جۇڭحۋا حالىق رەسپۋبليكاسى قۇرىلعاندىعىنىڭ 74 جىلدىعىن قۇتتىقتاۋ قوناعاسى بەيجيڭدە وتكىزىلدى
شي جينپيڭ ماڭىزدى ءسوز سويلەدى
لي چياڭ باسقاردى، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتىناستى
9 - ايدىڭ 28 - كۇنى كەشتە جۇڭحۋا حالىق رەسپۋبليكاسى قۇرىلعاندىعىنىڭ 74 جىلدىعىن قۇتتىقتاۋ قوناعاسى بەيجيڭ حالىق سارايىندا وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ قوناعاسىعا قاتىناستى ءارى ماڭىزدى ءسوز سويلەدى.
□ سۋرەتتى شينحۋا اگەنتتىگىنىڭ ءتىلشىسى ليۋ بين تۇسىرگەن
9 - ايدىڭ 28 - كۇنى كەشتە جۇڭحۋا حالىق رەسپۋبليكاسى قۇرىلعاندىعىنىڭ 74 جىلدىعىن قۇتتىقتاۋ قوناعاسى بەيجيڭ حالىق سارايىندا وتكىزىلدى. شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلى پارتيا مەن مەملەكەت باسشىلارى جۇڭگولىق، شەتەلدىك قايراتكەرلەرمەن بىرگە ءبىر ارادا شاتتىقپەن باس قوسىپ، جۇڭحۋا حالىق رەسپۋبليكاسىنىڭ مەرەيتويىن بىرگە تويلادى.
□ سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن
شينحۋا اگەنتتىگىنىڭ 9 - ايدىڭ 28 - كۇنى بەيجيڭنەن بەرگەن حابارى. جۇڭحۋا حالىق رەسپۋبليكاسى قۇرىلعاندىعىنىڭ 74 جىلدىعىن قۇتتىقتاۋ قوناعاسى 9 - ايدىڭ 28 - كۇنى كەشتە حالىق سارايىندا وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ قوناعاسىعا قاتىناستى ءارى ماڭىزدى ءسوز سويلەدى. ول بىلاي دەپ باسا دارىپتەدى: جاڭا جورىقتا ءبىزدىڭ بولاشاعىمىز اسا نۇرلى. ىنتىماق − كۇش، سەنىم التىننان دا قىمبات. ءبىز سەنىمدى بەكەمدەپ، رۋحتى سەرپىلتىپ، ىنتىماقتاسا كۇرەس جۇرگىزىپ، ۇزدىكسىز كەزەڭ اسىپ، كەدەرگىلەردەن ءوتىپ، قيىندىقتاردان قامال الىپ، مەملەكەتتى قۇدىرەتتەندىرۋ قۇرىلىسى، ۇلتتى گۇلدەندىرۋ ۇلى نىساناسىنا قاراي بۇلجىماي ەكپىندەي باتىلدىقپەن العا ىلگەرىلەۋىمىز كەرەك.
لي چياڭ قوناعاسىنى باسقاردى، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قوناعاسىعا قاتىناستى. 800گە تارتا جۇڭگولىق، شەتەلدىك قايراتكەر ءبىر ارادا شاتتىقپەن باس قوسىپ، جۇڭحۋا حالىق رەسپۋبليكاسىنىڭ مەرەيتويىن بىرگە قۇتتىقتادى.
حالىق سارايىنىڭ قوناعاسى زالىندا اشەكەيلى شامدار جارقىراپ، گۇلدەر شەشەك اتىپ، مەرەيلى دە دۋماندى مەرەكەلىك لەپ ەستى. ءتوراعالار مىنبەسىنىڭ جوعارعى جاعىنا ايبىندى مەملەكەت گەربى بيىك ءىلىنىپ، ”2023 − 1949“ دەگەن ۇلكەن ءارىپتى جىلناما نارت قىزىل تۋدىڭ ايشىقتاۋىندا ايرىقشا كوز تارتىپ تۇر.
