شي جينپيڭ گۋاڭدۇڭدا قىزمەت تەكسەرگەندە بىلاي دەپ باسا دارىپتەدى

رەفورمانى بۇلجىماي جاپپاي تەرەڭدەتىپ، جوعارى دەڭگەيدە سىرتقا ەسىك اشۋدى كەڭەيتىپ، جۇڭگو ۇلگىسىندەگى وسىزامانداندىرۋ قۇرىلىسىن ىلگەرىلەتۋدە الدىڭعى لەكتە ءجۇرۋ كەرەك

ساي چي قىزمەت تەكسەرۋدە بىرگە بولدى

　　4 - ايدىڭ 10 - كۇنىنەن 13 - كۇنىنە دەيىن، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ گۋاڭدۇڭدا قىزمەت تەكسەردى. سۋرەتتە: 4 - ايدىڭ 10 - كۇنى تۇستەن كەيىن، شي جينپيڭ جانجياڭ قالاسىنىڭ شۇيۋىن اۋدانى شۇيۋىن پورتى كەمەجايىندا كەمەدەگى جولاۋشىلارعا قول بۇلعاپ قۇرمەت بىلدىرۋدە.

□ سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن

　　4 - ايدىڭ 10 - كۇنىنەن 13 - كۇنىنە دەيىن، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ گۋاڭدۇڭدا قىزمەت تەكسەردى. سۋرەتتە: 4 - ايدىڭ 11 - كۇنى تۇستەن كەيىن، شي جينپيڭ ماۋميڭدەگى گاۋجوۋ قالاسىنىڭ گىنزى قالاشىعى بايچياۋ قىستاعىندا قىستاق تۇرعىندارىمەن ىقىلاسپەن اڭگىمەلەسۋدە.

□ سۋرەتتى شينحۋا اگەنتتىگىنىڭ ءتىلشىسى ليۋ بين تۇسىرگەن

　　شينحۋا اگەنتتىگىنىڭ 4 - ايدىڭ 13 - كۇنى گۋاڭجوۋدان بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ تاياۋدا گۋاڭدۇڭدا قىزمەت تەكسەرگەندە بىلاي دەپ باسا دارىپتەدى: گۋاڭدۇڭ − رەفورما جاساۋداعى، ەسىك اشۋداعى اتويشى، الدا جۇرگەن جەر، سىناق رايونى، ونىڭ جۇڭگو ۇلگىسىندەگى وسىزامانداندىرۋ قۇرىلىسىنىڭ كەلەلى جاعدايىنداعى ورنى ماڭىزدى، رولى كورنەكتى. مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ نىساناسىن كوزدەپ، جوعارى ساپالى دامۋ سىندى وسى ماڭداي الدى مىندەتتى جانە جاڭا دامۋ ارناسىن قالىپتاستىرۋ سىندى وسى ستراتەگيالىق مىندەتتى ارقاۋ ەتىپ، رەفورمانى جاپپاي تەرەڭدەتۋ، جوعارى دەڭگەيدە سىرتقا ەسىك اشۋدى كەڭەيتۋ، عىلىم - تەحنيكادا ءوز كۇشىنە سۇيەنۋ، ءوزىن الۋەتتەندىرۋ قۋاتىن جوعارىلاتۋ، وسىزاماندانعان كاسىپ سالاسى جۇيەسىن قۇرۋ، قالا، اۋىل وڭىرلەرىنىڭ سايكەستى دامۋىن جەبەۋ سياقتى جاقتاردا ۇزدىكسىز بۇكىل ەلدىڭ الدىڭعى لەگىندە ءجۇرۋى، جۇڭگو ۇلگىسىندەگى وسىزامانداندىرۋ قۇرىلىسىن ىلگەرىلەتۋدە الدىڭعى لەكتە ءجۇرۋى كەرەك.

　　4 - ايدىڭ 10 - كۇنىنەن 13 - كۇنىنە دەيىن، شي جينپيڭ جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، گۋاڭدۇڭ ولكەلىك پارتكومنىڭ شۋجيى حۋاڭ كۇنميڭنىڭ جانە ولكە باستىعى ۋاڭ ۋيجۇڭنىڭ سەرىك بولۋىندا ىلگەرىندى - كەيىندى جانجياڭ، ماۋميڭ، گۋاڭجوۋ سياقتى جەرلەرگە بارىپ، كاسىپورىن، پورت، اۋىل - قىستاق سياقتىلاردى ىشكەرىلەي ارالاپ، تەكسەرۋ - زەرتتەۋ جۇرگىزدى.

