شينحۋا اگەنتتىگىنىڭ تىلشىلەرى جۋ جيچاي، حۋاڭ يۋە

　　تەڭىزدە جەل تۇرىپ، تولقىن كوتەرىلدى، جەر مەن كوكتىڭ جيەگى كورىنبەيدى.

　　شاندۇڭ تۇبەگىنىڭ 3500 كيلومەتردەن اساتىن ۇزىننان ـ ۇزاققا سوزىلعان تەڭىز جاعالاۋى لەنياسىندا ۇلكەندى ـ كىشىلى 26 پورت جاعالاي ورنالاسقان. جاڭادان گۇلدەنگەن رىجاۋ پورتى بەينە حۋاڭحاي تەڭىزىنىڭ جاعالاۋىنا ورناتىلعان شۇعىلا شاشقان جاقۇت ىسپەتتى ەدى.

　　5 ـ ايدىڭ 22 ـ كۇنى تۇستەن كەيىن باس شۋجي شي جينپيڭ شاندۇڭدا قىزمەت تەكسەرگەندە الدىمەن رىجاۋ پورتىنا كەلدى. پورت رايونىن بويلاپ جاياۋ ٴجۇردى، بۇكىلدەي اۆتوماتتاندىرىلعان كونتينەر كەمەجايىنداعى جۇمىس جاعدايى باس شۋجيدىڭ نازارىن اۋداردى.

　　ۇشى ـ قيىرسىز الاپتا بيىك اسپا كراندار ۇزىن بىلەكتەرىن سوزىپ، كونتينەرلەردى جاعاداعى جۇك كەمەلەرىنەن دالمە ـ ٴدال ٴىلىپ الىپ، شوفەرسىز جۇك كولىكتەرىنە تيەۋدە، شوفەرسىز جۇك كولىكتەرى ارلى ـ بەرلى قايشالىسىپ، كونتينەرلەردى سايكەستى جينايتىن ورىنعا تاسىمالداۋدا...

　　شاندۇڭ پورت توبىنداعى جاۋاپتى جولداس باس شۋجيگە بىلاي دەدى: جۇڭگونىڭ تەڭىز جاعالاۋىنداعى پورتتارىنىڭ ىشىندە رىجاۋ پورتىنىڭ ٴۇش كورنەكتى ەرەكشەلىگى بار: ٴبىرىنشى، 1982 ـ جىلى عانا قۇرىلىس باستاعان، رەفورما جاساعاننان، ەسىك اشقاننان كەيىن جاڭادان سالىنعان پورت؛ ەكىنشى، دۇنيە جۇزىندەگى ”ەڭ جاس“ 500 ميلليون توننالىق دەڭگەيدەگى پورت، جىلدىق زات قابىلداۋ ـ جونەلتۋ مولشەرى دۇنيە ٴجۇزى بويىنشا 7 ـ ورىندا تۇرادى؛ ٴۇشىنشى، تۇتاس مەملەكەتتەگى ماڭىزدى ەنەرگيا جانە مول شيكىزات ـ ماتەريال وتكەرمەلەۋ بازاسى، مەملەكەتتىڭ ستراتەگيالىق بايلىق حاۋىپسىزدىگىندە ماڭىزدى قامتاماسىزدىق رول اتقارادى.

　　تىپ ـ تىنىش، ات ـ اتاقسىز جەردەن سونى كۇشكە اينالدى، ودان باستاماشى ورىنعا شىقتى، رەفورما جاساۋدىڭ، ەسىك اشۋدىڭ قۇدىرەتتى كۇشى وسىناۋ تەرەڭ سۋلى تاماشا پورتتى تۇلعالادى.

　　باس شۋجي شي جينپيڭ تەبىرەنە بىلاي دەدى: ”سىزدەر رەفورما جاساۋدىڭ، ەسىك اشۋدىڭ اتويشىسىسىزدار. مۇنان جۇڭگونىڭ رەفورما جاساۋ، ەسىك اشۋ جولى، ٴسوزسىز، تابىستى بولادى دەيتىن سەنىمدى بەكەمدەۋىمىز كەرەك“.

　　شاندۇڭ پورت توبى بۇكىلدەي اۆتوماتتاندىرىلعان كەمەتۇراق قۇرىلىسى جاڭالىق اشۋ ۇجىمىنىڭ سەركەسى جاڭ ليانگاڭ وسى جولى دا وسىندا بولدى.