ساعات 17دەن 30 مينۋت مولشەرىندە دۋماندى «قوناق قارسى الۋ» مۋزيكاسىنىڭ ورىندالۋىمەن، شي جينپيڭ قاتارلى پارتيا مەن مەملەكەت باسشىلارى قوناعاسى زالىنا كىرىپ، كوپشىلىككە قول بۇلعاپ قۇرمەت ءبىلدىردى، بۇكىل زالدان دۋ قول شاپالاق ءۇنى كوتەرىلدى.
قوناعاسى باستالدى. بۇكىل زالداعىلار ورىندارىنان تۇرىپ، مەملەكەت ءانىن اسقاقتاتا شىرقادى، ايبىندى «ەرىكتىلەر مارشى» زالدى كەرنەپ تۇردى.
شي جينپيڭ ماڭىزدى ءسوز سويلەدى. ول الدىمەن پارتيا ورتالىق كوميتەتى، مەملەكەتتىك كەڭەس اتىنان بۇكىل ەلدەگى ءار ۇلت حالقىنا، جۇڭگو حالىق ازاتتىق ارمياسىنىڭ كوماندير - جاۋىنگەرلەرىنە جانە قارۋلى ساقشى ءبولىمىنىڭ وفيتسەر - اسكەرلەرىنە، ءارقايسى دەموكراتيالىق پارتيا - توپتارعا جانە پارتيادا، توپتا جوق قايراتكەرلەرگە وسكەلەڭ قۇرمەت ءبىلدىردى؛ شياڭگاڭ ەرەكشە اكىمشىلىك رايونىنداعى باۋىرلاستارعا، اۋمىن ەرەكشە اكىمشىلىك رايونىنداعى باۋىرلاستارعا، تايۋانداعى باۋىرلاستارعا جانە شەتەلدەگى چياۋمين باۋىرلاستارعا ىقىلاستى سالەم جولدادى؛ جۇڭگونىڭ وسىزامانداندىرۋ قۇرىلىسىنا كوڭىل بولگەن جانە قولداۋ كورسەتكەن دوس مەملەكەتتەرگە، سونداي - اق حالىقاراداعى دوستارعا شىن جۇرەكتەن العىس ايتتى.
شي جينپيڭ سوزىندە بىلاي دەپ اتاپ كورسەتتى: جاڭا جۇڭگو قۇرىلعان 74 جىلدان بەرى ەلىمىز بىرىنشىدەن كەدەي، ەكىنشىدەن اق كۇيدەن جاپپاي دوڭگەلەك داۋلەتتىلىككە جەتىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋدى جاپپاي ىلگەرىلەتۋدىڭ جاڭا جورىعىنا قادام تاستادى، بۇل جۇڭگو كوممۋنيستىك پارتياسىنىڭ بۇكىل ەلدەگى ءار ۇلت حالقىن ىنتىماقتاستىرىپ، باستاپ قاجىرلىلىقپەن كۇرەس جۇرگىزۋ ارقىلى قول جەتكىزگەن وراسان زور تابىسى. بيىل پارتيا 20 - قۇرىلتايىنىڭ رۋحىن دايەكتىلەندىرۋدىڭ، تياناقتاندىرۋدىڭ باستاما جىلى. ءبىز جاڭا تيپتى ايدارشا ۆيرۋس ىندەتىنەن ساقتانۋ - تىزگىندەۋ مەن ەكونوميكالىق، قوعامدىق دامۋدى ءبىر تۇتاس جوسپارلادىق، دامۋ مەن حاۋىپسىزدىكتى ءبىر تۇتاس جوسپارلادىق، ەكونوميكانىڭ ۇزدىكسىز قالپىنا كەلۋىن بەلسەنە ىلگەرىلەتتىك، پارتيا مەن مەملەكەتتىڭ قۇرىلىم رەفورماسىن تارتىپپەن ىلگەرىلەتتىك، ءىشىنارا وڭىرلەردەگى تاسقىن، سەل اپاتىنا ءونىمدى توتەپ بەردىك، سىرتقا ەسىك اشۋدى، عىلىم - تەحنيكادا جاڭالىق اشۋدى، جاسىل دامۋدى بەلسەنە ىلگەرىلەتتىك، مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن تاباندىلىقپەن قورعادىق، ەكونوميكا جالپى تۇلعالىق جاقتان ورلەدى، جاقساردى، جوعارى ساپالى دامۋدى تىڭعىلىقتى ىلگەرىلەتتىك، استىق وندىرىسىندە مول ءونىم الۋدان ءۇمىت بار، حالىق تۇرمىسى ۇزدىكسىز جاقساردى، قوعامدىق كەلەلى جاعداي ورنىقتىلىقتى ساقتادى، ەلىمىز دەنە تاربيە ساڭلاقتارى چىڭدۋ جوعارى مەكتەپ وقۋشىلارى جازعى سپورت جارىسىندا، حاڭجوۋ ازيا سپورت جارىسىندا ەرلىكپەن كەرەمەت ناتيجەلەر جاراتتى. وسى ناتيجەلەرگە قول جەتكىزۋ وڭايعا تۇسپەدى، جۇرتتى جىگەرلەندىردى.