　　4 - ايدىڭ 10 - كۇنى تۇستەن بۇرىن شي جينپيڭ الدىمەن جانجياڭ قالاسىنىڭ دۇڭحاي ارالىنا ورنالاسقان مەملەكەتتىڭ 863 جوسپار نىسانى بولعان تەڭىز سۋى باعىمشىلىعى، تۇقىم شارۋاشىلىعى ينجەنەرياسىنىڭ وڭتۇستىك بازاسىندا قىزمەت تەكسەردى. شي جينپيڭ گۋاڭدۇڭ ولكەسىنىڭ تەڭىز - مۇحيت بالىق شارۋاشىلىعىنىڭ دامۋ جاعدايى جونىندەگى تانىستىرۋدى تىڭداپ، بالىق شارۋاشىلىعى سورتتى تۇقىم كورمەسىن كورىپ، سول ورىنداعى عىلمي زەرتتەۋ جانە باعىمشىلىق قىزمەتكەرلەرىنەن سۇرىپتاۋ - جەتىلدىرۋ تەحنيكاسى، تۇقىمدىق شاباقتاردىڭ ءوسۋ جاعدايى، بازار باعاسى سياقتىلاردى سۇراپ ۇعىستى. شي جينپيڭ بىلاي دەپ اتاپ كورسەتتى: جۇڭگو ءبىر ميلليارد 400 ميلليوننان استام جان سانى بار ءىرى ەل، ىشەر اس ماسەلەسىن ويداعىداي شەشۋدە، استىق حاۋىپسىزدىگىن قامتاماسىز ەتۋدە جالپىلىق ازىق - تۇلىك كوزقاراسىن ورناتىپ، ءارى قۇرلىقتان ازىق - تۇلىك الۋ، ءارى تەڭىز - مۇحيتتان ازىق - تۇلىك الۋ، تەڭىز-مۇحيتتىڭ كومەسكى كۇشىن اشىپ، تەڭىز ءۇستى فەرماسىن، ”كوك استىق قامباسىن“ قۇرۋ كەرەك. تۇقىم شارۋاشىلىعى − وسى زامانعى اۋىل شارۋاشىلىعىن، بالىق شارۋاشىلىعىن دامىتۋدىڭ نەگىزى، وسى قىزمەتتەردى ەگجەي - تەگجەيلى، ويداعىداي ىستەۋ كەرەك. تەرەڭ تەڭىز باعىمشىلىعىن جابدىقتاۋدى جانە زەردەلى بالىق شارۋاشىلىعىن كۇش سالا دامىتىپ، تەڭىز - مۇحيت بالىق شارۋاشىلىعىنىڭ ينفورماتسيالانۋعا، زەردەلىلەنۋگە، وسىزاماندانۋعا قاراي تيبىن وزگەرتىپ، دارەجەسىن ءوسىرۋدى ىلگەرىلەتۋ كەرەك.

　　جانجياڭ قىزىل اعاش ورمانى مەملەكەت دارەجەلى جاراتىلىستىق قورىعى − ەلىمىزدەگى قىزىل اعاش ورمانىنىڭ اۋدانى ەڭ ۇلكەن، تارالۋى ەڭ شوعىرلى جاراتىلىستىق قورىق. شي جينپيڭ قورىقتىڭ شىعىس بولىگىندەگى ماجاڭ رايونى حۋگۋاڭ قالاشىعى جيننيۋداۋ قىزىل اعاش ورمانى اۋماعىنا كەلىپ، قىزىل اعاش ورمانىنىڭ ءوسۋ جاعدايىن جانە توڭىرەگىنىڭ ەكولوگيالىق ورتاسىن كوردى. ول بىلاي دەپ باسا دارىپتەدى: وسى قىزىل اعاش ورمانى ”مەملەكەتتىڭ اسىل قازىناسى“، ونى كوز قاراشىعىمىزدى قورعاعانداي ويداعىداي قورعاۋىمىز كەرەك. تەڭىز - مۇحيت ەكولوگيالىق وركەنيەت قۇرىلىسىن كۇشەيتۋ − ەكولوگيالىق وركەنيەت قۇرىلىسىنىڭ ماڭىزدى قۇرامداس بولىگى. جاسىل دامۋعا تاباندى بولىپ، ۇرپاقتان - ۇرپاققا جالعاپ ىستەپ، ۇزدىكسىز قاجىماي كۇش سالىپ، كورىكتى جۇڭگو قۇرىپ، جەر شارى قىستاعىن ويداعىداي قورعاۋعا جۇڭگو ۇلەسىن قوسۋىمىز كەرەك.