　　1960 ـ جىلى تۋعان ونىڭ پورتتا ارمان قۋعانىنا 40 جىلدان استى. 10 نەشە جىلدىڭ الدىندا جۇڭگونىڭ بۇكىلدەي اۆتوماتتاندىرىلعان كەمەتۇراق سالاسى ٴالى دە اقتاڭداق ەدى، ”ەۆروپانىڭ اۆتوماتتاندىرىلعان كەمەتۇراعىن ەكسكۋرسيالادىق، الايدا، ولار كولىكتەن ٴتۇسىپ سۋرەتكە تۇسىرۋىمىزگە رۇقسات ەتپەدى“.

　　2013 ـ جىلى سالماقتى ناۋقاسقا شالدىعىپ وپەراتسيا جاساتىپ دەنساۋلىعى قالپىنا كەلىپ ۇلگىرمەگەن جاڭ ليانگاڭ باتىلدىقپەن اۋىر جۇك ارقالاپ، تاجىريبە جوق، ماتەريال جوق، كومەك جوق سىندى ”ٴۇش جوق“ جاعدايدا ۇجىمدى باستاپ كۇندى تۇنگە جالعاپ جاڭالىق اشۋدان قامال الىپ، نەبارى 3 جارىم جىل ۋاقىتتا ازياداعى تۇڭعىش بۇكىلدەي اۆتوماتتاندىرىلعان كونتينەرلى كەمەتۇراق _ چيڭداۋ پورتى بۇكىلدەي اۆتوماتتاندىرىلعان كونتينەرلى كەمەتۇراعىن قۇردى.

　　ال قازىر ول ۇجىمدى باستاپ بۇكىلدەي اۆتوماتتاندىرۋ تەحنيكاسىن رىجاۋ پورتى سياقتىلاردى قامتىعان كونتينەرلى كەمەتۇراقتى وزگەرتۋگە قولداندى ٴارى ”ٴبىر بەلدەۋ، ٴبىر جولدى“ بىرگە قۇراتىن ەلدەرگە دەيىن جالپىلاستىردى.

　　”ٴبىز جۇڭگولىقتاردىڭ ٴوزىنىڭ اۆتوماتتاندىرىلعان كەمەتۇراعىن قۇرامىز“، ـ دەدى جاڭ ليانگاڭ. پورتتا جەل كۇشتى بولعانىمەن، وسى ٴىرى ەل ۇستاسى ەڭسەسىن كوتەرە قاسقايىپ تۇر، قارا جيەكتى كوزىلدىرىك استىنداعى وتتى جانارىنان قايسارلىق مەن مۇندالايدى.

　　”ٴىرى ەلدەن قۋاتتى ەلگە بەت الۋدا وسى وتكەلدەن، ٴسوزسىز، ٴوتىپ، دەربەس جاڭالىق اشۋ جولىمەن ٴجۇرۋىمىز كەرەك“. باس شۋجي شي جينپيڭ بىلاي دەپ القادى: ”سىزدەر زور ۇلەس قوستىڭىزدار، ەڭبەك ەرلەرى رۋحىن، ۇستا رۋحىن ايگىلەدىڭىزدەر“.

　　جاڭالىق اشۋدى مۇرات ەتۋ، قايتپاس قايسارلىق كورسەتۋ، رەفورما جاساۋ، ەسىك اشۋ جولى مىنە وسىلاي سالىنعان.

　　تەڭىز جەلىنە قارسى ٴجۇرىپ باس شۋجي شي جينپيڭ كەمەتۇراق جاعالاۋىنا كەلىپ، سوناۋ الىسقا كوز تاستادى.

　　تەڭىزدە جەل تۇرىپ، تولقىن جاعانى ۇرعىلاپ، ادامنىڭ كوڭىل قۇسىن ەرىكسىز شارىقتاتادى.

