انار بۇلت \ شينجياڭ گازەتىنىڭ ٴتىلشىسى رىن جياڭ
3 ـ ايدىڭ سوڭىندا شينجياڭ بىرەسە ىسىپ، بىرەسە سۋىپ، كوپ جەردە قار ـ مۇز ٴالى دە ەرىمەسە دە، ساياحاتتىڭ ”جازعىتۇرىمى“ الدىمەن جەتىپ كەلدى. كوكتەمنىڭ جەتكەنىن جەتكىزگەن ”بايشەشەكتەردىڭ“ اراسىندا ورتا ازيا ەلدەرىن بەتكە العان شەكارادان كىرىپ ـ شىعۋ ساياحاتى ادامدار ەڭ ۇناتقان ”بايشەشەكتىڭ“ بىرىنە اينالدى. سوڭعى جىلدارى ورتا ازيا ەلدەرى جۇڭگونىڭ شەكارادان كىرۋ ساياحاتىنىڭ ارتۋى ەڭ تەز جانە كومەسكى كۇشى ەڭ زور وڭىرلەردىڭ بىرىنە اينالدى، جۇڭگو دا ورتا ازيا ەلدەرى ساياحات بازارىنىڭ باستى ساياحاتشى قاينار ەلىنە اينالدى. جىبەك جولى ەكونوميكالىق بەلدەۋىندەگى وزەكتى رايون بولعان جۇڭگونىڭ شينجياڭى مەملەكەتتىڭ باتىسقا ەسىك اشۋىنىڭ شىعىس جەلىنە وراي، اناعۇرلىم كەڭ دامۋ ورىسىنە قادام باستى.
قوس باعىتتا اتتانىپ، ”جازعىتۇرىمدى“ قارسى الدى
بيىلعى كوكتەم _ چىڭ شۇيلۇڭنىڭ جاقىنعى جىلداردان بەرگى ەڭ قاربالاس كوكتەمى بولدى.
چىڭ شۇيلۇڭ شينجياڭ چۇنچيۋجىلۇي حالىقارالىق ساياحات كووپەراتيۆى شەكتى سەرىكتەستىگىنىڭ القا باستىعى. ساياحاتتىڭ داعدىلى سايابىر جانە قاۋىرت مەزگىلىنەن الىپ ايتقاندا، 3 ـ اي ساياحاتتىڭ سالىستىرمالى سايابىر كەزى سانالادى، ٴبىراق بيىل مۇلدەم باسقاشا بولدى، كوكتەم مەرەكەسىنەن كەيىن ونىڭ قولى بوسامادى، شينجياڭ ىشىندەگى ساياحاتتى، ەل ٴىشى ساياحاتىن، شەكارادان شىعىپ ساياحاتتاۋدى ۇيىمداستىردى... جارعاق قۇلاعى جاستىققا تيمەي جۇرگەندە، دەرەۋ شەتەلگە شىعۋىنا تۋرا كەلدى.
”وسى ايدىڭ 28 ـ كۇنى الماتىعا، ودان كەيىن تاشكەنتكە بارامىن.“ 3 ـ ايدىڭ 24 ـ كۇنى تۇڭعىش كەزەكتى شينجياڭ ساياحات ساۋداگەرلەرىنىڭ ساتىپ الۋ جينالىسىندا چىڭ شۇيلۇڭ تىلشىگە بىلاي دەدى: وسى رەتكى جينالىستا چۇنچيۋجىلۇي ساياحات كووپەراتيۆى كورىنىس وڭىرلەرى، قوناق ۇيلەر، جولاۋشى تاسىمال اۆتوكولىك اترەتتەرى سياقتىلارمەن ٴبىر قىدىرۋ كەلىسىمگە قول قويىستى، سەرىكتەستىگىمىز قازاقستاندا، وزبەكستاندا بولىمشە سەرىكتەستىك قۇردى، بيىل ورتا ازياداعى 5 ەلدىڭ ساياحات بازارىندا بار ونەرىمىزدى كورسەتەمىز، ”ٴبىزدىڭ بيىلعى نىسانامىز 10 مىڭ جۇڭگولىق ساياحاتشىنى ورتا ازياداعى 5 ەلگە ساياحاتقا جىبەرۋ. بىلتىر 3000عا تاياۋ ادام (رەت) جىبەردىك، بيىل ۇلكەن ورتا ٴتىپتى جاقسى، ٴبىزدىڭ دايىندىعىمىز دا تولىق“.