　　4 - ايدىڭ 10 - كۇنى تۇستەن كەيىن شي جينپيڭ جانجياڭ قالاسىنىڭ شۇيۋىن اۋدانىنا كەلىپ، شۇيۋىن پورتىندا قىزمەت تەكسەردى. شۇيۋىن پورتى نىسانى − گۋاڭدۇڭ مەن حايناننىڭ ءبىر بەتالىسپەن جۇرگەن ”ءبىرىنشى ءنومىرلى ينجەنەرياسى“. پورتتىڭ ارناۋلى كەمەجايىندا شي جينپيڭ شۇيۋىن پورتىنىڭ جالپى بەينەسىن كورىپ، گۋاڭدۇڭ ولكەسىنىڭ قاتىناس نەگىزدىك قۇرىلعىلارىن ۇلاستىرۋ، تۇتاستىرۋ دەڭگەيىن جوعارىلاتۋ، حاينان ەركىن ساۋدا پورتى قۇرىلىسىمەن ءبىر بەتالىستا دامۋدى ءتۇيىلىستىرۋ سياقتى قىزمەتتەر جونىندەگى مالىمەتىن تىڭدادى. وسىدان سوڭ، شي جينپيڭ كەمەجايعا كەلىپ، كەمە توقتاتۋ، جولاۋشىلاردى تاسۋ، جەتكىزۋ، قابىلداۋ سياقتىلاردى كوردى. كەمەدەگى جولاۋشىلار باس شۋجيدىڭ كەلگەندىگىن كورگەندە، جاپا - تارماعاي باس شۋجيگە امانداستى، شي جينپيڭ كوپشىلىككە قول بۇلعاپ قۇرمەت ءبىلدىرىپ، ولارعا ءسات ساپار تىلەدى. شي جينپيڭ بىلاي دەپ اتاپ كورسەتتى: چيۇڭجوۋ بۇعازى − مەملەكەتتىڭ نانحايدى باسقارۋداعى ستراتەگيالىق ارناسى ءارى حاينان ەركىن ساۋدا پورتىنىڭ قۇرىلىسى مەن دامۋىنداعى ماڭىزدى جول تورابى، ”التىن سۋ ارناسى“ مەن جولاۋشى، زات تاسىمالىنىڭ ەڭ تاماشا ارناسى سىندى وسى ۇلكەن ءىستى ويداعىداي ىستەپ، شۇيۋىن پورتىن گۋاڭدۇڭ − شياڭگاڭ − اۋمىن ۇلكەن شىعاناق رايونى مەن حاينان ەركىن ساۋدا پورتىن تۇتاستىراتىن وسىزاماندانعان سۋ - قۇرلىق قاتىناس - تاسىمال كەشەندى تورابى ەتىپ قۇرىپ شىعۋ كەرەك.

　　شۇيۋىن پورتىنان اتتانعاننان كەيىن شي جينپيڭ بەيبۋۋان شىعاناعىن اينالا ورنالاسقان گۋاڭدۇڭ سۋ بايلىعىن ۇلەستىرۋ ينجەنەرياسىنىڭ وڭتۇستىككە سۋ جەتكىزۋ ءتۇيىلىس پۋنكتى − شۇيۋىن داشۇي كوپىرى سۋ قويماسىنا كەلىپ، ينجەنەريا قۇرىلىسى، باسقارۋ، اينالىم جانە ينجەنەريانىڭ سوڭعى جوباسى سياقتى جاعدايلاردى ۇعىستى. قىزمەتكەرلەر باس شۋجيگە سۋ ۇلگىسى جانە باقىلاۋ - ولشەۋ جابدىقتارىن كورسەتىپ، سول ماڭنىڭ ەكولوگيالىق ورتاسىن قورعاۋدى كۇشەيتۋ سياقتى جاعدايلاردان مالىمەت بەردى. شي جينپيڭ بىلاي دەپ اتاپ كورسەتتى: ەلىمىزدە سۋ تاپشى، ونىڭ ۇستىنە سۋ بايلىعىنىڭ ورنالاسۋى تىم بىركەلكى ەمەس. جۇڭگو ۇلگىسىندەگى وسىزامانداندىرۋدى ىلگەرىلەتۋدە سۋ بايلىعى ماسەلەسىن ويلاستىرىپ، سۋ جاعدايىنا قاراي قالانى تۇراقتاندىرىپ، سۋ جاعدايىنا قاراي جەردى تۇراقتاندىرىپ، سۋ جاعدايىنا قاراي ادامدى تۇراقتاندىرىپ، سۋ جاعدايىنا قاراي كاسىپ سالاسىن تۇراقتاندىرىپ، سۋ ۇنەمدەيتىن كاسىپ سالاسىن دامىتۋ كەرەك. گۋاڭدۇڭ سۋ بايلىعىن ساپالى ۇلەستىرۋدى ويداعىداي يگەرىپ، سۋ بايلىعىن ۇلەستىرۋ ينجەنەرياسى قۇرىلىسىن جەدەل جاپپاي ىلگەرىلەتىپ، وڭىرلىك دامۋدىڭ بىركەلكى بولماۋ ماسەلەسىن شەشۋدى ىلگەرىلەتىپ، قالىڭ حالىق بۇقاراسىن ەرتەرەك باقىتقا كەنەلتۋى كەرەك.