　　6 جىلدىڭ الدىنا قايتا ورالايىق. 2018 ـ جىلى 6 ـ ايدا باس شۋجي شي جينپيڭ شاندۇڭعا كەلىپ قىزمەت تەكسەرگەندە دە تەڭىز لەنياسىن بويلاي ٴجۇرىپ، چيڭداۋدى، ۋيحايدى، يانتايدى ارالادى. قىزمەت تەكسەرگەندە باس شۋجي: ”تەڭىز ـ مۇحيتتا قۋاتتى ەل قۇرامىز، ەجەلدەن وسىنداي سەنىمىم بار“، ـ دەدى. سول جولى باس شۋجي ليۋگۇڭداۋداعى جيا ـ ۋ سوعىس مۇراجايىنا دا ارناۋلى بارىپ ەكسكۋرسيالادى.

　　ەجەلدەن بەرى تەڭىز ـ مۇحيت قانشالاعان كوركەيۋگە، قۇلدىراۋعا، داڭق پەن نامىسقا كۋا بولدى. تاريحقا بويلاي قاراساق، تەڭىز ـ مۇحيتقا بەت العان مەملەكەت كوركەيگەن، تەڭىز ـ مۇحيتتان الشاقتاعان مەملەكەت قۇلدىراعان.

　　باس شۋجي كەزىندە بىلاي دەگەن: ”نەشە مىڭ جىلدىق ۇلكەن تاريحتان كوز جىبەرگەندە، وزگەرىس پەن ەسىك اشۋ جالپى تۇلعالىق جاقتان جۇڭگونىڭ تاريحي قالىپتى كۇيى بولىپ سانالادى“.

　　مەملەكەت قاقپاسىن تارس بەكىتۋدەن كوز ايانى كەڭەيتىپ دۇنيە جۇزىنە كوز جىبەرۋگە، ونان رەفورما جاساۋعا، ەسىك اشۋعا دەيىن ٴبىر ۇلتتىڭ جاپا ـ ماشاقاتتان گۇلدەنۋگە قادام تاستاعان ويانۋى مەن كۇرەس جۇرگىزۋىنە كۋا بولدى.

　　تەڭىز ـ مۇحيتتى مەڭگەرىپ، تەڭىزدى بەتكە الىپ قۇدىرەتتەنۋگە ۇمتىلۋ كەرەك. شي جينپيڭ جولداس تىنباي تولعانىس جاساپ، جوسپارلادى.

　　فۋجوۋدا تەڭىزدەگى فۋجوۋ قۇرۋدى العا قويىپ، فۋجيان ولكەسىنىڭ باسشىسى بولعاننان كەيىن تەڭىز ـ مۇحيتتا قۋاتتى ولكە قۇرۋ ستراتەگياسىن العا قويدى؛ جىجياڭدا تەڭىز ـ مۇحيت ەكونوميكاسىندا قۋاتتى ولكە قۇرۋدى العا قويدى؛ ورتالىققا بارىپ قىزمەت ىستەگەننەن كەيىن تەڭىز ـ مۇحيتتا قۋاتتى ەل قۇرۋدى العا قويدى. باس شۋجي تەرەڭ تولعانىپ بىلاي دەدى: ”ەكونوميكادا قۋاتتى ەل، ٴسوز جوق، تەڭىز ـ مۇحيتتا قۋاتتى ەل بولۋى، تەڭىز تاسىمالىندا قۋاتتى ەل بولۋى كەرەك” .“وسىزاماندانعان مەملەكەت قانداي بولۋى كەرەك، قۇرلىقتا قۋاتتى ەل عانا ەمەس، تەڭىز ـ مۇحيتتا دا قۋاتتى ەل بولۋى، قۇرلىق پەن تەڭىزگە قاتار ٴمان بەرەتىن وسىزاماندانعان قۋاتتى ەل بولۋى كەرەك“.

　　تەڭىزگە بەت الۋ جولى دا رەفورما جاساۋدىڭ، ەسىك اشۋدىڭ ىقشام كورىنىسى ەمەس پە؟

　　كەمەتۇراق ماڭىنان دۋ قول شاپالاق ٴۇنى، الاقايلاعان داۋىس كوتەرىلدى. اق ٴتۇستى جۇمىس كيىمىن كيگەن كەمە قىزمەتكەرلەرى، كوك ٴتۇستى كيىم كيگەن عىلىم ـ تەحنيكا قىزمەتكەرلەرى، سارى ٴتۇستى كيىم كيگەن ٴوندىرىس باسقارۋشىلارى، قىزعىلت سارى ٴتۇستى كيىم كيگەن جۇمىس باسىندا جۇمىس جۇرگىزۋشىلەر...

