قۇربانداردى ەسكە الۋ كۇنىندە حالىق قاھارماندارىنا گۇل شارباق تارتۋ ەتۋ سالتى بەيجيڭدە سالتاناتپەن وتكىزىلدى
شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتىناستى
9 - ايدىڭ 30 - كۇنى تۇستەن بۇرىن پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار بەيجيڭ تيان - انمىن الاڭىنا كەلىپ، قۇربانداردى ەسكە الۋ كۇنىندە حالىق قاھارماندارىنا گۇل شارباق تارتۋ ەتۋ سالتىنا قاتىناستى. سۋرەتتە: شي جينپيڭ گۇل شارباقتىڭ تورعىن لەنتاسىن رەتتەۋدە.
□ سۋرەتتى شينحۋا اگەنتتىگىنىڭ ءتىلشىسى يىن بوگۋ تۇسىرگەن
9 - ايدىڭ 30 - كۇنى تۇستەن بۇرىن پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار بەيجيڭ تيان - انمىن الاڭىنا كەلىپ، قۇربانداردى ەسكە الۋ كۇنىندە حالىق قاھارماندارىنا گۇل شارباق تارتۋ ەتۋ سالتىنا قاتىناستى.
□ سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن
شينحۋا اگەنتتىگىنىڭ 9 - ايدىڭ 30 - كۇنى بەيجيڭنەن بەرگەن حابارى. قاھارمان قۇرباندارعا جايناعان گۇل تارتۋ ەتىلدى، ايبىندى دا اسقاق جىگەر ايگىلەندى. قۇربانداردى ەسكە الۋ كۇنىندە حالىق قاھارماندارىنا گۇل شارباق تارتۋ ەتۋ سالتى 9 - ايدىڭ 30 - كۇنى تۇستەن بۇرىن بەيجيڭ تيان - انمىن الاڭىندا سالتاناتپەن وتكىزىلدى. پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار ءار سالا ۋاكىلدەرىمەن بىرگە سالتقا قاتىناستى.
بۇگىن − ەلىمىزدىڭ 10 - رەتكى ”قۇربانداردى ەسكە الۋ كۇنى“. ايبىندى تيان - انمىن الاڭىندا بەس جۇلدىزدى نارت قىزىل تۋ بيىك جەلبىرەپ تۇر. الاڭنىڭ ورتالىعىندا ”وتانعا باقىت تىلەيمىز“ دەگەن جازۋ جازىلعان الىپ گۇل شارباق مەملەكەتتىڭ گۇلدەنىپ - كوركەيۋى، بايىپ - قۇدىرەتتەنۋى جونىندەگى تاماشا تىلەكتى بەينەلەپ تۇر. حالىق قاھارماندارى ەسكەرتكىشى اسقاق ايبىنمەن بوي سوزىپ تۇر، سولتۇستىك جاعىنداعى ەكى قاتار گۇل تەكشەسىنە اق كۇرەڭكەي سياقتى گۇل - بايشەشەكتەردەن قۇرالعان 18 گۇل ساقيناسى بۇكىل جۇڭحۋا پەرزەنتتەرىنىڭ قاھارمان قۇرباندارعا تەرەڭ ساعىنىشىن ايگىلەپ تۇر.
ساعات 10عا تاياعاندا، شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلى پارتيا مەن مەملەكەت باسشىلارى تيان - انمىن الاڭىنا كەلىپ، حالىق قاھارماندارىنا گۇل شارباق تارتۋ ەتۋ سالتىنا قاتىناستى.
جۇڭگو حالىق ازاتتىق ارمياسى اسكەري وركەسترىنىڭ كىشى كەرنايشىلارى مۇڭلى سەزىمگە تولى «قۇربانداردى ەسكە الۋ كۇنى كەرناي كۇيىن» تارتتى.