　　شي جينپيڭ 4 - ايدىڭ 11 - كۇنى ماۋميڭنىڭ گاۋجوۋ قالاسى گىنزى قالاشىعى بايچياۋ قىستاعىنا كەلىپ قىزمەت تەكسەردى، تەكسەرۋ - زەرتتەۋ جۇرگىزدى. بايچياۋ قىستاعى − شامامەن 6800 مۋ جەرگە ليجى ەككەن، ليجى وندىرەتىن كاسىپتىك قىستاق. شي جينپيڭ ليجى ەگىمشىلىگى باعىنا بارىپ، جەرگىلىكتى ورىننىڭ ەرەكشە ەگىمشىلىك كاسىپ سالاسىن جانە مادەنيەت - ساياحات كاسىپ سالاسىن دامىتۋ سياقتى جاعدايلارىن ۇعىستى ءارى سول ورىنداعى تەحنيكتەرمەن ىقىلاسپەن اڭگىمەلەستى. ونان سوڭ، شي جينپيڭ بايچياۋ لۇڭيان ليجى كاسىپتىك سەلبەستىك كووپەراتيۆىنە كەلىپ، سەلبەستىك كووپەراتيۆىنىڭ اينالىم جانە اۋىل - قىستاقتى گۇلدەندىرۋدى ىلگەرىلەتۋ سياقتى جاعدايلارى جونىندەگى تانىستىرۋدى تىڭدادى. شي جينپيڭ بىلاي دەپ اتاپ كورسەتتى: بۇل ارا ليجى مەكەنى، ليجى ەگىمشىلىگى تاريحي ۇلاسپالىلىققا جانە مادەنيەت نەگىزىنە يە، ەرەكشەلىگى ايقىن، ابزالدىلىعى كورنەكتى، بازار ءورىسى كەڭ، ەگۋ، جاستاي ساقتاۋ، وڭدەۋ سياقتى تەحنيكالاردى ونان ارى جوعارىلاتىپ، ليجى ەرەكشە كاسىپ سالاسى مەن ەرەكشە مادەنيەت ساياحاتىن اناعۇرلىم ويداعىداي دامىتۋ كەرەك.

　　اتتاناردا قىستاق تۇرعىندارى ”باس شۋجي سالەمەتسىز بە؟“، ”باس شۋجي جاپا شەكتىڭىز“ دەپ الاقايلادى. شي جينپيڭ ىقىلاستى تۇردە كوپشىلىككە بىلاي دەدى: بۇل مەنىڭ گۋاڭدۇڭنىڭ باتىس وڭىرىنە تۇڭعىش رەت كەلۋىم، اۋىلداستاردىڭ ليجى سياقتى ەرەكشە ەگىمشىلىك كاسىبىن دامىتۋ ارقىلى اۋقاتتى تۇرمىس كەشىرگەندىگىن كورىپ، كوڭىلىم قاباعات جاي تاپتى. جۇڭگو ۇلگىسىندەگى وسىزامانداندىرۋدى ىلگەرىلەتۋدە، ءسوز جوق، اۋىل - قىستاقتى گۇلدەندىرۋدى جاپپاي ىلگەرىلەتىپ، قالا مەن اۋىل ءوڭىرىنىڭ دامۋى بىركەلكى بولماۋ ماسەلەسىن ويداعىداي شەشۋ كەرەك. بىرگە بايۋ جولىمەن جۇرۋگە تاباندى بولىپ، ارتتاعىلارعا كومەكتەسۋدى جانە ولاردى سۇيەمەلدەۋدى كۇشەيتىپ، اۋىل سالتى وركەنيەتىن ىلگەرىلەتىپ، اۋىل - قىستاق ورتاسىن رەتتەۋ - وڭاۋ مەن ەكولوگيالىق ورتانى قورعاۋدى كۇشەيتىپ، كوپشىلىكتىڭ تۇرمىسىنىڭ جىلدان - جىلعا جاقسارۋىنا مۇمكىندىك جاساۋ كەرەك.