　　رۋحاني بەينەسى كوتەرىڭكى، جىگەرى اسقاق پورت قىزمەتكەرلەرىنە باس شۋجي تەرەڭ سۇيىسپەنشىلىكپەن بىلاي دەدى: ”ٴبارىمىز كۇرەسكەرمىز، بۇرىننان قازىرگە دەيىن كۇرەس جۇرگىزىپ وسىنشاما شۇعىلالى تابىسقا قول جەتكىزدىك. بولاشاق نىسانامىز وتە ايقىن، وتە ۇلى، ونى جۇزەگە اسىرۋ ٴۇشىن ۇزدىكسىز تىڭعىلىقتى ىستەپ، كۇرەس جۇرگىزۋىمىز كەرەك“.

　　باس شۋجي شي جينپيڭنىڭ وسى رەتكى شاندۇڭ ساپارى ەل ٴىشى ـ سىرتىنىڭ نازارىن اۋداردى. قىزمەت تەكسەرۋ ٴدال پارتيا 20 ـ كەزەكتى ورتالىق كوميتەتىنىڭ ٴۇشىنشى جالپى ٴماجىلىسى اشىلعالى تۇرعان ساتكە تۋرا كەلدى.

　　بۇلاق قالاسى جينان، وڭتۇستىك قالا ماڭى مەيمانحاناسى، اعاشتار مەن شوپتەر جايقالىپ، بار الاپ قۇلپىرىپ تۇر. 6 ـ ايدىڭ 23 ـ كۇنى تۇستەن كەيىن رەفورما جونىندەگى كاسىپورىندار مەن مامانداردىڭ اڭگىمە ٴماجىلىسى وسى ارادا اشىلدى.

　　ٴماجىلىس الاڭىندا مەملەكەت مەنشىگىندەگى كاسىپورىنداردىڭ، حالىقتىق كاسىپورىنداردىڭ، شەتەل قارجىلاندىرعان كاسىپورىنداردىڭ، شياڭگاڭ، اۋمىن، تايۋان قارجىلاندىرعان كاسىپورىنداردىڭ، ارنايىلانعان، كەمەلدەنگەن، ەرەكشەلەنگەن، جاڭاشالانعان ”شاعىن قۋاتتى“ كاسىپورىنداردىڭ، جەكە ساۋدا ـ ونەركاسىپشىلەردىڭ ۋاكىلدەرى، ەكونوميكا سالاسىنان كەلگەن ماماندار مەن وقىمىستىلار، قاتىستى تاراۋلار مەن جەرگىلىكتى ورىنداردىڭ جاۋاپتى جولداستارى بولدى.

　　”پارتيا ورتالىق كوميتەتى كەلەلى شەشىم جاساعاندا، ماڭىزدى حۇجات شىعارعاندا تۇگەلدەي ىشكەرىلەي تەكسەرۋ ـ زەرتتەۋ جۇرگىزىپ، ٴار جاقتىڭ پىكىرىن كەڭ كولەمدە تىڭدايدى، بۇل پارتيامىزدىڭ ەجەلدەن بەرگى ٴتاسىلى جانە تاڭداۋلى ٴداستۇرى“، ـ دەدى باس شۋجي.

　　2013 ـ جىلى 7 ـ ايدا پارتيا 18 ـ كەزەكتى ورتالىق كوميتەتىنىڭ ٴۇشىنشى جالپى ٴماجىلىسى اشىلۋدان بۇرىن، باس شۋجي شي جينپيڭ حۋبەيگە بارىپ قىزمەت تەكسەرىپ، تەكسەرۋ ـ زەرتتەۋ جۇرگىزدى ٴارى ٴىشىنارا ولكە، قالالاردىڭ جاۋاپتىلارىنىڭ اڭگىمە ٴماجىلىسىن باسقارىپ اشىپ، رەفورمانى جاپپاي تەرەڭدەتۋ جونىندە پىكىر جانە ۇسىنىس الدى؛

　　2020 ـ جىلى 7 ـ ايدان 9 ـ ايعا دەيىن پارتيا 19 ـ كەزەكتى ورتالىق كوميتەتتىڭ بەسىنشى جالپى ٴماجىلىسى اشىلۋدان بۇرىن، ”14 ـ بەسجىلدىق“ جوبا ۇسىنىسىن ويداعىداي دايىنداۋ ٴۇشىن، باس شۋجي ٴار سالانىڭ 7 رەتكى اڭگىمە ٴماجىلىسىن ىركەس ـ تىركەس باسقارىپ اشتى؛