شي جينپيڭ بىلاي دەپ باسا دارىپتەدى: كەزەكتە دۇنيە ءجۇزىنىڭ 100 جىلدىق وزگەرىسى جەدەل قۇبىلىپ، حالىقارالىق ورتادا تەرەڭ وزگەرىس تۋىلدى، ءبىز العا باسۋ جولىندا كوپتەگەن حاۋىپ - قاتەرلەر مەن سىن - سايىستارعا دا ءدوپ كەلدىك. ءبىز جوعارى ساپالى دامۋدى ىلگەرىلەتۋدى ارقاۋ ەتىپ، جاڭا دامۋ ۇستانىمىن تولىق، دالمە - ءدال، جاپپاي دايەكتىلەندىرىپ، جاڭا دامۋ ارناسىن جەدەل قالىپتاستىرىپ، ماكرولىق رەتتەۋ - مەڭگەرۋدى كۇش سالا كۇشەيتىپ، ەل ىشىندەگى ءونىمدى سۇرانىستى كۇش سالا كەڭەيتىپ، تيجارات تۇلعالارىنىڭ ومىرشەڭدىگىن كۇش سالا قاۋلاتىپ، ەكونوميكالىق اينالىمنىڭ ۇزدىكسىز جاقسارۋىن، ىشكى قوزعاۋشى كۇشتىڭ ۇزدىكسىز كۇشەيۋىن، قوعامدىق مەجەنىڭ ۇزدىكسىز جاقسارۋىن توقتاۋسىز ىلگەرىلەتىپ، ەلەۋلى حاۋىپ - قاتەرلەردەن شىنايى ساقتانىپ جانە ولاردى جويىپ، تۇتاس جىلدىق ەكونوميكالىق، قوعامدىق دامۋ نىساناسىن قۇلشىنا جۇزەگە اسىرۋىمىز كەرەك. ءبىز سىرتقا جوعارى دەڭگەيدە ەسىك اشۋدى ىلگەرىلەتۋدى ارقاۋ ەتىپ، رەفورمانى ۇزدىكسىز جاپپاي تەرەڭدەتىپ، قاعيدا، ەرەجە، باسقارۋ، ولشەم سياقتى تۇزىمدىك ەسىك اشۋدى ورنىقتى قاداممەن كەڭەيتىپ، ”ءبىر بەلدەۋ، ءبىر جولدى“ بىرگە قۇرۋدىڭ جوعارى ساپالى دامۋىن ىلگەرىلەتىپ، ەل ءىشى، حالىقارا سىندى قوس اينالىمدى ىركىلىسسىزدەندىرىپ، ەكونوميكالىق دامۋدى اناعۇرلىم سەرپىمدىلىككە، اناعۇرلىم ومىرشەڭدىككە يە ەتۋىمىز كەرەك. ءبىز حالىقتىڭ كۇن سايىن ارتىپ وتىرعان تاماشا تۇرمىس قاجەتىن قاناعاتتاندىرۋدى ارقاۋ ەتىپ، حالىق تۇرمىسىن قامتاماسىز ەتۋ سەرپىنىن كۇشەيتىپ، جۇمىستانۋدى كۇش سالا كەڭەيتىپ، حالىق بۇقاراسىنىڭ شۇعىل، قيىن، ۋايىمداعان، ءزارۋ ماسەلەلەرىن ويداعىداي شەشىپ، قيىنشىلىعى بار بۇقاراعا قاراتىلعان تومەنگى شەكتەن تۇسىرمەي كومەكتەسۋ - سۇيەمەلدەۋدى كۇشەيتىپ، كەدەيلىكتەن ارىلتۋدان قامال الۋ جەتىستىكتەرىن بەكەمدەپ، كەڭەيتىپ، اۋىل - قىستاقتى گۇلدەندىرۋدى جاپپاي ىلگەرىلەتىپ، بىرگە بايۋدى تىڭعىلىقتى ىلگەرىلەتىپ، حالىق بۇقاراسىنىڭ تابىس سەزىمىن، باقىت سەزىمىن، حاۋىپسىزدىك سەزىمىن ۇزدىكسىز كۇشەيتۋىمىز كەرەك.
