مەملەكەت ءتوراعاسى شي جينپيڭ 2022 - جىلعى جاڭا جىلدى قۇتتىقتاۋ ءسوزىن جاريالادى

كەلۋ قاينارى: شينجياڭ گازەتى   |   جولدانعان ۋاقىتى:2022 - 01 - 05 17:01

جاڭا جىل قارساڭىندا، مەملەكەت ءتوراعاسى شي جينپيڭ ورتالىق راديو - تەلەۆيزيا باس ستانسياسى جانە ينتەرنەت ارقىلى

2022 - جىلعى جاڭا جىلدى قۇتتىقتاۋ ءسوزىن سويلەدى.

 سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن

شينحۋا اگەنتتىگىنىڭ 12 - ايدىڭ 31 - كۇنى بەيجيڭنەن بەرگەن حابارى. جاڭا جىل قارساڭىندا، مەملەكەت ءتوراعاسى شي جينپيڭ ورتالىق راديو - تەلەۆيزيا باس ستانسياسى جانە ينتەرنەت ارقىلى 2022 - جىلعى جاڭا جىلدى قۇتتىقتاۋ ءسوزىن جاريالادى. ءسوزدىڭ تولىعى تومەندەگىدەي:

كوپشىلىك سالەمەتسىزدەر مە، 2022 - جىلى كەلۋ الدىندا تۇر. مەن بەيجيڭدە كوپشىلىككە جاڭا جىلدىق تىلەك بىلدىرەمىن!

وسى جىلعا قايىرىلا قاراساق، ماڭىزى وزگەشە ءبىر جىل بولدى. ءبىز پارتيا مەن مەملەكەت تاريحىنداعى بەلەستىك مانگە يە ماڭىزدى ىستەردى باسىمىزدان كەشىردىك. ”قوس 100 جىلدىق“ كۇرەس نىساناسىنىڭ تاريحي توعىسىندا، ءبىز جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىن باستاپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ جولىندا كوكىرەك كەرە ارشىندى قاداممەن العا باسىپ كەلەمىز.

جىل باسىنان جىل سوڭىنا دەيىن اتىز باستارىندا، كاسىپورىنداردا، الەۋمەتتىك اۋماقتاردا، مەكتەپتەردە، شيپاحانالاردا، اسكەري كازارمالاردا، عىلمي زەرتتەۋ ورىندارىندا... كوپشىلىك جىل بويى تىنىم الماي، ەڭبەك ەتىپ، ۇلەس قوستىڭىزدار، ونىڭ ەسەسىنە تابىسقا دا قول جەتكىزدىڭىزدەر. زىمىراعان ۋاقىت كوشىندە، ءبىز كوزىمىزبەن كورگەن، جۇرەگىمىزبەن ۇعىنعان جۇڭگو قايىسپاس قايسار، گۇلدەنىپ قۇلپىرا تۇسكەن جۇڭگو بولدى. مۇندا ءبىزدىڭ اياۋلى دا ارداقتى حالقىمىز، كۇن سايىن جاڭارىپ، اي سايىن تۇلەجىگەن دامۋىمىز، ۇزبەي ءىز جالعاپ، مۇراگەرلىك ەتكەن ىستەرىمىز بار.

7 - ايدىڭ 1 - كۇنى ءبىز جۇڭگو كوممۋنيستىك پارتياسى قۇرىلعاندىعىنىڭ 100 جىلدىعىن سالتاناتپەن قۇتتىقتادىق. تيان - انمىن مىنبەسىندە تۇرىپ ەرەكشە تەبىرەندىم، تاريح كوشىنىڭ الماعايىپ اۋقىمىندا، جۇڭگو كوممۋنيستەرى ميلليارد حالىققا باسشىلىق ەتىپ، تالاي تاۋقىمەتتى باستان كەشىرىپ، قاجىماس قايسارلىق كورسەتىپ، قانشاما قاتەرگە جولىقسا دا مۇراتىنان جازباي، 100 جىلدىق ۇلى پارتيانىڭ ايبىندى كەلبەتىن، اسقاق بەينەسىن سومدادى. اۋەلگى ماقساتتى ۇمىتپاعاندا عانا، ءىستىڭ سوڭى باياندى بولادى. ءبىز اسقاق جىگەرمەن قايراتتانا ۇمتىلىپ، مويىماس تاباندىلىقپەن العا باسقاندا عانا، تاريحتىڭ ۇمىتىنەن شىعا الامىز، ءداۋىردىڭ ۇمىتىنەن شىعا الامىز، حالىقتىڭ ۇمىتىنەن شىعا الامىز.

پارتيا 19 - كەزەكتى ورتالىق كوميتەتىنىڭ التىنشى جالپى ءماجىلىسى پارتيانىڭ ءۇشىنشى تاريحي قارارىن ماقۇلدادى. 100 جىلدىق تابىستار ءبىزدى جىگەرلەندىرىپ، 100 جىلدىق تاجىريبەلەر ۇلكەن وي سالدى. مەن كەزىندە ماۋ جۋشي مەن حۋاڭ يانپەي مىرزانىڭ ”جەر تولەدەگى اڭگىمەسىن“ اۋىزعا العان ەدىم، ءبىز تەك وزىمىزگە ءوزىمىز توڭكەرىس جاساۋعا باتىل بولعاندا عانا، تاريحي ىرىقتىلىققا قول جەتكىزە الامىز. جۇڭحۋا ۇلتىنىڭ ۇلى گۇلدەنۋى استە جەڭىل - جەلپى، قۇر ايعاي - سۇرەنمەن جۇزەگە اسا سالاتىن ءىس ەمەس، وعان ءارقاشان كۇدىر - بوگەتسىز، قىسقا ۋاقىتتا قول جەتكىزە سالۋ دا استە مۇمكىن ەمەس. ءبىز قاشاندا ۇزاق بولاشاقتى كوزدەۋىمىز، امانشىلىقتا جامانشىلىقتىڭ بولارىن ويلاۋىمىز، ستراتەگيالىق تاباندىلىق پەن سابىرلىلىقتى ساقتاۋىمىز، ۇشان - تەڭىز مول دەڭگەيگە جەتۋىمىز ءارى جىڭىشكە، نازىك تۇستارعا دا قۇلشىنۋىمىز“ كەرەك.

ءىرى ەلدە ءىرى ەلگە ءتان سالاۋات بولادى، سونداي - اق ءىرى ەلگە ءتان جاۋاپكەرشىلىك تە بولادى. سان سالالى ىستەر، تۇپتەپ كەلگەندە، جالپى جۇرتتىڭ، بارشا وتباسىنىڭ ءىسى بولىپ تابىلادى. مەن ءبىراز جەردە تەكسەرۋ - زەرتتەۋ جۇرگىزىپ، ءبىرتالاي جاعدايلاردى كوردىم، ەستىدىم، بۇلار ماعان كوپ وي سالدى جانە تابىس سيلادى. ءار جولى بۇقارانىڭ ۇيىنە بارعانىمدا، تاعى قانداي قيىنشىلىقتارىڭىز بار دەپ ۇنەمى سۇراپ، اۋىلداستاردىڭ سوزدەرىن ءارقاشان كوڭىلىمە ءتۇيىپ وتىردىم.