وسى كوكتەمدە شينجياڭنىڭ ساياحات كاسىبىندەگى ٴبىرتالاي قايراتكەر دامۋ نازارىن ورتا ازياداعى 5 ەل سياقتى ”ٴبىر بەلدەۋ، ٴبىر جولدى“ بىرگە قۇراتىن ەلدەرگە اۋداردى. 3 ـ ايدىڭ سوڭعى شەنىندە ٴۇرىمجى قالاسى شەكارادان كىرىپ ـ شىعۋ ساياحاتىنىڭ ورلەۋىن كۇتىپ الدى. شينجياڭ باتىس ٴوڭىر حالىقارالىق ساياحات كووپەراتيۆى، شينجياڭ بيانجياڭ حالىقارالىق ساياحات كووپەراتيۆى سياقتىلار ىركەس ـ تىركەس ساۋدا ـ ساتتىق ساياحات ۇيىرمەلەرىن كۇتىپ الدى، شينجياڭ داشيبۋ حالىقارالىق ساياحات كووپەراتيۆى 3 ـ ايدىڭ ورتا، سوڭعى شەنىندە شەكارادان شىعاتىن 3 ساياحات ۇيىرمەسىن ۇيىمداستىرىپ قازاقستانعا جىبەردى.
اۋا رايىنىڭ جىلىنۋىنا ىلەسە، جۇڭگونىڭ شينجياڭى مەن ورتا ازيا ەلدەرى اراسىنداعى ساياحاتشىلاردىڭ ”قوس باعىتتا اتتانۋى“ ۇزدىكسىز قىزا ٴتۇسىپ، قۋانتارلىقتاي ”جازعىتۇرىم“ جاعدايىن جارىققا شىعاردى.
سەلبەسىپ جاڭا كەڭىستىك اشتى
”جۇڭگو شينجياڭ · ورتا ازيا ساياحات سەلبەستىك وداعىنداعى شەتەل ساياحات ساۋداگەرلەرى تۇڭعىش كەزەكتى شينجياڭ ساياحات ساۋداگەرلەرىنىڭ ساتىپ الۋ جينالىسىنا قاتىناسا الماعانىمەن، ٴبىز شينجياڭنىڭ ٴىشى ـ سىرتىنداعى بيىل العا قويىلعان ساياحات ونىمدەرى، ساياحات جەلىلەرى سياقتىلاردى ولارعا جىبەرىپ بەردىك. قازىر ٴتۇرلى اۋىس ـ كۇيىس جاپپاي ورىستەتىلۋدە“، ـ دەدى اۆتونوميالى رايوندىق ساياحات كووپەراتيۆى قوعامىنىڭ باستىعى ۋ فىڭ. تۇڭعىش كەزەكتى شينجياڭ ساياحات ساۋداگەرلەرىنىڭ ساتىپ الۋ جينالىسىن اۆتونوميالى رايوندىق ساياحات كووپەراتيۆى قوعامى جانە جۇڭگو شينجياڭ · ورتا ازيا ساياحات سەلبەستىگى وداعى ۇيىمداستىرىپ وتكىزگەن، ال جۇڭگو شينجياڭ · ورتا ازيا ساياحات سەلبەستىگى وداعى اتاۋلى قوعامنىڭ جەتەكشىلىگىندە، ورتا ازياداعى 5 ەلدىڭ مادەنيەت جانە ساياحات كاسىبى قوعامدارىمەن، كاسىپورىندارىمەن بىرلەسىپ 2023 ـ جىلى 6 ـ ايدا قۇرىلعان.
