ورالحاننىڭ وي ورامدارى

كەلۋ قاينارى:   |   جولدانعان ۋاقىتى:2016 - 11 - 17 09:05

ورالحان بوكەي - تىلدىك قورى باي، ويى تەرەڭ، ادامنىڭ جان دۇنيەسىن كوپ جازىپ، تابيعات پەن ادامنىڭ ۇيلەسىمدىلىگىنە، جۇمىر باستى پەندەنىڭ تىرشىلىكتەگى تىرلىگىنە كوپ باس قاتىرىپ، قالام تەربەگەن جازۋشى.

«ورالحاننىڭ پروزاسى ءوزىنىڭ تەرەڭ ومىرشەڭدىگىمەن قۇندى. ول - ءوز وقىرمانىن ەشقاشان جوعالتىپ المايتىن شىن باقىتتى جازۋشى»، - دەيدى سىنشى ايگۇل كەمەلبايەۆا.

جازۋشىنىڭ اڭگىمە، پوۆەستەرىندەگى ءتۇرلى وي تولعامدارىن توپتاستىرعان ەدىك. وقىپ كورەيىك.

ادام جاقىنداۋ ءۇشىن دە اۋەلى الىستاۋ كەرەك شىعار.

ءومىر دەگەنىمىز ەشقاشان دا شەشۋى تابىلماس جۇمباق، ەشكىم شىعارا الماس قيىن ەسەپ دەسەك، جاۋابىن ىزدەپ، جانتالاسىپ، جان تاپسىرعاندار قانشاما. وسىنىڭ بارلىعىن پەندە ەگەر دە اناسىنىڭ قۇرساعىندا جاتىپ سەزسە عوي، وندا جارىق دۇنيەگە كەلمەي- اق قويار ەدى.

نەگە ءبىز وسى وقتا- تەكتە جىلاپ المايمىز؟.. نەگە؟

«ادام بالاسىن قۇرتاتىن - وي ەمەس، ويسىزدىق شىعار...»

ماحاببات - تابيعات ءوزى بەرگەن قۇدىرەتتى سەزىم. ونداعى ەڭ ۇلكەن سىيلىق - اينىماس سىيلاستىق. ول اركىمگە دە ءتان قاسيەت، ال ناعىز سىيلاستىق كەز- كەلگەننىڭ قولىنان كەلمەيدى...

ايتەۋىر جەر باسىپ جۇرگەن سوڭ، ازاپتىڭ ارباسىنا جابىسا بەرمەي، وزىڭمەن ءوزىڭ بولىپ، ساياق تارتا ساپارلاپ كەتكەن دە دۇرىس - اۋ.ومىر مىڭ رەت وزگەرسە دە، قارا جەردىڭ وزىندەي ءوز قالپىندا قالاتىن ادامدار بولادى.***ادامنىڭ جۇرەگى - اقجايلاۋ ەمەس، كىم كورىنگەن قونا بەرەتىن. وندا جالعىز - اق كىسىگە ورىن بار.

تەك ءبىر- ءبىرىمىزدى الداپ، يلاندىرىپ، بەيبىت تۇرمىس قۇرۋ ءۇشىن، ونە بويعى قاسكوي جان جارالار جاماندىعىمىزدى «تاعدىر» دەگەن الدەنەگە جاماي سالامىز، ءسويتىپ الەمدەگى بار قايعى- قاسىرەت، وبال- ساۋاپتى تاعدىر مەن قۇدايدان كورەمىز.

ال تاعدىر دەگەنىمىز - ادامداردىڭ ءوزدى- وزىنە جاسار قىساستىعىنان پايدا بولار كوزگە كورىنبەيتىن، ايتسە دە مينۋت سايىن ينەدەي قادالىپ، ىڭىرسىتىپ وتىراتىن ىندەت ەكەنىن مويىندايىقشى...

بۇكىل ادامزات ساعان قاراپ تۇرعانداي، ءوز- ءوزىڭدى شەكسىز جاۋاپكەرشىلىكتە سەزىنگەندە عانا ويلاعان ماقساتىڭا جەتە الاسىڭ.

بۇكىل الەمدە ادام بالاسى قانشالىقتى مول بولسا، سونشالىقتى جالعىز - ونى جالعىزسىراتپايتىن ايرىلماس ادال دوسى - ءوزىنىڭ ويى عانا!

وسى جاسقا دەيىنگى ومىرىڭىزدە ايلى تۇندە، اشىق اسپاننىڭ استىندا تۇنەپ كورگەنىڭىز بار ما؟! ەگەر دالاعا تۇنەپ كورمەسەڭىز - اينالايىن تابيعاتتىڭ قادىرىن ءتۇسىنىپ، تابيعاتتىڭ بەل بالاسى ەكەنىڭىزدى بىلە بەرمەگەنىڭىز. مەنىڭ سىزدەردەن شىنشىل پەيىل، ادامدىق جۇرەكپەن سۇرارىم: مەيلى جاس بولىڭىز، مەيلى ءبىر ەلگە باس بولىڭىز، كىندىك كەستى جۇرتىڭىزدا اشىق اسپاندى جامىلىپ جاتىپ تۇنەڭىز، ءسىز سوندا عانا تۋعان جەردىڭ نەگە عانا ىستىق ەكەنىن پارىقتايسىز.