حالىقتىڭ قامىن ءارقاشان كوكەيىمنەن شىعارمايمىن؛ حالىقتىڭ قالاۋىن، مەن، ءسوز جوق، ورىنداۋعا ۇمتىلامىن. مەن دە اۋىل - قىستاقتان شىقتىم، كەدەيلىك جايىن ابدەن بىلەمىن. ۇرپاقتان - ۇرپاققا جالعاستىرا قۇلشىنۋ ارقىلى كەشەگى كەدەي ادامدار قازىر تويا تاماقتانىپ، جىلى كيىنە الاتىن بولدى، ولار وقيتىن وقۋعا، تۇراتىن ۇيگە، ەمدەۋ قامسىزداندىرۋىنا دا يە بولدى. جاپپاي دوڭگەلەك داۋلەتتىلىككە جەتۋ، كەدەيلىكتەن ارىلتۋ پارتيامىزدىڭ حالىققا بەرگەن جاۋابى، سونداي - اق دۇنيە جۇزىنە قوسقان ۇلەسى بولىپ تابىلادى. كوپشىلىكتى اناعۇرلىم تاماشا تۇرمىسقا كەنەلتۋدە ءبىزدىڭ كوز الداعى ناتيجەلەرگە قاناعاتتانىپ قالۋىمىزعا بولمايدى، ءالى دە ۇزاق جول باسۋىمىزعا تۋرا كەلەدى.

حۋاڭحى وزەنىنىڭ تىنىشتىعى جۇڭحۋا پەرزەنتتەرىنىڭ مىڭ جىلدىق ارمانى. جاقىنعى جىلداردان بەرى مەن حۋاڭحى وزەنىنىڭ جوعارعى، ورتاڭعى، تومەنگى اعارىنداعى 9 ولكە - اۆتونوميالى رايوندى ارالاپ شىقتىم. مەيلى ”انا وزەن“ اتالعان حۋاڭحى، چاڭجياڭ وزەندەرى بولسىن، الدە ءمولدىر تولقىنى شىمىرلاعان چيڭحاي كولى، يرەكتەلە جوڭكىلگەن يالۋزاڭبۋ وزەنى بولسىن؛ مەيلى وڭتۇستىكتىڭ سۋىن سولتۇستىككە جەتكىزۋدەي عاسىرلىق ينجەنەريا بولسىن، الدە سايحانبا ورمان الاڭىنداعى ”جاسىل كارتا“ بولسىن؛ مەيلى يۇنناندا پىلدەردىڭ سولتۇستىككە اۋىپ، وڭتۇستىككە قايتۋى بولسىن، الدە شيزاڭ بوكەنىنىڭ ءوسىپ - ءوربۋ ءۇشىن ءورىس جاڭالاۋى بولسىن... وسىلاردىڭ بارلىعى ادام جاسىل تاۋدى ارداقتاسا، جاسىل تاۋ دا، ءسوز جوق، ادامنىڭ ءۇمىتىن اقتايتىندىعىن كورسەتتى.

وسى جىلدا تاعى ەستەن كەتپەس تالاي - تالاي جۇڭگو ءۇنى، جۇڭگو ءساتى، جۇڭگو حيكاياسى جارىققا شىقتى. ”پارتيا الاڭسىز بول، مەملەكەتتى قۇدىرەتتەندىرۋدە مەن بارمىن “ دەگەن جاستىق كوكتەم سەرتى، ”ءمولدىر ماحاببات تەك جۇڭگوعا ارنالادى“ دەگەن جۇرەك جاردى تىلەكتەر؛ ”جۋرۇڭنىڭ“ مارستى بارلاۋى، ”شيحىنىڭ“ كۇن جۇيەسىن بارلاۋى، ”تيانحىنىڭ“ جۇلدىزدار ارا قىدىرۋى؛ سپورت ساڭلاقتارىنىڭ تاسقىنداعان جىگەرمەن ءوز ونەرلەرىن كورسەتىپ، قارا ءۇزىپ شىعۋعا ەرلىكپەن ۇمتىلۋى؛ بۇكىل ەلدەگىلەردىڭ جوعارى - تومەن بولىپ جۇمىلىپ، ىندەتتەن ساقتانۋ - تىزگىندەۋدى باتىل، پارمەندى جۇرگىزۋى؛ اپاتقا ۇشىراعان بۇقارانىڭ ءوزارا قارايلاسىپ، ءبىر - بىرىنە كومەكتەسىپ، مەكەندەرىن قايتا قۇرۋى؛ حالىق ازاتتىق ارمياسى كوماندير - جاۋىنگەرلەرىنىڭ، قارۋلى ساقشى بولىمدەرىندەگى وفيتسەر - اسكەرلەردىڭ ارميانى قۇدىرەتتەندىرۋدى مۇرات ەتىپ، وتان - وتباسىن قورعاۋى... سان - ساناقسىز قاراپايىم قاھارماندار ايانباي كۇرەس جۇرگىزىپ، جاڭا داۋىردەگى جۇڭگونىڭ كوكىرەك كەرە ەرلىكپەن العا باسقان جويقىن اعىنى بولىپ قۇيىلدى.