　　2022 ـ جىلى 4 ـ ايدان 5 ـ ايعا دەيىن باس شۋجيدىڭ نۇسقاۋى مەن تالابىنا ساي، پارتيا 20 ـ قۇرىلتايىنا قاتىستى قىزمەتتەر جونىندە ينتەرنەتتە پىكىر الىندى، بۇل پارتيا تاريحىندا پارتيانىڭ مەملەكەتتىك قۇرىلتايىنا قاتىستى قىزمەتتەر جونىندە تۇڭعىش رەت بۇكىل پارتيادان، بۇكىل قوعامنان اشىق پىكىر الۋ...

　　تەكسەرۋ ـ زەرتتەۋ ارقىلى جول اشىپ، تەكسەرۋ ـ زەرتتەۋ ارقىلى جاعدايدى جاڭالاپ، كوپتىڭ اقىل ـ پاراساتىن شوعىرلاندىرىپ، حالىقتان اقىل ـ كەڭەس الۋ باس شۋجيدىڭ ەل باسقارۋىنىڭ تۇتاس بارىسىنا سىڭىرىلگەن.

　　”پارتيا 20 ـ قۇرىلتايىنان كەيىن مەن رەفورمانى اناعۇرلىم جاپپاي تەرەڭدەتۋ ماسەلەسى جونىندە باستان ـ اياق وي جۇگىرتىپ كەلەمىن. رەفورما جاساعاننان، ەسىك اشقاننان كەيىن، پارتيانىڭ ٴار كەزەكتى ٴۇشىنشى جالپى ٴماجىلىسى رەفورمانى زەرتتەدى. وسى رەتكى رەفورمانى ٴبىز جۇڭگو ۇلگىسىندەگى وسىزامانداندىرۋدى ىلگەرىلەتۋ نەگىزگى تاقىرىبىمەن تىعىز بايلانىستىرامىز“. وسى رەتكى اڭگىمە ماجىلىسىندە باس شۋجي شي جينپيڭ: ”كوپشىلىكتىڭ پىكىرلەرى مەن ۇسىنىستارىن بەتپە ـ بەت تىڭداماقپىن، اقتارىلا سويلەڭىزدەر“، ـ دەپ تۋ باستا ماقساتتى ۇعىندىردى.

　　6 كاسىپورىن ۋاكىلى، 3 مامان ـ وقىمىستى ىلگەرىندى ـ كەيىندى لەبىز ٴبىلدىردى، لەبىز ٴبىلدىرۋ جانە ٴوزارا ىقپالداسۋ ۋاقىتى ٴبىر جارىم ساعاتتان استى، باس شۋجي ٴالسىن ـ ٴالى ەستەلىك الىپ، قايتا ـ قايتا ٴسوز قىستىرىپ، سۇراۋ سۇراپ، ناقتى جاعدايدى ۇعىسىپ، ىشكەرىلەي پىكىر اۋىستىرىپ، جاۋاپ قايتاردى.

　　باس شۋجي شي جينپيڭ رەفورما نەگىزگى تاقىرىبىمەن تىعىز بايلانىستىرۋ، رەفورمانىڭ ٴتۇيىنىن كورنەكتىلەندىرۋ، قۇن بەتالىسىن مىقتى يگەرۋ، ٴادىس ـ امالعا ٴمان بەرۋ سىندى 4 جاقتان رەفورمانى اناعۇرلىم جاپپاي تەرەڭدەتۋدەگى كەلەلى نازاريالىق جانە امالياتتىق ماسەلەلەردى ىشكەرىلەي بايىمداپ، تانىم نازارياسىن ايقىن ٴتۇسىندىرىپ قانا قويماي، ادىستەمەنى دە ورتاعا قويدى.

