملەكەتتىك تايۋاندىق باۋىرلاستار دوستىق بىرلەستىگى اتىنان قۇرىلتايدا قۇتتىقتاۋ ءسوزىن سويلەدى. قۇتتىقتاۋ سوزىندە بىلاي دەپ اتاپ كورسەتىلدى: ءارقايسى بۇقارالىق توپتار مەن ۇيىمدار تاڭداۋلى ءداستۇردى ۇزدىكسىز اسقاقتاتىپ، ءوز باسىمدىقتارىن تولىق ساۋلەلەندىرىپ، وزدەرى بايلانىس ورناتقان بۇقارانى باستاپ، اناعۇرلىم كوكىرەك تولى سەنىممەن، اناعۇرلىم جالىندى جىگەرمەن پارتياعا تىعىز ىلەسىپ، مەملەكەتتى قۇدىرەتتەندىرۋ قۇرىلىسىنىڭ، ۇلتتى گۇلدەندىرۋدىڭ داڭعىل جولىندا جاڭا داۋىردەگى پارتيانىڭ بۇقارالىق توپتار مەن ۇيىمدار قىزمەتىنىڭ جاڭا تاراۋىن بىرگە جازۋى كەرەك.

　　جۇڭگو مۇگەدەكتەر بىرلەستىگىنىڭ ءتوراعاسى جاڭ حايدي جۇڭگو مۇگەدەكتەر بىرلەستىگىنىڭ 7 - كەزەكتى ءتوراعالار القاسى اتىنان «شي جينپيڭ جاڭا ءداۋىر جۇڭگوشا سوتسياليزم يدەياسىنىڭ جەتەكشىلىگىندە مۇگەدەكتەر ىستەرىنىڭ جاپپاي دامۋىن ىلگەرىلەتۋ ءۇشىن قۇلشىنا كۇرەسەيىك» دەگەن تاقىرىپتا قۇرىلتايعا قىزمەت بايانداماسىن جاسادى.

　　جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ ءىشىنارا مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىندەگى، مەملەكەتتىك كەڭەستەگى، مەملەكەتتىك ساياسي كەڭەستەگى، ورتالىق اسكەري ىستەر كوميتەتىندەگى قاتىستى باسشى جولداستار قۇرىلتايعا قاتىناستى.

　　ورتالىق پەن مەملەكەت ورگاندارىنىڭ قاتىستى تاراۋلارىنداعى، ءارقايسى حالىقتىق توپتارداعى، ارميانىڭ قاتىستى ورىندارىنداعى جانە بەيجيڭ قالاسىنداعى جاۋاپتى جولداستار، دەموكراتيالىق پارتيا - توپتاردىڭ ورتالىق كوميتەتتەرىنىڭ جانە مەملەكەتتىك ساۋدا - ونەركاسىپشىلەر بىرلەستىگىنىڭ جاۋاپتىلارى، جۇڭگو مۇگەدەكتەر بىرلەستىگىنىڭ مەملەكەتتىك 8 - قۇرىلتايىنىڭ ۋاكىلدەرى قاتارلىلار اشىلۋ ماجىلىسىنە قاتىناستى.

جالعانىم