　　شي جينپيڭ 4 - ايدىڭ 12 - كۇنى گۋاڭجوۋ قالاسىندا قىزمەت تەكسەردى، تەكسەرۋ - زەرتتەۋ جۇرگىزدى. سول كۇنى تۇستەن كەيىن، ول الدىمەن لىجين سۇيىق كريستالدى ەكران شەكتى سەرىكتەستىگى گۋاڭجوۋ جاساۋ بازاسىنا باردى. گۋاڭدۇڭ ولكەسىنىڭ قاتىستى جاۋاپتى جولداستارى تۇتاس ولكەنىڭ تاياۋ جىلدان بەرى ەل ءىشى، حالىقارا سىندى ەكى بازاردىڭ، ەكى ءتۇرلى بايلىقتىڭ ىقپالداستىق اسەرىن كۇشەيتۋ، ساۋدا، قارجى قوسۋ سەلبەستىگىنىڭ ساپاسى مەن دەڭگەيىن جوعارىلاتۋ سياقتى جاقتارداعى ادىستەرى مەن تابىستارىن تانىستىردى. شي جينپيڭ ونىمدەر كورمەسى مەن ءوندىرۋ، قۇراستىرۋ بارىسىن كورىپ، كاسىپورىننىڭ دامۋىندا قول جەتكىزگەن جەتىستىكتەرىن القادى. شي جينپيڭ بىلاي دەپ باسا دارىپتەدى: الەمدىك ەكونوميكانىڭ ارتۋى دارمەنسىز بولۋ جاعدايىندا جۇڭگو جاڭا دامۋ ارناسىن جەدەل قالىپتاستىرىپ، شارۋاشىلىق - ساۋدا ورتاسى قۇرىلىسىن كۇشەيتىپ، بازار باسىمدىعىن اناعۇرلىم كورنەكتىلەندىردى. شەتەلدىك قارجى قوسۋشىلاردىڭ ورايدى يگەرىپ، جۇڭگوعا كەلىپ، گۋاڭدۇڭعا كەلىپ، گۋاڭدۇڭ − شياڭگاڭ − اۋمىن ۇلكەن شىعاناق رايونىنا كەلىپ، جۇڭگو بازارىن تەرەڭ اشىپ، كاسىپورىن دامۋىنىڭ جاڭا شۇعىلالى ناتيجەسىن جاراتۋىن ءۇمىت ەتەمىن.

　　شي جينپيڭ وسىدان سوڭ گۋاڭجوۋ اۆتوكولىك توبى اي - ان جاڭا ەنەرگيا اۆتوكولىك جارنا شەكتى سەرىكتەستىگىندە قىزمەت تەكسەردى. ول كاسىپورىننىڭ كورمە زالى، باس قۇراستىرۋ سەحى، باتارەيا ءوندىرۋ سەحى سياقتىلاردى ارالاپ، كاسىپورىننىڭ شەشۋشى، وزەكتى تەحنيكالاردان قامال الۋ جانە جاساۋ كاسىبىنىڭ جوعارى دەڭگەيلىلەنۋىن، زەردەلىلەنۋىن، جاسىلدانۋىن ىلگەرىلەتۋ سياقتى جاقتارداعى اياق الىس جاعدايىن ۇعىستى. گۋاڭجوۋ اۆتوكولىك توبى زەرتتەۋ ورنىندا شي جينپيڭ زەردەلى توراپتىق تۇتاستىرۋ تاجىريبەحاناسى، مودەل جوبالاۋ تاجىريبەحاناسى سياقتىلاردى تاپتەشتەي كوردى ءارى عىلىم - تەحنيكا قىزمەتكەرلەرى، كاسىپورىنشىلار، جۇمىسشى - قىزمەتشىلەر، شەتەل قارجى قوسقان كاسىپورىن ۋاكىلدەرى قاتارلىلارمەن اڭگىمەلەستى. شي جينپيڭ بىلاي دەپ اتاپ كورسەتتى: جۇڭگونىڭ رەفورما جاساۋ، ەسىك اشۋ ساياساتى ۇزاق ۋاقىت وزگەرمەيدى، اشقان قاقپاسىن ەشقاشان ءوزى بەكىتىپ تاستامايدى. بىزبەن سەلبەستىك جاساسىپ، تەڭ يگىلىككە كەنەلۋگە پەيىل مەملەكەتتىڭ بارىمەن ءبىز ءبىر بەتالىستا ءجۇرىپ، دۇنيە ءجۇزى ەكونوميكاسىنىڭ بىرگە گۇلدەنۋىن، دامۋىن ىلگەرىلەتۋگە پەيىلمىز. شي جينپيڭ بىلاي دەپ باسا دارىپتەدى: جۇڭگو ءىرى ەل، ناقتى ەكونوميكاعا ءمان بەرىپ، ءوز كۇشىنە سۇيەنىپ ءومىر ءسۇرۋ جولىمەن جۇرەدى. شەشۋشى، وزەكتى تەحنيكالاردا دەربەس زەرتتەپ اشۋدى تياناق ەتۋ ءارى حالىقارالىق سەلبەستىكتى قارسى الۋ كەرەك. وقۋ - اعارتۋدى جانە دارىندى باۋلۋدى كۇشەيتىپ، عىلىم - تەحنيكادا ءوز كۇشىنە سۇيەنۋ، ءوزىن الۋەتتەندىرۋ نەگىزىن بەكەمدەۋ كەرەك.

　　4 - ايدىڭ 13 - كۇنى تۇستەن بۇرىن شي جينپيڭ گۋاڭدۇڭ ولكەلىك پارتكوم مەن ولكەلىك ۇكىمەتتىڭ قىزمەت مالىمەتىن تىڭداپ، گۋاڭدۇڭنىڭ ءتۇرلى قىزمەتتەردە قول جەتكىزگەن ناتيجەلەرىن تۇراقتاندىردى.