ٴوزارا بارىس ـ كەلىس جاساسىپ، اڭگىمە ٴماجىلىس جانە تانىستىرۋ جينالىسىن وتكىزدى، ساياحات جەلىلەرىن جانە ونىمدەرىن اقىلداسىپ دايىندادى، ٴوزارا ساياحاتشى جىبەردى... قۇرىلعانىنا ٴبىر جىل بولماعانىمەن، بۇل وداقتىڭ ٴتۇرلى قيمىلدارى جاندى دا جالىندى ورىستەتىلدى. ”وداق _ جۇڭگونىڭ شينجياڭى مەن ورتا ازياداعى بەس ەلدىڭ ساياحات كاسىپورىندارى اراسىندا ساياحات بايلىقتارىن ٴوزارا ۇگىتتەيتىن، تانىستىراتىن، ٴوزارا ساياحاتشى جىبەرۋدى ىسكە اسىراتىن، كاسىپ زەرتتەۋىن كۇشەيتەتىن تۇعىر بولىپ، ۇكىمەت تاراۋلارىنا دالمە ـ ٴدال كاسىپ ينفورماتسياسى مەن ۇسىنىس ازىرلەپ، ’ٴبىر بەلدەۋ، ٴبىر جولدى‘ بىرگە قۇرۋعا ۇلەس قوسادى“، ـ دەدى ۋ فىڭ.
جۇڭگو شينجياڭ · ورتا ازيا ساياحات سەلبەستىگى وداعىنىڭ قارىشتاي دامۋىن شينجياڭ ساياحاتىنىڭ ەسىك اشۋ سەرپىنىن ۇزدىكسىز ارتتىرىپ، جوعارى ساپالى دامۋدى جۇزەگە اسىرۋىنان بولە قاراۋعا بولمايدى.
جۇڭگونىڭ شينجياڭى مەن ورتا ازياداعى ەلدەردىڭ تاۋ ـ سۋى ۇلاسقان، حالىق تىلەگى توعىسقان. ”ٴبىر بەلدەۋ، ٴبىر جولدى“ بىرگە قۇرۋ باستاماسى العا قويىلعاننان بەرى شينجياڭ مەن ورتا ازيا ەلدەرىنىڭ ەكى جاقتى جانە كوپ جاقتى جۇلگەدەگى ساياحات سالاسىنىڭ سەلبەستىگى ورنىقتى قاداممەن العا دامىپ، ادامداردىڭ بارىس ـ كەلىسى ۇزدىكسىز ارتىپ، سەلبەستىك تەرەڭدىگى، كەڭدىگى ۇزدىكسىز ۇلعايىپ، جان ـ جاقتى، كەڭ سالالى، كوپ ارنالى سەلبەستىك، اۋىس ـ كۇيىس جاعدايىن قالىپتاستىردى. اسىرەسە، 2023 ـ جىلى تۇڭعىش كەزەكتى جۇڭگو _ ورتا ازيا باسشىلار ٴماجىلىسى ٴساتتى وتكىزىلگەننەن كەيىن، شينجياڭ باسشىلار ٴماجىلىسىنىڭ جەتىستىكتەرىن مۇقيات تياناقتاندىرىپ، ورتا ازيا ەلدەرىمەن اراداعى مادەنيەت ـ ساياحات سالاسىنداعى اۋىس ـ كۇيىستى، سەلبەستىكتى ۇزدىكسىز كۇشەيتىپ، ٴبىر قىدىرۋ ناقتى جەتىستىكتەرگە قول جەتكىزدى.
