انار بۇلت \ شينجياڭ گازەتىنىڭ ٴتىلشىسى ليۋ ي 6 ـ ايدىڭ 24 ـ كۇنى ۇرىمجىدەن حابارلايدى. اۆتونوميالى رايوندىق حالىق ۇكىمەتىنىڭ اقپارات كەڭسەسى اشقان جازعى استىق ساتىپ الۋ ساياساتى جونىندەگى اقپار جاريالاۋ ماجىلىسىنەن ۇعىسۋىمىزشا، بيىل جازعى جيىن ـ تەرىن كەزىندە شينجياڭ استىق ساتاتىن بۇقارانىڭ ”ۇزاق كەزەككە تۇرۋ“ ماسەلەسىن ارناۋلى جونگە سالىپ، استىق ساتاتىن بۇقارانىڭ ”استىقتى جايلى ساتۋىنا“، ”استىقتى رازىلىقپەن ساتۋىنا“، ”استىقتى ٴبىلىپ ساتۋىنا“ مۇمكىندىك جاسايدى ەكەن.
تانىستىرۋعا قاراعاندا، شينجياڭداعى ٴار دارەجەلى استىق جانە زاتتىق ماتەريالداردى زاپاس ساقتاۋ تاراۋلارى استىق ساتاتىن بۇقارانىڭ ”ۇزاق كەزەككە تۇرۋ“ جانە دارەجەسىن ٴتۇسىرۋ، باعاسىن ارزانداتۋ، سۋ قۇرامى مەن ارالاسپا زاتتارعا كوپ اقشا تارتۋ، سونداي ـ اق استىق ساتقان اقشاسىن كەشەۋىلدەتۋ، ”اق تالون بەرۋ“ ماسەلەلەرىن ٴجىتى قاداعالاپ، استىق ساتىپ الۋدى سايكەستىرۋ مەحانيزمىن اناعۇرلىم اقاۋسىزداندىرىپ، ٴوڭىر اتتاپ، تاراۋ اتتاپ، ساتى اتتاپ، تۇلعا اتتاپ سەلبەسىپ، بىرلەسىپ قيمىلداۋدى كۇشەيتىپ، اتىز باسىنا جانە ساتىپ الۋدىڭ ٴبىرىنشى شەبىنە ىرىقتىلىقپەن بارىپ، استىق ەگەتىن ديقان، ساتىپ الۋشى كاسىپورىن، نەگىزگى ساتى تاراۋلارى سياقتى جاقتاردىڭ پىكىر ـ ۇسىنىستارىن كەڭ كولەمدە تىڭداپ، ساتىپ الۋ ساياسات ـ شارالارىن ۇزدىكسىز ساپالىلاندىرىپ، جازعى استىق ساتىپ الۋ بارىسىنداعى ٴىس جۇزىندىك ماسەلەلەردى دەر كەزىندە سايكەستىرىپ شەشەدى ەكەن.
شينجياڭ تاعى اۋىل شارۋاشىلىعىنا، كاسىپورىندارعا قىزمەت وتەۋدى ساپالىلاندىرۋ ارقىلى بيىلعى جازعى استىق ساتىپ الۋ قىزمەتىنىڭ ساپاسىن، ونىمدىلىگىن جوعارىلاتادى. جەر ـ جەر بۇقارانىڭ قولايلى، ىركىلىسسىز، جوعارى ٴونىمدى استىق ساتۋ قاجەتىنە سايكەسىپ، قىزمەت وتەۋ تاسىلىندە جاڭالىق اشىپ، قىزمەت وتەۋ شارالارىن كەمەلدەندىرىپ، قىزمەت وتەۋ ساپاسىن جوعارىلاتىپ، ىزدەنىس جاساۋ، جالپىلاستىرۋ سەرپىنىن ارتتىرىپ، APP، شاعىن باعدارلاما، الەۋمەتتىك ٴنومىر سياقتى الدىن الا كەلىسۋ تاسىلدەرىن جاڭالىق اشا قولدانىپ، ساتىپ الۋ قىزمەتىنىڭ ونىمدىلىگىن، رولىن شىنايى جوعارىلاتىپ، استىق ساتاتىن بۇقارانىڭ از شاپقىلاۋىنا، كەزەككە از تۇرۋىنا، استىقتى تەز ساتۋىنا مۇمكىندىك جاسايدى.
سونىمەن بىرگە جەر ـ جەر استىق وندىرىسىنەن كەيىنگى قىزمەت وتەۋ ورتالىعىنىڭ رولىن تولىق ساۋلەلەندىرىپ، تازالاۋ، كەپتىرۋ، جيناپ ساقتاۋ قاتارلى قىزمەت وتەۋدى دەر كەزىندە ازىرلەيدى؛ ديقانداردىڭ استىقتى عىلمي ساقتاۋىنا جەتەكشىلىك ەتىپ، ديقانداردىڭ زياندى ازايتىپ، كىرىستى ارتتىرۋىن جەبەيدى؛ الۋ ـ ساقتاۋ كاسىپورىندارىنىڭ قامبادا ساقتاۋ قۇرىلعىلارىن، شارت ـ جاعدايىن جاقسارتىپ، وزىق، قولايلى تەحنيكا جانە جابدىق قولدانىپ، قامبادا ساقتاۋ بويىنشا باسقارۋدى جۇيەلىلەندىرۋ دەڭگەيىن جوعارىلاتۋىنا جەتەكشىلىك ەتەدى.
تانىستىرۋعا قاراعاندا، بيىل جازعى استىق ساتىپ الۋ قىزمەتى باستالعاننان بەرى شينجياڭداعى ٴار دارەجەلى استىق جانە زاتتىق ماتەريالداردى زاپاس ساقتاۋ تاراۋلارى ”استىق الاتىن ادام بولۋدى، استىق ساتىپ الاتىن اقشا بولۋدى، استىق جينايتىن قامبا بولۋدى، استىق تاسيتىن كولىك بولۋدى، استىقتى گۇلدەندىرەتىن كاسىپ بولۋدى، استىقتى قامتاماسىزداندىراتىن زاڭ بولۋدى“ ارقاۋ ەتە وتىرىپ ٴتۇرلى قىزمەتتەر جونىندە جۇيەلى ورنالاستىرۋ جاساعان. بۇكىل رايون بويىنشا ساتىپ الۋعا 4 ميلليون 650 مىڭ توننا سيىمدىلىقتاعى قامبا، 11 ميلليارد 600 ميلليون يۋان ساتىپ الۋ قارجىسى دايىندالعان، بۇل ساتىپ الۋ قىزمەتىنىڭ قاجەتىن قاناعاتتاندىرا الادى. قازىر بۇكىل رايون بويىنشا جيىنى 116 مىڭ توننا ٴبيداي ساتىپ الىندى، 3 ـ دارەجەلى جانە 3 ـ دارەجەلىدەن جوعارى ٴبيدايدىڭ ٴار كيلوگرامىنىڭ ورتاشا باعاسى 2.43 يۋان بولدى.