شي جينپيڭ بىلاي دەپ اتاپ كورسەتتى: ءبىز ”ءبىر ەل، ەكى ءتۇزىم“ باعىتىن ۇزدىكسىز جاپپاي، دالمە - ءدال، بۇلجىماي دايەكتىلەندىرىپ، ”شياڭگاڭدى وتانشىلدار باسقارۋ“، ”اۋمىندى وتانشىلدار باسقارۋ“ پرينسيبىن تياناقتاندىرىپ، شياڭگاڭنىڭ، اۋمىننىڭ ەكونوميكانى دامىتۋىن، حالىق تۇرمىسىن جاقسارتۋىن، ءوز ەرەكشەلىگى مەن باسىمدىعىن ساۋلەلەندىرۋىن، گۋاڭدۇڭ - شياڭگاڭ - اۋمىن ۇلكەن شىعاناق رايونى قۇرىلىسىنا بەلسەنە ات سالىسۋىن قولداپ، شياڭگاڭنىڭ، اۋمىننىڭ باياندى گۇلدەنۋىن، ورنىقتىلىعىن ساقتاۋىمىز كەرەك. ءبىز ءبىر جۇڭگو پرينسيبىنە جانە ”92 - جىلعى ورتاق تانىمعا“ تاباندى بولىپ، ەكى جاعالاۋ قارىم - قاتىناسىنىڭ بەيبىت دامۋىن ىلگەرىلەتىپ، ەكى جاعالاۋدىڭ توعىسا دامۋىن تەرەڭدەتىپ، جۇڭحۋا ۇلتىنىڭ ءتۇبىرلى مۇددەسىن قورعاپ، ەكى جاعالاۋداعى باۋىرلاستاردىڭ قۇت - ىرىسىن نىعايتۋىمىز كەرەك. وتانىمىزدىڭ بۇكىلدەي بىرلىككە كەلۋىن جۇزەگە اسىرۋ − حالىق تىلەگى، ءداۋىر اعىمى، تاريحي سوزسىزدىك، ونى ءارقانداي كۇش بوگەي المايدى.
شي جينپيڭ بىلاي دەپ باسا دارىپتەدى: ءبىز بەيبىت دامۋعا تاباندى بولىپ، ءوزارا تيىمدىلىك جەتكىزىپ، بىرگە يگىلىكتەنۋ سىندى اشىق ستراتەگيانى تاباندىلىقپەن اتقارىپ، حالىقارالىق ادىلدىكتى، ادىلەتتىلىكتى قورعاپ، ناعىز كوپ جاقتىلىقتى امالياتتا ايگىلەپ، الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن تياناقتاندىرۋدى ىلگەرىلەتىپ، ادامزات تاعدىرلاس ورتاق تۇلعاسىن قۇرۋدى ىلگەرىلەتىپ، ءار ەل حالقىمەن قول ۇستاسا قۇلشىنىپ، الەمدىك ءتۇرلى سايىستارعا توتەپ بەرىپ، ادامزاتتىڭ كوركەم بولاشاعىن بىرگە جاراتۋىمىز كەرەك.