　　شي جينپيڭ بىلاي دەپ اتاپ كورسەتتى: گۋاڭدۇڭ − شياڭگاڭ − اۋمىن ۇلكەن شىعاناق رايونى بۇكىل ەلدىڭ جاڭا دامۋ ارناسىندا ماڭىزدى ستراتەگيالىق ورىنعا يە. گۋاڭدۇڭ پارتيا ورتالىق كوميتەتىنىڭ شەشىمدەرىن، ورنالاستىرۋلارىن مۇقيات دايەكتىلەندىرىپ، گۋاڭدۇڭ − شياڭگاڭ − اۋمىن ۇلكەن شىعاناق رايونى قۇرىلىسىن گۋاڭدۇڭنىڭ رەفورما جاساۋدى، ەسىك اشۋدى تەرەڭدەتۋىنىڭ ۇلكەن ورايى، ۇلكەن جۇمىسى رەتىندە مىقتى يگەرىپ، ناقتى ىستەپ، بارىنەن ماڭىزدى ورىنعا قويىپ، جۋجياڭ اتىراۋىن نەگىزگى شەپ ەتىپ، بۇكىل ولكەنىڭ كۇشىن شوعىرلاندىرا وتىرىپ وسى ءىرى ءىستى ويداعىداي ىستەپ، گۋاڭدۇڭ − شياڭگاڭ − اۋمىن ۇلكەن شىعاناق رايونىن جاڭا دامۋ ارناسىنىڭ ستراتەگيالىق تىرەگىنە، جوعارى ساپالى دامۋدىڭ ۇلگى كورسەتەتىن جەرىنە، جۇڭگو ۇلگىسىندەگى وسىزامانداندىرۋدىڭ جەتەكشى جەرىنە اينالدىرۋ كەرەك.

　　شي جينپيڭ بىلاي دەپ باسا دارىپتەدى: جوعارى دەڭگەيدەگى عىلىم - تەحنيكادا ءوز كۇشىنە سۇيەنۋ، ءوزىن الۋەتتەندىرۋدى جۇزەگە اسىرۋ − جۇڭگو ۇلگىسىندەگى وسىزامانداندىرۋ قۇرىلىسىنىڭ شەشۋشى ءتۇيىنى. دامۋعا جاڭالىق اشۋ ارقىلى دەم بەرۋ ستراتەگياسىن ىشكەرىلەي اتقارىپ، وڭىرلىك جاڭالىق اشۋ جۇيەسى قۇرىلىسىن كۇشەيتىپ، دەربەس جاڭالىق اشۋ قابىلەتىن ونان ارى ءوسىرىپ، شەشۋشى، وزەكتى تەحنيكالىق قيىن ماسەلەلەردەن قامال الۋدا اناعۇرلىم زور ىلگەرىلەۋشىلىكتەرگە قول جەتكىزۋگە قۇلشىنۋ كەرەك. ورتا، شاعىن كاسىپورىنداردىڭ جاڭالىق اشۋىن قولداۋدى كۇشەيتىپ، اناعۇرلىم كوپ دەربەس ءبىلىم مەنشىك ۇقىعىنا جانە وزەكتى باسەكەلىك قۋاتقا يە جاڭاشىل كاسىپورىنداردى جەتىلدىرۋ كەرەك. كاسىپورىنداردىڭ تۇلعالىق ورنىن كۇشەيتىپ، جاڭالىق اشۋ تىزبەگىنىڭ، كاسىپ سالاسى تىزبەگىنىڭ، قارجى تىزبەگىنىڭ، دارىندى تىزبەگىنىڭ تەرەڭدەي توعىسۋىن ىلگەرىلەتىپ، عىلىم - تەحنيكا جەتىستىكتەرىن كادەگە جاراتۋ جانە كاسىپ سالالاندىرۋ دەڭگەيىن ۇزدىكسىز جوعارىلاتىپ، الەمدىك ىقپالعا يە كاسىپ سالاسى عىلىم - تەحنيكاسىندا جاڭالىق اشۋ ورتالىعىن تۇلعالاۋ كەرەك. گۋاڭدۇڭ − شياڭگاڭ − اۋمىن ۇلكەن شىعاناق رايونى دارىندىلار بيىگى قۇرىلىسىن ىلگەرىلەتىپ، وزىق عىلىم - تەحنيكادا جاڭالىق اشۋ دارىندىلارى توپتاسۋ اسەرىن قالىپتاستىرۋ كەرەك.