”قۇرمەت قاراۋىلى ورىندارىنا جايعاسسىن“! بۇيرىق بەرىلىسىمەن ءۇش ارميانىڭ قۇرمەت قاراۋىلدارى نىق قاداممەن ارشىنداي ءجۇرىپ، قۇرمەت قادامىمەن ەسكەرتكىشتىڭ الدىنا بارىپ مىلتىقتارىن سەرت ۇستاپ تۇردى.
ساعات ءدال 10دا، حالىق قاھارماندارىنا گۇل شارباق تارتۋ ەتۋ سالتى رەسمي باستالدى. اسكەري وركەستر «ەرىكتىلەر مارشىن» ورىندادى، بۇكىل الاڭداعىلار بىركەلكى داۋىسپەن جۇڭحۋا حالىق رەسپۋبليكاسىنىڭ مەملەكەت ءانىن اسقاقتاتا شىرقادى.
مەملەكەت ءانى ورىندالىپ بولعان سوڭ، بۇكىل الاڭداعىلار جىم - جىرت كۇيگە شومىپ، جۇڭگو حالقىنىڭ ازاتتىق ىستەرى مەن رەسپۋبليكانىڭ قۇرىلىس ىستەرى جولىندا ەرلىكپەن ءومىرىن ارناعان قۇرباندارعا ءۇنسىز ازا ءبىلدىردى.
ءۇنسىز ازا ءبىلدىرۋ اياقتالعاننان كەيىن، قولدارىنا گۇل ۇستاعان جاس وسپىرىمدەر حالىق قاھارماندارى ەسكەرتكىشىنە قاراپ تۇرىپ، «ءبىز كوممۋنيزم ءىزباسارلارىمىز» ءانىن اسقاقتاتا شىرقادى ءارى پيونەرلەر وتريادىنىڭ سالەمىن جاسادى.
شارشى توپتىڭ الدىندا جۇڭگو كوممۋنيستىك پارتياسى ورتالىق كوميتەتى، مەملەكەتتىك حالىق قۇرىلتايى تۇراقتى كوميتەتى، مەملەكەتتىك كەڭەس، مەملەكەتتىك ساياسي كەڭەس، ورتالىق اسكەري ىستەر كوميتەتى، دەموكراتيالىق پارتيا - توپتار، مەملەكەتتىك ساۋدا - ونەركاسىپشىلەر بىرلەستىگى جانە پارتيادا، توپتا جوق وتانشىل قايراتكەرلەر، حالىقتىق ۇيىمدار مەن ءار سالا جۇرتشىلىعى، ساقا جاۋىنگەرلەر، ساقا جولداستار جانە قۇربانداردىڭ تۋىس - تۋعاندارى، جۇڭگو پيونەرلەر وتريادى اتىنان تارتۋ ەتىلگەن 9 ۇلكەن گۇل شارباق رەتىمەن قويىلدى، گۇل شارباقتاردىڭ قىزىل تورعىن لەنتاسىنا جازىلعان ”حالىق قاھارماندارى ماڭگى جاسايدى“ دەگەن جازۋلار ەرەكشە كوز تارتىپ تۇر.
اسكەري وركەستر تەرەڭ سۇيىسپەنشىلىككە تولى «گۇل تارتۋ ەتۋ مۋزيكاسىن» ورىندادى، 18 قۇرمەت قاراۋىلى گۇل شارباقتاردى بايىپپەن كوتەرىپ، حالىق قاھارماندارى ەسكەرتكىشىنە قاراي باياۋ قادام تاستاپ، گۇل شارباقتاردى ەسكەرتكىشتىڭ تۇعىرىنا اكەلىپ قويدى.
شي جينپيڭ قاتارلى پارتيا مەن مەملەكەت باسشىلارى باياۋ قاداممەن ەسكەرتكىش تۇعىرىنا شىعىپ، گۇل شارباقتاردىڭ الدىندا كىدىرىپ، كوز الماي قارادى. جايقالا اشىلعان لالاگۇل، قۇلپىرعان حۇڭجاڭ، حوش ءيىستى ۋىنشينلان حالىق قاھارماندارىنا تەرەڭ ساعىنىش پەن وسكەلەڭ قۇرمەتتى ايگىلەۋدە.