2023 ـ جىلى شينجياڭنىڭ قاتىستى جاقتارى ىلگەرىندى ـ كەيىندى قازاقستاندا، وزبەكستاندا ”شينجياڭ جاقسى جەر“ مادەنيەت اۋىس ـ كۇيىس جانە ساياحات جالپىلاستىرۋ قيمىلىن وتكىزدى؛ ۇيىرمە ۇيىمداستىرىپ قازاقستان سياقتى ەلدەرگە بارىپ، جەرگىلىكتى ورىنداعى ساياحات كاسىپورىندارىمەن اڭگىمە ٴماجىلىسىن وتكىزىپ، بايلانىس جاساپ، سەلبەستىك بارىس ـ كەلىس ورناتىپ، ٴبىر قىدىرۋ ”جۇڭگو شينجياڭ + ورتا ازيا“ ساياحات جاڭا جەلىلەرىن، جاڭا ونىمدەرىن ۇسىندى؛ شينجياڭنىڭ ساياحات كووپەراتيۆتەرى دەرەۋ اتتانىسقا كەلىپ، شەكارادان شىعۋ ساياحات ۇيىرمەلەرىن ۇيىمداستىرىپ، اناعۇرلىم كوپ جۇڭگولىق ساياحاتشىنى ورتا ازياداعى 5 ەلگە جىبەردى. ورتا ازياداعى 5 ەل دە ٴجيى ـ ٴجيى ۇيىرمە ۇيىمداستىرىپ شينجياڭعا كەلىپ، 6 ـ كەزەكتى جۇڭگو شينجياڭ حالىقارالىق ۇلتتار ٴبي فەستيۆالى، ”كوركەم جۇڭگو، جۇڭگونى بايقاۋ ساياحاتى“، تۇڭعىش كەزەكتى شينجياڭ حالىقارالىق ساياحات فوتو سۋرەت جينالىسى سياقتى قيمىلدارعا قاتىناستى.
بيىل 2 ـ ايدا قازاقستان ۋاكىلدەر ۇيىرمەسى شينجياڭدا ساياحات كومەسكى كۇشىن تانىستىرۋ جينالىسىن جانە بايلىقتى ٴتۇيىلىستىرۋ جينالىسىن اشتى. قازاقستاننىڭ كوپتەگەن ساياحات كاسىپورنى الىستان كەلىپ ٴتۇيىلىستىرۋ جينالىسىنا قاتىناستى، شينجياڭنىڭ ساياحات كاسىپورىندارى جابال ٴتۇيىلىسىپ، 300 ادام سياتىن جينالىس ورنىندا وتىراتىن ورىن قالماي، ٴۇرتىس 3 رەت ۋاقىتشا ورىندىق قوستى، وسىدان ـ اق ەكى ەل ساياحات كاسىپورىندارى اراسىنداعى سەلبەستىك ىنتاسىن بايقاۋعا بولادى.
ٴبىر باعىتتا اتتانىپ، بولاشاققا جول الدى
كوپ ساتىلى، كوپ سالالى، جوعارى جيىلىكتەگى مادەنيەت ـ ساياحات اۋىس ـ كۇيىس قيمىلى جۇڭگونىڭ شينجياڭى مەن ورتا ازيا ەلدەرى اراسىنداعى ساياحات اۋىس ـ كۇيىس سەلبەستىگى سياقتى مەحانيزمدەردى اناعۇرلىم كەمەلدەندىرىپ، ٴبىر باعىتتا اتتانۋ قادامى اناعۇرلىم ورنىقتى بولدى.