　　شي جينپيڭ بىلاي دەپ اتاپ كورسەتتى: جۇڭگو ۇلگىسىندەگى وسىزامانداندىرۋدا امالياتتان الشاقتاپ، جالعاندىققا بەت العان جولمەن جۇرۋگە بولمايدى، ءسوزسىز، ناقتى ەكونوميكانى تىرەك ەتكەن وسىزاماندانعان كاسىپ سالاسى جۇيەسىن قۇرۋدى جەدەلدەتۋ كەرەك. گۋاڭدۇڭ باستان - اياق جاساۋ كاسىبى ارقىلى ولكەنى كوركەيتۋگە تاباندى بولىپ، ناقتى ەكونوميكانى دامىتۋعا اناعۇرلىم ءمان بەرىپ، كاسىپ سالاسىنىڭ تيبىن وزگەرتىپ، دەڭگەيىن ءوسىرۋدى جەدەلدەتىپ، كاسىپ سالاسى نەگىزىنىڭ جوعارى دارەجەلىلەنۋىن، كاسىپ سالاسى تىزبەگىنىڭ وسىزاماندانۋىن ىلگەرىلەتىپ، ستراتەگيالىق سيپاتتى جاڭادان گۇلدەنگەن كاسىپ سالاسىن دامىتىپ، اناعۇرلىم حالىقارالىق باسەكەلىك قۋاتقا يە وسىزاماندانعان كاسىپ سالاسى جۇيەسىن قۇرۋ كەرەك.

　　شي جينپيڭ بىلاي دەپ باسا دارىپتەدى: جالپى حالىقتىڭ بىرگە بايۋى − جۇڭگو ۇلگىسىندەگى وسىزامانداندىرۋدىڭ ماندىك ەرەكشەلىگى، وڭىرلەردىڭ سايكەستى دامۋى − بىرگە بايۋدى جۇزەگە اسىرۋدىڭ قاجەتتى تالابى. گۋاڭدۇڭ وڭىرلەردىڭ دامۋىنداعى بىركەلكىسىزدىك ماسەلەسىن كۇش سالا شەشىپ، قاتىناس سياقتى نەگىزدىك قۇرىلعىلاردىڭ وڭىرلىك تۇتاسۋىن، ۇلاسۋىن جەدەل ىلگەرىلەتىپ، گۋاڭدۇڭنىڭ شىعىسىنداعى، گۋاڭدۇڭنىڭ باتىسىنداعى، گۋاڭدۇڭنىڭ سولتۇستىگىندەگى وڭىرلەردىڭ جۋجياڭ اتىراۋى وڭىرىندەگى كاسىپ سالاسىنىڭ تارتىپپەن كوشىرىلۋىن اناعۇرلىم ويداعىداي قابىلداۋىنا جەتەكشىلىك ەتۋى جانە ىلگەرىلەتۋى كەرەك. قۇرلىق پەن تەڭىزدى ءبىر تۇتاس جوسپارلاۋدى، تاۋلى وڭىرلەر مەن تەڭىز جاعالاۋى وڭىرلەرىنىڭ ءوزارا سەلبەسۋىن كۇشەيتىپ، پورتتى، كاسىپ سالاسىن، قالانى جالپى تۇلعالىق جاقتان ورنالاستىرۋدى كۇشەيتىپ، تەڭىز - مۇحيت ەكولوگياسىن قورعاۋدى كۇشەيتىپ، جاپپاي تەڭىز - مۇحيتتا قۋاتتى ولكە قۇرۋ كەرەك. اۋدان ورتالىعىن ماڭىزدى دانەكەر ەتكەن جاڭاشا قالا - قالاشىقتاندىرۋ قۇرىلىسىن بەلسەنە ىلگەرىلەتىپ، وسى زامانعى اۋىل - قىستاق كاسىپ سالاسى جۇيەسىن جەدەل قۇرىپ، جاڭاشا اۋىل - قىستاق كوللەكتيۆ شارۋاشىلىعىن دامىتىپ، اۋىل - قىستاق قۇرىلىسى ارەكەتىن ىشكەرىلەي اتقارىپ، بىرگە بايۋدى جەبەۋ كەرەك. قايتا كەدەيلەسۋدەن ساقتانۋدى يكەمدى باقىلاۋ - تەكسەرۋدى جانە ۇدايىلانعان كومەكتەسىپ - سۇيەمەلدەۋدى ۇزدىكسىز ويداعىداي ىستەپ، قايتا كەدەيلەسۋدىڭ تۋىلۋىنان ساقتانۋ كەرەك.

