5 ـ ايدىڭ 28 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن ەكۆاتورلىق گۆينەيا زۇڭتۇڭى وبياڭمەن كەڭەس وتكىزدى. سۋرەتتە: كەڭەستەن بۇرىن شي جينپيڭ مەن حانىمى پىڭ لييۋان وبياڭ جانە حانىمى كونستانسيامەن بىرگە سۋرەتكە تۇسۋدە.
□ سۋرەتتى شينحۋا اگەنتتىگىنىڭ ٴتىلشىسى لي شۋەرىن تۇسىرگەن
شينحۋا اگەنتتىگىنىڭ 5 ـ ايدىڭ 28 ـ كۇنى بەيجيڭنەن بەرگەن حابارى (تىلشىلەر سۇن ي، ۋاڭ بين). 5 ـ ايدىڭ 28 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن ەكۆاتورلىق گۆينەيا زۇڭتۇڭى وبياڭمەن كەڭەس وتكىزدى. ەكى ەلدىڭ مەملەكەت باسشىلارى جۇڭگو مەن ەكۆاتورلىق گۆينەيانىڭ قارىم ـ قاتىناسىن جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناس دەڭگەيىنە كوتەرۋدى جاريالادى.
شي جينپيڭ بىلاي دەپ اتاپ كورسەتتى: جۇڭگو ەكۆاتورلىق گۆينەيامەن ٴبىر ـ بىرىنە شىن ادال جاقسى دوس، جاقسى سەرىك، جوعارى دەڭگەيدەگى ساياسي ٴوزارا سەنىمدىلىك ەكى ەل قارىم ـ قاتىناسىنىڭ ەڭ ايقىن ەرەكشەلىگى. ديپلوماتيالىق قارىم ـ قاتىناس ورناتقان جارتى عاسىردان استام ۋاقىتتان بەرى، ەكى جاق باستان ـ اياق ٴوزارا قارايلاسىپ، تار جول، تايعاق كەشۋدى بىرگە وتكەرىپ، ٴبىر ـ ٴبىرىنىڭ وزەكتى مۇددەسى مەن ٴجىتى قاداعالاپ وتىرعان كەلەلى ماسەلەلەردە ٴوزارا باتىل قولداۋ كورسەتتى، بۇل جۇڭگونىڭ افريكا ەلدەرىمەن شىنايى دوستىعىنىڭ، قول ۇستاسا دامۋىنىڭ جاندى كارتيناسىنا اينالدى. جاڭا جاعدايدا جۇڭگونىڭ ەكۆاتورلىق گۆينەيامەن قارىم ـ قاتىناسىن ويداعىداي بەكەمدەۋ، ويداعىداي دامىتۋ ەكى ەلدىڭ جانە ەكى ەل حالقىنىڭ ٴتۇبىرلى مۇددەسى مەن ورتاق تىلەگىنە ۇيلەسەدى. جۇڭگو جاق ەكۆاتورلىق گۆينەيانىڭ مەملەكەتتىڭ يەلىك ۇقىعىن، تاۋەلسىزدىگىن قورعاۋىن، سىرتتىڭ كيلىگۋىنە قارسى تۇرۋىن، ٴوز ەلىنىڭ دامۋ جولى جونىندە دەربەس ىزدەنىس جاساۋىن باتىل قولدايدى، ەكۆاتورلىق گۆينەيامەن بىرگە جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناسقا كوتەرۋدى وراي ەتىپ، ٴار سالاداعى، ٴار جىكتەگى دوستىق بارىس ـ كەلىستى اناعۇرلىم جيىلەتىپ، رەفورما، دامۋ، كەدەيلىكتەن ارىلتۋدان قامال الۋ سياقتى سالالارداعى تاجىريبە اۋىس ـ كۇيىسىن ىشكەرىلەي ورىستەتىپ، ەكى ەلدىڭ ٴداستۇرلى دوستىعىنا باياندى قوزعاۋشى كۇش ۇستەۋدى قالايدى.
