انار بۇلت \ شينجياڭ گازەتىنىڭ ٴتىلشىسى ليۋ ي 5 ـ ايدىڭ 22 ـ كۇنى ۇرىمجىدەن حابارلايدى. 2024 ـ جىلعى جازعى استىق ساتىپ الۋ بويىنشا اتتانىسقا كەلتىرۋ، ورنالاستىرۋ ماجىلىسىنەن ۇعىسۋىمىزشا، بيىل شينجياڭ جازعى استىق ساتىپ الۋ قىزمەتىن 6 ـ ايدىڭ ورتا شەنىندە باستاۋدى جوسپارلاعان، بۇكىل رايون بويىنشا مەجەمەن 3 ميلليون 650 مىڭ توننا اينالاسىندا ٴبيداي ساتىپ الىنىپ، ساتىپ الۋ مولشەرى اۋەلگىدەي تاريحتاعى ەڭ جوعارى دەڭگەيدى ساقتايدى ەكەن.
تانىستىرۋعا قاراعاندا، بيىل شينجياڭنىڭ تۇسىرگەن استىق ٴوندىرۋ نىسانا مىندەتى 44 ميلليون مۋ بولىپ (بيڭتۋاندى قامتيدى)، سايكەس مەزگىلدەگىدەن %4 ارتقان. مۇنىڭ ىشىندە ٴبيداي ٴبىر ميلليون 640 مىڭ مۋ ازايىپ، جۇگەرى 3 ميلليون 540 مىڭ مۋ ارتقان. مەجەمەن بيىل بۇكىل رايوننىڭ ٴبيداي ٴونىم مولشەرى 6 ميلليون 500 مىڭ تونناعا، تۇتىنۋ مولشەرى 5 ميلليون 700 مىڭ تونناعا جەتىپ، بيدايمەن جالپىلىق قامداۋ جەتكىلىكتى بولىپ، قامداۋ قاجەتسىنۋدەن ارتىق بولعان كۇيدى ساقتايدى ەكەن.
”شينجياڭدا ٴبيدايدىڭ قامباداعى قورى ٴالى دە ٴبىرشاما جوعارى، استىقتىڭ قامباداعى قورى جەتكىلىكتى“. اۆتونوميالى رايوندىق استىق جانە زاتتىق ماتەريال قورى مەكەمەسى استىق قورى باسقارماسىنىڭ باستىعى ديڭ باۋدىڭ بىلاي دەدى: جاڭا استىقتىڭ ٴتۇيىر ٴدانىن دە قالدىرماي قامباعا الۋعا شىنايى كەپىلدىك ەتۋ ٴۇشىن، بيىل شينجياڭ سيىمدىلىعى 500 مىڭ توننادان تومەن بولمايتىن قامبا سالۋدى جوسپارعا الدى، قازىر قۇرىلىس باستاعان 14 نىساننىڭ قامبا سيىمدىلىعى 492 مىڭ توننا. بۇكىل رايونداعى استىق ساتىپ الاتىن كاسىپورىندار قىزمەتكەر باۋلۋ، قامبانى بوساتۋ ـ بىرىكتىرۋ، جابدىقتاردى تەكسەرۋ ـ رەمونتتاۋ سياقتى ٴتۇرلى دايىندىق قىزمەتتەردى بەلسەنە ورىستەتىپ، ”جاسىل قامبالاۋدى جوعارىلاتۋ ارەكەتى“ سىندى ساپالى استىق ينجەنەرياسىمەن ۇشتاستىرىپ، نەگىزگى ساتىداعى استىق پۋنكتتەرىنىڭ قامبالارىن جانە جايۋ ـ كەپتىرۋ الاڭدارىن جوندەپ، استىقتى قامباعا الۋ، ساقتاۋ قۋاتىن جوعارىلاتىپ، استىق ٴونىمى ارتقاننان كەيىن ”استىق قامبالايتىن قامبا بار بولۋعا“ پارمەندى تىرەك ازىرلەدى.
سونىمەن بىرگە اۆتونوميالى رايوندىق استىق جانە زاتتىق ماتەريال قورى مەكەمەسى اۋىل شارۋاشىلىعىن دامىتۋ بانكەسى شينجياڭ بولىمشە بانكەسىمەن، شينجياڭ بانكەسىمەن جاقىندا ستراتەگيالىق سەلبەستىك كەلىسىمىنە قول قويىسىپ، استىق ساتىپ الۋ قارىز اقشاسى سەنىمدىلىك كەپىل قورىنىڭ رولىن تولىق ساۋلەلەندىرىپ، ساتىپ الاتىن كاسىپورىنداردىڭ ٴبيداي ساتىپ الۋ قارىز اقشاسىنىڭ ٴوسىمىن قازىنادان كوتەرۋ ساياساتىنان ويداعىداي، جاندى پايدالانۋعا، قارىز اقشا سەنىمدىلىك كەپىل قارجىسىن دەر كەزىندە تاپسىرۋعا جەتەكشىلىك ەتىپ، كاسىپورىنداردىڭ سەنىمدىلىك قارىز اقشاسىن سايكەستىرىپ، استىق ساتىپ العاندا اقشا دايىن بولۋدى ورىندادى.
جاقىندا اۆتونوميالى رايوندىق دامۋ جانە رەفورما كوميتەتى سياقتى 6 تاراۋ 2024 ـ جىلعى ٴبيدايدىڭ شۇعىل ساتىپ الۋ باعاسىن بىرگە جاريالاپ، شينجياڭنىڭ بيىل وندىرگەن 3 ـ دارەجەلى ٴبيدايىنىڭ شۇعىل ساتىپ الۋ باعاسىنىڭ ٴبىر كيلوگرامىنىڭ 2.36 يۋان، دارەجە پارقى بويىنشا 4 تيىن بولاتىندىعىن ايقىندادى. شينجياڭ شارۋاشىلىق ـ ساۋدا ورتاسىن اناعۇرلىم ساپالىلاندىرىپ، كوپ نەگىزدى تۇلعالاردىڭ بازارعا كىرىپ ساتىپ الۋىنا جەتەكشىلىك ەتىپ، ”استىق الاتىن ادام بولۋعا، استىق ساتىپ الاتىن اقشا بولۋعا، استىق جينايتىن قامبا بولۋعا، استىق تاسيتىن كولىك بولۋعا“ شىنايى كەپىلدىك ەتتى.
قازىرگە دەيىن، بۇكىل رايوندا استىق ساتىپ الۋ بويىنشا ارحيۆكە الىنعان كاسىپورىن 450گە جەتىپ، كوپ نەگىزدى تۇلعالار بازارعا بەلسەنە كىردى. جەر ـ جەر 11 ميلليارد 600 ميلليون يۋان استىق ساتىپ الۋ قارجىسىن كۇنى بۇرىن دايىنداپ، ساتىپ الۋ قارجىسىنىڭ قاجەتىن قاناعاتتاندىرادى.