  تەڭىز جاعالاۋىندا تۇرعاندا ءبىر تولقىندى ءبىر تولقىن قۋىپ، جارىسا جاعالاۋعا ۇمتىلعانىن كورگەندە، سول جاعالاۋعا جەتىپ ولەتىنىنە كۋا بولاسىڭ. ولار ەندى قايتىپ باس كوتەرە المايدى، ماڭگىگە قۇرىدى، ەندى تەك جاڭاسى عانا جانىڭا ساۋاپ بولادى. ءبىر تۋىپ، ءبىر ءولىپ وتىرعان اساۋ تولقىن ادام ءومىرىن ەسكە سالادى؛ بولىمسىز ءۇمىت جەتەگىندە، بولىمسىز ماقسات ءۇشىن جان تالاسا ۇمتىلامىز العا، ءبىراق ەرتەڭ ەرلىك جاسارداي جان ۇشىرا كۇرەسكەن پەندە ءوز عۇمىرىنىڭ - تاعدىرىنىڭ جارتاسىنا سوعىلىپ، باقي اتتانارىن باعامداپ، پارىقتاي بەرمەيدى...

ايەل ادامنىڭ ادەمى بولعانى جاقسى عوي. الايدا، اقىل مەن كورىك اندا- ساندا توقايلاسىپ، جۇپتاسىپ ءومىر سۇرە الماۋى مۇمكىن...

قايدا قاراساڭ دا اپپاق قار سەڭدەي سىرەسكەن، تۇتاسا قاساتتانعان سۋىق دۇنيە... الىستان - تىم شالعايدان قىزدىڭ سىڭسىتا سالعان ءانى كەلدى قۇلاققا...***كىم بىلسىن... كىمنىڭ ىشىنە كىم كىرىپ شىققان؟ ! بارىمىزدە دە اشىلماعان سىر، ايتىلماعان ءسوز بار- اۋ...

نەگە ءبىز وسى وتىرىك سويلەيمىز، وتىرىك كۇلەمىز، قىسقاسى - وتىرىك ءومىر سۇرەمىز، ا؟ نەگە ءبىز وسى ءوزىمىزدىڭ بۇل الەمگە ارتىق، تۇككە دە كەرەگىمىز جوق بەيشارا مۇسكىن ەكەنىمىزدى مويىندامايمىز... نەگە ءبىز وسى قاتىگەز دە، قاسيەتسىز بولىپ كەتتىك.

بۇل جالعانداعى ەڭ سورلى نارسە - ءوزىڭدى ءوزىڭ تۇتقىنداۋ، وزىڭنەن ءوزىڭ قاشىپ قۇتىلا الماۋ، بۇعان دەيىنگى جيىركەنىشتى ءارى جانىڭدى جارىلقاماي جارالايتىن ويسىز قىلىقتارىڭ مەن وپاسىز ارەكەتتەرىڭنەن قۇلان- تازا ارىلا الماۋ، نەمەسە تازالىقتىڭ نارقىن باعامداي وتىرىپ، رۋحىڭا، بولمىسىڭا، تىپتى, ءتاڭىرىم- اۋ، تابيعاتىڭا جات وعاشتىقتىڭ ورتاسىندا سۇڭگىلەسىپ ءجۇرۋ ەمەس پە؟ء

بىز قاتىگەزدەنىپ بارامىز، ءبىز يمانسىزدانىپ بارامىز، ءبىز اينالايىن انامىزدىڭ اق ءسۇتىن اقتاي الماي ءجۇرمىز. ءبىز بابامىزدىڭ باتاسىن ۇمىتتىق، ءبىز تاريحىمىزدى تاسپەن باستىرىپ، ءبىر كۇنى قىز- قىزدى قىزىققا ماستانىپ تاسىراڭدادىق، كوزىمىزدى شەل باستى، كوڭىلىمىز كور، جىگەرىمىز قۇم بولىپ قۇردىم داۋرەننىڭ ءالاۋلايىن شىرقاپ ءجۇرمىز... بەرەكەسى دە بەكەر ءىشىم- جەمنىڭ قۇلى بولساق، ءبىز ءۇشىن جالعىز جانىن ساداقالاعان اتا- بابا ءارۋاعىنان ۇيات ەمەس پە؟ ! ءيا، ءارۋاققا ادالدىق، وتكەنگە يمان بولمايىنشا تىرىلەرگە سالاۋات جوق. ءتىپتى ءبىز كۇنى بۇگىنگە دەيىن ۇلتتىق ادامگەرشىلىك، يماندىق بەت- بەينەسى مەن بولمىسىن، كەلبەتى لايىقتىلىعىن انىقتاي الماي ءجۇرمىز...

جاۋاپتى رەداكتورى: سەرىك دالەلقان ۇلى

سۋرەتتەر سويلەيدى

رال مادريد فۋتبول كلۋبى

فۋتبول پاتشاسى ــــ كريستينانو  لوناردو

ٴشول دالاعا ساياحات

الۋان فورماداعى دۇنيە قاريتاسى

سۇلۋ تابيعات

عىلىم-تەحنيكا ـــــ ۇلى كۇش

تۇلپارلار

مۇحتار اۋەزۆ мухтар ауэзов

مۇقاعالي ماقاتايەۆ

اكادەميا سىر شەرتەدى

كەلپىن قاراكول تابيعي قورىق رايونى

تۇرپان سور اراسان كورىنىستەرى