شي جينپيڭ بىلاي دەپ اتاپ كورسەتتى: جۇڭگو جاق ەكۆاتورلىق گۆينەيانىڭ ەكونوميكالىق، قوعامدىق دامۋىن قولدايدى، ەكۆاتورلىق گۆينەيانىڭ ەكونوميكانى كوپ نەگىزدەندىرۋ جانە ونەركاسىپتەندىرۋدى ىلگەرىلەتۋ قۇلشىنىسىن قولدايدى، جۇڭگو _ افريكا سەلبەستىك تالقى مىنبەرىنىڭ جەتىستىكتەرىن، ”ٴبىر بەلدەۋ، ٴبىر جولدى“ بىرگە قۇرۋ سەلبەستىگىن ەكۆاتورلىق گۆينەيانىڭ «2035 ـ جىلعا دەيىنگى مەملەكەتتىڭ ەكونوميكالىق جانە قوعامدىق دامۋ جوباسىمەن» تىعىز ٴتۇيىلىستىرىپ، ٴار سالاداعى سەلبەستىكتىڭ ساپاسىن جوعارىلاتىپ، ونىمدىلىگىن ارتتىرۋدى ىلگەرىلەتۋدى قالايدى. جۇڭگو جاق قۋاتتى جۇڭگو كاسىپورىندارىن ەكۆاتورلىق گۆينەياعا بارىپ قارجى قوسىپ شارۋاشىلىقتى گۇلدەندىرۋگە شابىتتاندىرادى، ەكۆاتورلىق گۆينەيامەن اۋىل شارۋاشىلىعى، اۋىل ـ قىستاق سالاسىنداعى دامۋ تاجىريبەلەرىن ورتاقتاسىپ، اۋىل شارۋاشىلىق تەحنيكاسى جاعىندا كومەك بەرۋ نىساندارىن ۇزدىكسىز ورىستەتىپ، جۇڭگو ەمدەۋ اترەتى، جۇڭگو _ ەكۆاتورلىق گۆينەيا دوستىق شيپاحاناسى سياقتىلاردىڭ رولىن تولىق ساۋلەلەندىرىپ، ەمدەۋ ـ دەنساۋلىق ساقتاۋ، وقۋ ـ اعارتۋ، مادەنيەت سياقتى سالالارداعى اۋىس ـ كۇيىستى، سەلبەستىكتى تەرەڭدەتىپ، ەكى ەلدىڭ ٴداستۇرلى دوستىعىن ۇرپاقتان ـ ۇرپاققا جالعاستىرىپ، ەكى ەل حالقىنا ٴتىپتى دە زور باقىت جاراتۋدى قالايدى.
شي جينپيڭ بىلاي دەپ باسا دارىپتەدى: بۇگىنگى دۇنيە جۇزىندە وزگەرىس پەن بىلىقپالىق قاباتتاسىپ، 100 جىلدىق وزگەرىس جەدەل قۇبىلۋدا، ادامزات قوعامى بۇرىن بولىپ كورمەگەن سىن ـ سايىستارعا ٴدوپ كەلىپ وتىر، وركەندەپ كەلە جاتقان ەلدەر ىنتىماقتى، سەلبەستىكتى بۇرىنعى ٴارقانداي كەزدەگىدەن دە كۇشەيتۋگە مۇقتاج. جۇڭگو جاق ەكۆاتورلىق گۆينەيا سياقتى قالىڭ وركەندەپ كەلە جاتقان ەلدەرمەن بىرگە بەيبىت قاتار تۇرۋ بەس پرينسيبىنىڭ رۋحىن اسقاقتاتىپ، حالىقارالىق ىستەردە سايكەسۋدى، سەلبەسۋدى كۇشەيتىپ، وركەندەپ كەلە جاتقان ەلدەردىڭ ورتاق مۇددەسى مەن حالىقارالىق ادىلدىكتى، ادىلەتتىلىكتى قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى. افريكا ەلدەرىمەن ىنتىماقتى، سەلبەستىكتى دامىتۋ _ جۇڭگونىڭ ديپلوماتيالىق ساياساتىنىڭ ماڭىزدى ىرگە تاسى. جۇڭگو جاق افريكا جاقپەن جاڭا كەزەكتى جۇڭگو _ افريكا سەلبەستىك تالقى مىنبەرى باسشىلار ٴماجىلىسىن ويداعىداي وتكىزىپ، ٴداستۇرلى دوستىقتى ونان ارى اسقاقتاتىپ، ىنتىماقتى، ىستەستىكتى تەرەڭدەتىپ، بولاشاقتاعى دامۋ، سەلبەستىك ۇلى جوسپارىن بىرگە اقىلداسىپ، جۇڭگو _ افريكا تاعدىرلاس ورتاق تۇلعاسىن قۇرۋدىڭ جاڭا تاراۋىن اشۋدى قالايدى.