وتانىمىز شياڭگاڭنىڭ، اۋمىننىڭ گۇلدەنىپ - كوركەيۋىن، ورنىقتىلىعىن ءارقاشان كوكەيدەن شىعارعان ەمەس. تەك ءبىر نيەتپەن كۇش بىرىكتىرىپ، بىرگە قۇلشىنعاندا عانا، ”ءبىر ەل، ەكى ءتۇزىم“ نىق قاداممەن الىسقا جەتە الادى. وتاننىڭ بۇكىلدەي بىرلىككە كەلۋىن جۇزەگە اسىرۋ − ەكى جاعالاۋداعى باۋىرلاستاردىڭ ورتاق تىلەگى. بارشا جۇڭحۋا پەرزەنتتەرىنىڭ قول ۇستاسا العا باسىپ، جۇڭحۋا ۇلتىنىڭ تاماشا بولاشاعىن بىرگە جاراتۋلارىن شىن جۇرەكتەن اڭسايمىن.

مەن شەتەل باسشىلارىمەن جانە حالىقارالىق ۇيىمداردىڭ جاۋاپتىلارىمەن تەلەفوندا پىكىرلەسكەن، بەينە ەكراندا سويلەسكەن كەزدە، ولار كوپ رەت جۇڭگونىڭ ىندەتكە قارسى اتتانۋعا جانە دۇنيە جۇزىندەگى ىندەتتەن ساقتانۋ - تىزگىندەۋگە قوسقان ۇلەسىن القادى. قازىرگە دەيىن جۇڭگو 120دان استام مەملەكەت پەن حالىقارالىق ۇيىمعا جيىنى 2 ميلليارد دانادان استام جاڭا تيپتى ايدارشا ۆيرۋس ۆاكسيناسىن بەردى. الەمدەگى ءار ەل قيىندىقتى بىلەك بىرىكتىرە جەڭىپ، ىنتىماقتاسا سەلبەسكەندە عانا، ادامزاتتىڭ تاعدىرلاس ورتاق تۇلعاسىن قۇرۋدىڭ جاڭا تاراۋىن جازا الادى.

ەندى ءبىر ايدان استام ۋاقىتتان كەيىن بەيجيڭ قىسقى وليمپيادا سپورت جارىسىنىڭ، مۇگەدەكتەر قىسقى وليمپيادا سپورت جارىسىنىڭ شىمىلدىعى اشىلادى. اناعۇرلىم كوپ ادامدى قار - مۇز سپورتىنا قاتىناستىرۋ وليمپيادا سپورتىنىڭ ءمان - ماڭىزى دا بولىپ تابىلادى. ءبىز شىن كوڭىلمەن دۇنيە جۇزىنە وليمپيادانىڭ سالتاناتتى جينالىسىن تارتۋ ەتەمىز. دۇنيە ءجۇزى جۇڭگودان ءۇمىت كۇتۋدە، جۇڭگو دايىندالىپ بولدى.