　　10 جىلدىڭ الدىندا پارتيا 18 ـ كەزەكتى ورتالىق كوميتەتىنىڭ ٴۇشىنشى جالپى ماجىلىسىنەن كەيىنگى 2014 ـ جىلعى مەملەكەتتىك ەكى ماجىلىستە گۋاڭدۇڭ ۋاكىلدەر ۇيىرمەسىنىڭ باياندامانى قاراۋىنا قاتىناسقاندا، باس شۋجي شي جينپيڭ بىلاي دەگەن بولاتىن:

　　”ٴبىز ەسەيگەن ٴداۋىر جان تەبىرەنتەرلىك ٴداۋىر. رەفورمانىڭ ۇلى تولقىنىنا ٴدوپ كەلگەن ٴبىز رەفورمانىڭ اتويشىسى بولۋىمىز، كۇشتى تاريحي جاۋاپكەرشىلىك ارقالاۋ رۋحىنا يە بولۋىمىز كەرەك. مۇنداي جاۋاپكەرشىلىك ارقالاۋ رۋحى توڭكەرىستىك سوعىس جىلدارىندا اتويلاپ شەپ بۇزۋ، ەرلىكپەن ٴوزىن ارناۋ بولىپ تابىلادى، قازىر جۇرەكتىلىكپەن رەفورما جاساۋ، شەبەرلىكپەن رەفورما جاساۋ بولىپ تابىلادى“.

　　بيىل رەفورمانى جاپپاي تەرەڭدەتۋدەگى تاعى ٴبىر ماڭىزدى جىل. رەفورمانىڭ ايبىندى جاڭا جوباسى جاسالۋدا.

　　جاڭا تاريحي باستامادا، بۇرىنعىلار ىستەپ كورمەگەن جۇڭگو ۇلگىسىندەگى وسىزامانداندىرۋ ىستەرى الدىندا، ٴبىزدىڭ بورىشىمىز اناعۇرلىم داڭقتى، مىندەتىمىز اناعۇرلىم جاپالى، ٴدوپ كەلەتىن سىن ـ سايىستار اناعۇرلىم قاتاڭ، قىزمەتىمىز اناعۇرلىم ۇلى.

　　رەفورما جاساعاندا عانا، قازىرگىنى يگەرىپ، بولاشاققا قول جەتكىزۋگە بولادى.

　　5 ـ ايدىڭ 22 ـ كۇنى تۇستەن كەيىن باس شۋجي شي جينپيڭ رىجاۋدىڭ ياڭگۋاڭ تەڭىز جاعالاۋى جاسىل جولىنا بارىپ قالا تۇرعىندارىمەن جانە ساياحاتشىلارمەن ىقىلاسپەن اڭگىمەلەستى.

　　ادامدار اراسىنداعى جالىندى دا جىگەرلى بالالاردى كورگەندە باس شۋجي قاباعات قۋانىپ، شىن ىقىلاسپەن بىلاي دەدى: ”قازىرگى ۇرپاق وتە باقىتتى. ەكىنشى 100 جىلدىق كۇرەس نىساناسى جۇزەگە اسقان كەزدە، ولار دا ەسەيىپ ـ ەرجەتەدى. جۇڭگو ۇلگىسىندەگى وسىزامانداندىرۋدى جۇزەگە اسىرۋىمىزدا جاس بۋىن تىرەكتى كۇش سانالادى. بۇقارانىڭ باقىتتى تۇرمىسى ەڭبەكپەن كەلەدى. ناقتى ىستەۋ ارقىلى كۇرەس جۇرگىزىپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرىپ، حالىق بۇقاراسىنىڭ تۇرمىسىن بارعان سايىن جاقسارتۋىمىز كەرەك“.

　　رىجاۋدىڭ جەر اتى ”كۇن ساۋلەسى العاش تۇسكەن جەر“ دەگەن ماعىنادا. ٴار جىلى جاڭا جىل مەرەكەسىندە كوپتەگەن ادام وسى اراداعى تەڭىز جاعاسىندا جاڭا جىلدىڭ العاشقى كۇن ساۋلەسىن قارسى الىپ، بىرگە تاماشا تىلەك تىلەپ، كوركەم بولاشاقتى ارماندايدى.

　　شىعىستان تولقىن كوتەرىلىپ، بۋىرقانعان داۋىل تۇرىپ، جۇڭگونىڭ رەفورما جاساۋ، ەسىك اشۋ جاڭا جورىعى تاعى دا باستالدى.

　　(شينحۋا اگەنتتىگىنىڭ 5 ـ ايدىڭ 26 ـ كۇنى جيناننان بەرگەن حابارى)

جالعانىم