دۋماندى مۋزيكا ءۇنى ىشىندە جۇڭگولىق، شەتەلدىك قوناقتار، دوستار توست كوتەرىپ، جۇڭحۋا حالىق رەسپۋبليكاسى قۇرىلعاندىعىنىڭ 74 جىلدىعىن بىرگە قۇتتىقتاپ، جۇڭگونىڭ گۇلدەنىپ - كوركەيۋىن، حالىقتىڭ باقىتتى، امان - ەسەن بولۋىن، جۇڭگو حالقى مەن دۇنيە جۇزىندەگى ءار ەل حالقىنىڭ دوستىعىنىڭ ماڭگى جالعاسۋىن تىلەدى.
قوناعاسىعا قاتىناسقانداردان تاعى بەيجيڭدەگى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىقتارى، مەملەكەتتىك كەڭەستىڭ ورىنباسار زۇڭليلەرى، مەملەكەتتىك كەڭەس مۇشەلەرى، مەملەكەتتىك باقىلاۋ - تەكسەرۋ كوميتەتىنىڭ مەڭگەرۋشىسى، ەڭ جوعارى حالىق سوتى مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەستىڭ ورىنباسار ءتوراعالارى جانە باسشىلىق مىندەتىنەن بوساعان جولداستار، سونداي - اق ورتالىق اسكەري ىستەر كوميتەتىنىڭ مۇشەلەرى، كەزىندە ورتالىق اسكەري ىستەر كوميتەتىنىڭ مۇشەسى مىندەتىن وتەگەن جولداستار بار.
ورتالىقتىڭ پارتيا، ۇكىمەت، ارميا ورىندارىنىڭ، بۇقارالىق ۇيىمداردىڭ قاتىستى تاراۋلارىنىڭ جانە بەيجيڭ قالاسىنىڭ جاۋاپتىلارى، ءارقايسى دەموكراتيالىق پارتيا - توپتار ورتالىق كوميتەتىنىڭ، مەملەكەتتىك ساۋدا - ونەركاسىپشىلەر بىرلەستىگىنىڭ جاۋاپتىلارى جانە پارتيادا، توپتا جوق قايراتكەرلەردىڭ ۋاكىلدەرى، بەيجيڭدە تۇراتىن وردەن يەگەرلەرىنىڭ، داڭق اتاعى يەگەرلەرىنىڭ ۋاكىلدەرى، مەملەكەتتىك ەڭبەك ەرلەرى مەن وزات تۇلعالاردىڭ ۋاكىلدەرى، چىڭدۋ جوعارى مەكتەپ وقۋشىلارى جازعى سپورت جارىسىنداعى، حاڭجوۋ ازيا سپورت جارىسىنداعى، ازيا مۇگەدەكتەر سپورت جارىسىنداعى جۇڭگو دەنە تاربيە ۋاكىلدەر ۇيىرمەسىنىڭ ۋاكىلدەرى، ۇلتتار وڭىرلەرىنىڭ ورنىقتىلىعىنا، دامۋىنا، ىنتىماعىنا ماڭىزدى ۇلەس قوسقان از ۇلت ۋاكىل قايراتكەرلەرى، بەيجيڭدەگى ءىشىنارا شياڭگاڭ ەرەكشە اكىمشىلىك رايونىنىڭ قايراتكەرلەرى، اۋمىن ەرەكشە اكىمشىلىك رايونىنىڭ قايراتكەرلەرى، تايۋاندىق باۋىرلاستار مەن حۋاچياۋلاردىڭ، حۋارىنداردىڭ ۋاكىلدەرى، ءار ەلدىڭ جۇڭگودا تۇراتىن ەلشىلەرى، حالىقارالىق ۇيىمداردىڭ جۇڭگودا تۇراتىن ۋاكىلدەرى، ءىشىنارا شەتەلدىك ماماندار قاتارلىلار دا قوناعاسىعا قاتىناستى.