2023 ـ جىلى شينجياڭ جيىنى 3 ميلليون 530 مىڭ شەكارادان كىرگەن ساياحاتشىنى (رەت) قابىلدادى، مۇنىڭ ىشىندە ورتا ازيا ەلدەرىنەن شەكارادان كىرگەن ساياحاتشى ٴبىر ميلليون 821 مىڭ (رەت)، قازاقستاننان شەكارادان كىرگەن ساياحاتشى ٴبىر ميلليون 708 مىڭ (رەت) بولدى. سونىمەن بىرگە 2023 ـ جىلى قازاقستانعا بارعان جۇڭگولىق ساياحاتشىلاردىڭ سانى دا تاريحتاعى جاڭا ورەنى جاراتتى. ”ورتا ازيا جۇڭگونىڭ شەكارادان كىرۋ ساياحاتىنىڭ ارتۋى ەڭ تەز جانە كومەسكى كۇشى ەڭ زور وڭىرلەردىڭ ٴبىرى، جۇڭگو دا ورتا ازيا ٴوڭىرى ساياحات بازارىنىڭ ەڭ باستى ساياحاتشىلار قاينار ەلى، ەكى جاقتىڭ ساياحات بايلىعىنىڭ ٴبىرىن ـ ٴبىرى تولىقتاۋ سيپاتى كۇشتى، دامۋ كومەسكى كۇشى زور“. اۆتونوميالى رايوندىق مادەنيەت جانە ساياحات مەڭگەرمەسى كاسىپ سالاسىن دامىتۋ باسقارماسىنىڭ باستىعى تاڭ ۋىن مىنالاردى ٴبىلدىردى: ۆيزاسىز كىرۋ سياقتى ٴتيىمدى ساياساتتاردىڭ اتقارىلۋىنا ىلەسە، ورتا ازيا ەلدەرىنىڭ جۇڭگونىڭ شەكارادان شىعۋ ساياحاتى بازارىندا ۇستاعان ۇلەسى ۇزدىكسىز ارتىپ، ساياحات ورلەۋى ۇزدىكسىز جوعارىلاپ، جۇڭگونىڭ شينجياڭىنداعى، اۋەلى، ەل ىشىندەگى باسقا ولكەلەردەگى ساياحاتشىلاردىڭ شەكارادان شىعۋ ساياحاتىندا الدىمەن تاڭدايتىن جەرىنە اينالدى.
بيىل شينجياڭ ساياحاتتى اشۋ سەرپىنىن ۇزدىكسىز كۇشەيتىپ، ساياحات كووپەراتيۆتەرى، كاسىپورىندارى سياقتىلاردىڭ ورتا ازيا ساياحات بازارىن اشۋىنا قولداۋ كورسەتۋمەن بىرگە، ورتا ازيا ەلدەرىندەگى ساياحات كاسىپورىندارىن شينجياڭعا كەلىپ قارجى قوسىپ، شارۋاشىلىقتى گۇلدەندىرۋگە باۋراپ، ىنتالاندىرىپ، سەلبەستىك جاساسىپ تەڭ يگىلىككە كەنەلۋدى جۇزەگە اسىرىپ، شەكارا ساياحاتى سىناق رايونىن جانە شەكارا اتتاعان ساياحات سەلبەستىگى رايونىن قۇرۋدى قولدايدى. سونىمەن بىرگە ساياحات ونىمدەرىمەن قامداۋدى اناعۇرلىم بايىتادى _ جۇڭگو شينجياڭىنىڭ مادەنيەت ـ ساياحات كاسىپ سالاسىنا قارجى قوسۋعا، قارجى قۇراۋعا قىزمەت وتەۋ تۇعىرىن ساپالىلاندىرىپ، دارەجەسىن ٴوسىرىپ، اناعۇرلىم كوپ ساپالى مادەنيەت ـ ساياحات نىسانىن اتقارىپ، شينجياڭنىڭ ساياحات كاسىپ سالاسىنىڭ دەڭگەيىن جوعارىلاتىپ، دارەجەسىن وسىرۋگە باستايدى؛ ورتا ازيا