جاڭا جىل قوڭىراۋى سوعىلۋ الدىندا تۇر. ءبىزدىڭ 3 عارىشكەرىمىز وسى ساتتە شەتسىز - شەكسىز عارىش كەڭىستىگىندە ”ءىسساپاردا“ ءجۇر، شەتەلدەگى باۋىرلاستار ءالى دە قاجىرلىلىقپەن ەڭبەك ەتۋدە، ەلشىلىك - كونسۋلحانالار، جۇڭگو قارجىلاندىرعان كاسىپورىندار سياقتى شەتەلدە تۇرۋعا جىبەرىلگەن ورىندارداعى قىزمەتكەرلەر مەن شەتەلدەگى قالىڭ وقۋشىلار قاجىماس تاباندىلىق كورسەتۋدە، ارمانعا ۇمتىلعان سان - ساناقسىز ادامدار توقتاۋسىز كۇرەس جۇرگىزىپ، ۇلەس قوسۋدا. كوپشىلىك جاپا شەكتىڭىزدەر، مەن سىزدەرگە شىن جۇرەكتەن جاڭا جىلدىق سالەم جولدايمىن!

ءبارىمىز بولاشاققا بىرگە اتتانايىق! ەل امان، جۇرت تىنىش بولۋىن تىلەيمىن!

كەلۋ قاينارى

جاۋاپتى رەداكتورى: سەرىك دالەلقان ۇلى

سۋرەتتەر سويلەيدى

شينجياڭ ۋاكىلدەر ۇيىرمەسى جالپى ءماجىلسى مەديالارعا اشىق ۇستالدى

مەملەكەتتىك ساياسي كەڭەستىڭ شينجياڭداعى مۇشەلەرى مەملەكەتتىك ەكى ماجىلىسكە قاتىناسۋ ءۇشىن بەيجيڭگە اتتاندى

جاڭ چۇنلين شينجياڭ ۇيعۇر اۆتونوميالى رايونى ءتوراعاسىنىڭ ۇنەمىلىك ىستەرگە جاۋاپتى ورىنباسارى بولىپ تاعايىندالدى


مەملەكەتتىك 13 - كەزەكتى حالىق قۇرىلتايىنىڭ 1 - ءماجىلىسى بەيجيڭدە جابىلدى

مەملەكەتتىك 13 - كەزەكتى حالىق قۇرىلتايى 1 - ءماجىلىسى مەملەكەتتىڭ جاڭا كەزەكتى باسشىلارىن سايلاپ شىقتى

قارۋلى ساقشى كوماندير-جاۋىنگەرلەر لۋديڭچياۋ كوپىرى ەسكەرتكىشىنىڭ الدىندا پارتياعا كىرۋ سەرتىن قايتالادى

جۇڭگو حالىق ازاتتىق ارمياسى قۇرىلعاندىعىنىڭ 90 جىلدىعى قارساڭىندا وبلىستىڭ ءتورت باسشىلىق القاسىنىڭ باسشىلارى «1 – تامىز» حال سۇراۋ قيمىلىن ورىستەتتى

قورعانىس مينيسترلىگى سالتاناتتى قوناعاسى وتكىزىپ، جۇڭگو حالىق ازاتتىق ارمياسى قۇرىلعاندىعىنىڭ 90 جىلدىعىن قۇتتىقتادى.

جۇڭگو حالىق ازاتتىق ارمياسى قۇرىلعاندىعىنىڭ 90 جىلدىعىن قۇتتىقتاۋ كونسەرتى − «پارتيا تۋى استىندا» بەيجيڭدە قويىلدى

  شي جينپيڭ اسكەري پاراتتى كوزدەن كەشىردى ءارى ماڭىزدى ءسوز سويلەدى

شينجياڭدا جۇڭگو حالىق ازاتتىق ارمياسى قۇرىلعاندىعىنىڭ 90 جىلدىعىنا ارنالعان سيمفونيالىق كەش وتكىزىلدى

ەڭ سۇيىكتى ادامدارعا گۇل ۇسىندى