وبياڭ مىنالاردى ٴبىلدىردى: جۇڭگو _ ۇلى شىعىس مەملەكەتى، ەكۆاتورلىق گۆينەيانىڭ جاقسى باۋىرلاسى جانە سەنىمدى ستراتەگيالىق سەرىگى. ەكى ەل ديپلوماتيالىق قارىم ـ قاتىناس ورناتقان 54 جىلدان بەرى ەكى جاقتى قارىم ـ قاتىناس باستان ـ اياق دوستىق دامۋدى ساقتادى، قازىر تاريحتاعى ەڭ جاقسى مەزگىلدە تۇر. جۇڭگونىڭ ەكۆاتورلىق گۆينەيامەن سەلبەستىگى باستان ـ اياق تەڭدىك جانە ٴوزارا قۇرمەت ەتۋ نەگىزىندە بولىپ كەلدى، ەشقاشان باسقالارعا زورلاپ تاڭبايدى. جۇڭگونىڭ افريكاعا كومەكتەسۋ ەمدەۋ اترەتى، كومەكتەسىپ سالعان جۇڭگو _ ەكۆاتورلىق گۆينەيا دوستىق شيپاحاناسى سياقتى ماڭىزدى نىساندار جەرگىلىكتى حالىققا باقىت جاراتىپ، افريكا _ جۇڭگو دوستىعىنىڭ سيمۆولىنا اينالدى. ەكۆاتورلىق گۆينەيا جۇڭگوعا ەسىگىن ايقارا اشۋدى قالايدى، جۇڭگو كاسىپورىندارىنىڭ ەكۆاتورلىق گۆينەياعا كەلىپ قارجى قوسىپ، سەلبەستىك جاساپ، ەكۆاتورلىق گۆينەيانىڭ ەكونوميكانى كوپ نەگىزدەندىرۋدى جانە ونەركاسىپتەندىرۋدى جۇزەگە اسىرۋىنا، مەملەكەتتىڭ باياندى، اقاۋسىز دامۋىن جۇزەگە اسىرۋىنا دەم بەرۋىن قارسى الادى. ٴتوراعا شي جينپيڭ العا قويعان ادامزاتتىڭ تاعدىرلاس ورتاق تۇلعاسىن قۇرۋ ۇستانىمى، سونداي ـ اق ”ٴبىر بەلدەۋ، ٴبىر جولدى“ بىرگە قۇرۋ، الەمدىك دامۋ باستاماسى، الەمدىك حاۋىپسىزدىك باستاماسى جانە الەمدىك وركەنيەت باستاماسى ادامزاتتىڭ بەيبىت العا باسۋىن ىلگەرىلەتۋگە، اناعۇرلىم كوركەم دۇنيە ٴجۇزىن قۇرۋعا ٴتيىمدى. ەكۆاتورلىق گۆينەيا جۇڭگو جاقتىڭ وڭىرلىك قولامتالى ماسەلەلەردى ساياسي جولمەن شەشۋدى ىلگەرىلەتۋ، دۇنيە ٴجۇزىنىڭ بەيبىتشىلىگى مەن دامۋىن جەبەۋ جولىندا كورسەتكەن بەلسەندى قۇلشىنىستارىن جوعارى باعالايدى، جۇڭگو جاقپەن جۇڭگو _ افريكا سەلبەستىك تالقى مىنبەرى، بريكس ەلدەرى سياقتى جۇلگەدەگى سەلبەستىكتى كۇشەيتىپ، الەمدىك باسقارۋ جۇيەسىنىڭ اناعۇرلىم ٴادىل، ۇيلەسىمدى بەتالىسقا قاراي دامۋىن ىلگەرىلەتۋدى قالايدى. ەكۆاتورلىق گۆينەيا ٴبىر جۇڭگو پرينسيبىن باتىل اتقارادى، دۇنيە جۇزىندە تەك ٴبىر عانا جۇڭگو بار، تايۋان _ جۇڭگو تەرريتورياسىنىڭ ايرىلماس ٴبىر بولىگى، جۇڭحۋا حالىق رەسپۋبليكاسى ۇكىمەتى بۇكىل جۇڭگوعا ۋاكىلدىك ەتەتىن بىردەن ـ ٴبىر زاڭدى ۇكىمەت دەپ قارايدى، ٴارقانداي فورماداعى ”تايۋاندى دەربەستەندىرۋگە“ قارسى تۇرادى، جۇڭگو ۇكىمەتىنىڭ مەملەكەتتىڭ بۇكىلدەي بىرلىككە كەلۋىن جۇزەگە اسىرۋ جولىندا جاساعان قۇلشىنىستارىن باتىل قولدايدى.
كەڭەستەن كەيىن، ەكى ەلدىڭ مەملەكەت باسشىلارى قارجى قوسۋ، ەكونوميكانى دامىتۋ، سيفرلى ەكونوميكا، جاسىل دامۋ، الەمدىك دامۋ باستاماسىن تياناقتاندىرۋ سياقتى سالالارداعى كوپتەگەن ەكى جاقتى سەلبەستىك حۇجاتىنا قول قويىلۋىنا بىرگە كۋا بولدى.
ەكى جاق «جۇڭحۋا حالىق رەسپۋبليكاسى مەن ەكۆاتورلىق گۆينەيا رەسپۋبليكاسىنىڭ جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناس ورناتۋ جونىندەگى بىرلەسكەن مالىمدەمەسىن» جاريالادى.
كەڭەستەن ىلگەرى شي جينپيڭ مەن حانىمى پىڭ لييۋان حالىق سارايىنىڭ شىعىس قاقپاسىنىڭ سىرتىنداعى الاڭدا وبياڭ مەن حانىمى كونستانسيانى قارسى الۋ سالتىن وتكىزدى.
وبياڭ كەلگەندە قۇرمەت قاراۋىلى قاتار تۇزەپ قۇرمەت ٴبىلدىردى. ەكى ەلدىڭ مەملەكەت باسشىلارى سالتانات مىنبەسىنە شىقتى، اسكەري وركەستر جۇڭگو مەن ەكۆاتورلىق گۆينەيا ەكى ەلدىڭ مەملەكەت ٴانىن ورىندادى، تيان ـ انمىن الاڭىندا 21 رەت ساليۋت اتىلدى. وبياڭ شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ٴارى قاتارعا ٴبولىنىپ پاراتتان ٴوتۋىن كوردى.
سول كۇنى كەشتە شي جينپيڭ مەن پىڭ لييۋان حالىق سارايىنىڭ جينسى زالىندا وبياڭدى جانە ونىڭ حانىمىن قارسى الۋ قوناعاسىن وتكىزدى.
ۋاڭ ي جوعارىداعى قيمىلدارعا قاتىناستى.