　　شي جينپيڭ بىلاي دەپ اتاپ كورسەتتى: نەگىزگى تاقىرىپتىق تاربيە ورىستەتۋ − بيىلعى پارتيا قۇرىلىسىنىڭ كەلەلى مىندەتى. ءار دارەجەلى پارتيا ۇيىمدارى پارتيا ورتالىق كوميتەتىنىڭ قىزمەت ورنالاستىرۋىن باتىل دايەكتىلەندىرىپ، تياناقتاندىرىپ، پارتيا مۇشەلەرىن، كادرلاردى ۇيرەنۋ ارقىلى رۋحتى سومداۋعا، ۇيرەنۋ ارقىلى پاراساتتى ارتتىرۋعا، ۇيرەنۋ ارقىلى ستيلدى دۇرىستاۋعا، ۇيرەنۋ ارقىلى ىستەۋدى جەبەۋگە كۇش سالىپ، ناقتى ونىمدىلىككە قول جەتكىزۋگە تاربيەلەۋى، جەتەكتەۋى كەرەك. ۇيرەنۋ ارقىلى رۋحتى سومداۋ دەگەنىمىز جاڭا ءداۋىر جۇڭگوشا سوتسياليزم يدەياسىن ۇيرەنۋدى، دايەكتىلەندىرۋدى تەرەڭدەتۋ، كوكەيگە ۇيالاتۋ، كادەگە جاراتۋ قىزمەتىن ويداعىداي ىستەپ، يدەيالىق جاقتان توركىنىن تۇزەپ، قاينارىن تازالاپ، وزەكتى بەكەمدەپ، نەگىزدى جەتىلدىرىپ، سەنىم نەگىزىن بەكەمدەپ، رۋحاني كالتسيدى تولىقتاپ، يدەيالىق رولدى مىقتى ۇستاۋ. ءبىرىنشى، مۇرات - سەنىمدى بەكەمدەپ، پارتيانىڭ قۇن تالپىنىسى مەن العا ىلگەرىلەۋ بەتالىسىنا دەگەن ايرىقشا ساياسي شىنايى مويىنداۋدى كۇشەيتىپ، دۇنيە كوزقاراسى، ءومىر كوزقاراسى، قۇن كوزقاراسى سىندى ”باس تيەكتى“ ويداعىداي يگەرۋ كەرەك. ەكىنشى، پارتياعا ادالدىقتى بەرىك ورناتۋ، پارتيانىڭ جالپى بەتتىك باسشىلىعىنا سانالى تاباندى بولۋ، پارتيا ورتالىق كوميتەتىنىڭ بەدەلى مەن ورتالىقتانعان ءبىر تۇتاس باسشىلىعىن باتىل قورعاۋ، ساياسي تۇجىرىمداۋ قابىلەتىن، ساياسي ءتۇسىنۋ قابىلەتىن، ساياسي اتقارۋ قابىلەتىن ۇزدىكسىز جوعارىلاتىپ، قاي - قاشان دا ساياسي تۇرعىدا، ساياسي بەتالىستا، ساياسي پرينسيپتە، ساياسي جولدا پارتيا ورتالىق كوميتەتىمەن وسكەلەڭ ءبىر اۋىزدىلىقتى ساقتاۋ، پارتياعا ادال بولۋدى پارتيا ورتالىق كوميتەتىنىڭ شەشىمدەرىن، ورنالاستىرۋلارىن ويداعىداي دايەكتىلەندىرۋ، تياناقتاندىرۋ ناقتى ارەكەتىندە بەينەلەۋ كەرەك. ءۇشىنشى، حالىق تۇرعىسىنان بۇلجىماي، باس ماقسات تانىمىن كۇشەيتىپ، اۋەلگى ماقساتتان، بورىشتان اينىماي، پارتيانىڭ بۇقارالىق لۋشيانىن امالياتتا ايگىلەپ، حالىق بۇقاراسىنىڭ رازى بولۋ - بولماۋىن نەگىزگى تاقىرىپتىق تاربيەنىڭ ونىمدىلىگىن باعالاۋدىڭ ءتۇبىرلى ولشەمى ەتىپ، حالىق بۇقاراسى ەڭ كوڭىل بولەتىن، ەڭ تىكە، ەڭ رەال مۇددە ماسەلەلەرىن ويداعىداي شەشىپ، حالىق تۇرمىسىنا تيىمدىلىك جەتكىزەتىن ىستەردى ناقتى ىستەپ، جۇرت جۇرەگىن جىلىتاتىن ىستەردى ەگجەي - تەگجەيلى ىستەپ، ەل رايىنا جاعاتىن ىستەردى ويداعىداي ىستەپ، وسىزامانداندىرۋ قۇرىلىسىنىڭ جەتىستىكتەرىنەن بۇكىل حالىقتى اناعۇرلىم كوپ، اناعۇرلىم ءادىل يگىلىكتەندىرۋ كەرەك.

　　جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي قىزمەت تەكسەرۋدە بىرگە بولدى.

　　لي گانجيە، حى ليفىڭ، سونداي - اق ورتالىق پەن مەملەكەت ورگاندارىنىڭ قاتىستى تاراۋلارىنىڭ جاۋاپتى جولداستارى قىزمەت تەكسەرۋدە بىرگە بولدى، نەگىزگى تاقىرىپتىق تاربيە بويىنشا ورتالىق 7 - جەتەكشىلىك ەتۋ گرۋپپاسىنىڭ جاۋاپتى جولداستارى مالىمەت بەرۋ ماجىلىسىنە قاتىناستى.

جالعانىم