ەلدەرىمەن بىرلەسىپ شەكارا اتتاعان ساياحات جەلىسىن تۇلعالاپ، حالىقارالىق ساياحات كەزەكشى پويەزىن قاتىناتۋ سياقتىلاردى اقىلداسادى. جۇڭگو ”قازاقستان ساياحات جىلى“، سونداي ـ اق ”شينجياڭ جاقسى جەر“ مادەنيەت اۋىس ـ كۇيىسى جانە ساياحات جالپىلاستىرۋ قيمىلى سياقتىلاردى ماڭىزدى ٴتۇيىن ەتىپ، ساياحاتتى ۇگىتتەۋ، تانىستىرۋ تاسىلىندە جاڭالىق اشىپ، مادەنيەت پەن ساياحاتتى ۇگىتتەۋدى، تانىستىرۋدى بار كۇشپەن ورىستەتەدى. ”ٴبىز تاعى ساياحات بازارى ورتاسىن ۇزدىكسىز ساپالىلاندىرىپ، ساياحات كەشەندى قىزمەت وتەۋىن كەمەلدەندىرىپ، ساياحاتتىڭ قىزمەت وتەۋ ساپاسىن جوعارىلاتىپ، ’شينجياڭ جاقسى جەر‘ تانىسقىسىن جايناتىپ، دۇنيە ٴجۇزى بويىنشا ماڭىزدى ساياحات نىسانالى جەرىن قۇلشىنا تۇلعالاپ، اناعۇرلىم كوپ ورتا ازيالىق ساياحاتشىنى شينجياڭعا كەلۋگە، شينجياڭدى تۇسىنۋگە، شينجياڭدى ۇناتۋعا باۋرايمىز“، ـ دەدى تاڭ ۋىن.
ازيا _ ەۆروپا التىن ارناسىن جانە باتىسقا ەسىك اشۋدىڭ الدىڭعى شەبىن تۇلعالاۋدى كوزدەگەن شينجياڭنىڭ ساياحات كاسىبىنىڭ جوعارى ساپالى دامۋى اناعۇرلىم كەڭ دامۋ كەڭىستىگىن اشۋدا.
”ورتا ازيا ەلدەرى ساياحاتشىلارى شينجياڭداعى ساۋدا ـ ساتتىق ساياحاتى، ەمدەلۋ، كۇتىنۋ ساياحاتى، زەرتتەۋ، ۇيرەنۋ ساياحاتى سياقتىلارعا ايرىقشا قىزىعادى، ٴبىز 4 ـ ايدىڭ سوڭىندا جۇڭگو شينجياڭ · ورتا ازيا ساياحات سەلبەستىگى وداعىنداعى ورتا ازيا ەلدەرىنىڭ تىرەكتى مۇشەلەرىن شينجياڭعا كەلىپ ساياحات جەلىسىن كوزىمەن كورۋگە ۇسىنىس ەتىپ، بازار باۋراۋ قۋاتىنا يە اناعۇرلىم كوپ ٴونىم اشىپ، سەلبەستىك، اۋىس ـ كۇيىس كولەمىن كەڭەيتۋدى جوسپارلاپ وتىرمىز“، ـ دەدى ۋ فىڭ.
بىلتىر شينجياڭ چۇنچيۋجىلۇي ساياحات كووپەراتيۆى ورتا ازيا ەلدەرىنە جىبەرگەن ساياحات ۇيىرمەلەرىنىڭ اراسىندا ساياحاتشىلاردىڭ 80 پايىزى شينجياڭنىڭ سىرتىنان كەلگەن. چىڭ شۇيلۇڭ بىلاي دەدى: ”قازىر جۇڭگولىق ساياحاتشىلاردىڭ ورتا ازيا ەلدەرىنە ساياحاتقا بارۋ ىنتاسى كۇشەيدى، ٴبىز ’شينجياڭ ٴىشى ساياحاتى + شەكارادان شىعۋ ساياحاتى‘ سياقتى كوپ ٴتۇرلى جەلىنى، ٴونىمدى جوبالادىق“. بىلتىر ول جارتى جىل ۋاقىتىن ورتا ازيا ەلدەرىندە وتكىزگەن ەدى، بيىل ٴتىپتى دە ۇزاق بولۋى مۇمكىن.