شي جينپيڭ الدىعا ءجۇرىپ بارىپ، گۇل شارباقتىڭ تورعىن لەنتاسىن ىجداعاتپەن رەتتەدى. وسىدان كەيىن شي جينپيڭ قاتارلى پارتيا مەن مەملەكەت باسشىلارى باياۋ قاداممەن اينالىپ، حالىق قاھارماندارى ەسكەرتكىشىنە قۇرمەتپەن كوز تاستادى.
پارتيانىڭ 20 - قۇرىلتايى جاڭا تاريحي باستامادا تۇرىپ، جاپپاي سوتسياليستىك وسىزاماندانعان قۇدىرەتتى ەل قۇرۋ، ەكىنشى 100 جىلدىق كۇرەس نىساناسىن جۇزەگە اسىرۋ، جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋ ۇلى جوباسىن جاساپ، جاڭا جورىقتا ەكپىندەي ىلگەرىلەۋدىڭ ءداۋىر دابىلىن قاقتى. شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، قاھارمان قۇربانداردىڭ رۋحىن جالعاستىرىپ، ەكپىندەي ىلگەرىلەۋ كۇشىن قابىلداپ، بۇكىل پارتيا، بۇكىل ارميا، بۇكىل ەلدەگى ءار ۇلت حالقى تاسقىنداعان جىگەرمەن ۇدەرە العا تارتقان جاڭا جورىقتا مەملەكەتتى قۇدىرەتتەندىرۋ قۇرىلىسى، ۇلتتى گۇلدەندىرۋ ۇلى ءىسى ءۇشىن قاجىماي - تالماي كۇرەس جۇرگىزۋدە.
جاس وسپىرىمدەردىڭ جانە ءار سالا جۇرتشىلىعىنىڭ ۋاكىلدەرى دە رەتىمەن ەسكەرتكىشتىڭ الدىنا بارىپ، قولدارىنداعى گۇلدەرىن تارتۋ ەتتى ءارى ەسكەرتكىشكە قۇرمەتپەن كوز تاستادى.
گۇل شارباق تارتۋ ەتۋ سالتىن جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، بەيجيڭ قالالىق پارتكومنىڭ شۋجيى يىن لي باسقاردى.
بەيجيڭدەگى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىنىڭ ءبىر ءبولىم ورىنباسار باستىقتارى، مەملەكەتتىك كەڭەستىڭ مۇشەلەرى، ەڭ جوعارى حالىق سوتى مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەستىڭ ءبىر ءبولىم ورىنباسار ءتوراعالارى جانە ورتالىق اسكەري ىستەر كوميتەتىنىڭ مۇشەلەرى سالتقا قاتىناستى.
ورتالىقتاعى پارتيا، ۇكىمەت، ارميا ورىندارىنىڭ، بۇقارالىق ۇيىمداردىڭ قاتىستى تاراۋلارىنىڭ جانە بەيجيڭ قالاسىنىڭ نەگىزگى جاۋاپتى جولداستارى، دەموكراتيالىق پارتيا - توپتاردىڭ ورتالىق كوميتەتتەرىنىڭ، مەملەكەتتىك ساۋدا - ونەركاسىپشىلەر بىرلەستىگىنىڭ جاۋاپتىلارى جانە پارتيادا، توپتا جوق قايراتكەرلەردىڭ ۋاكىلدەرى، بەيجيڭدەگى ساقا جاۋىنگەرلەردىڭ، ساقا جولداستاردىڭ جانە قۇربانداردىڭ تۋىس - تۋعاندارىنىڭ ۋاكىلدەرى، بەيجيڭدەگى وردەن يەگەرلەرىنىڭ، داڭق اتاعى يەگەرلەرىنىڭ ۋاكىلدەرى، بۇكىل ەلدەگى از ۇلت ەكسكۋرسيا ۇيىرمەسىنىڭ مۇشەلەرى، استاناداعى ءار سالا جۇرتشىلىعىنىڭ ۋاكىلدەرى، ت. ب سالتقا قاتىناستى.