انار بۇلت \ شينجياڭ گازەتىنىڭ ٴتىلشىسى شى شين 8 ـ ايدىڭ 5 ـ كۇنى ۇرىمجىدەن حابارلايدى. ٴتىلشىنىڭ اۆتونوميالى رايوندىق دامۋ جانە رەفورما كوميتەتىنەن ۇعىسۋىنشا، الدىڭعى جارتى جىلدا شينجياڭدا تىڭنان ارتقان جاڭا ەنەرگيا گەنەراتورلارىنىڭ سيىمدىلىعى سايكەس مەزگىلدەگىدەن %103 ارتىپ، بۇكىل ەل بويىنشا ٴبىرىنشى ورىندا تۇرعان. كەزەكتە شينجياڭ مەملەكەتتىڭ قايتا تۋىندايتىن ەنەرگيا جونىندەگى ” 14 ـ بەسجىلدىق“ جوباسىنداعى ”شينجياڭنىڭ ٴىرى تيپتى تازا ەنەرگيا بازاسىن قۇرۋعا“ قاتىستى مىندەتتەرىن كۇنى بۇرىن ورىندادى.

　　بيىل شينجياڭ پارتيا ورتالىق كوميتەتىنىڭ كومىر قىشقىل گازىنىڭ شىعارىلۋىن ەڭ جوعارى مانگە جەتكىزۋ، كومىر قىشقىل گازىن بەيتاراپتاندىرۋ سىندى كەلەلى ستراتەگيالىق شەشىمىن جانە ”ٴتورت توڭكەرىس، ٴبىر سەلبەستىك“ سىندى ەنەرگيا حاۋىپسىزدىگى جاڭا ستراتەگياسىن باتىل دايەكتىلەندىرىپ، تياناقتاندىرىپ، بايلىق ارتىقشىلىعى مەن وڭىرلىك ورىن باسىمدىعىن تياناق ەتىپ، مەملەكەت ەنەرگيا بايلىعى ستراتەگيالىق قامتاماسىزدىق بازاسىن بۇلجىماي تۇلعالادى.

　　ساناق ساندى مالىمەتىندە كورسەتىلۋىنشە، الدىڭعى جارتى جىلدا شينجياڭدا جەل ەلەكترى، فوتوۆولتتىق ەلەكتر تاراتۋ بويىنشا قۇرىلىس جۇرگىزۋ نىسانىنا قوسىلعان قارجى سايكەس مەزگىلدەگىدەن %36.9 ارتىپ، تۇراقتى مۇلىككە قوسىلعان قارجىدا ۇستاعان ارا سالماعى %15.7 بولىپ، تۇراقتى مۇلىككە قوسىلاتىن قارجىنىڭ 4.5 پايىز ارتۋىنا جەبەۋ بولدى. مۇنىڭ ىشىندە فوتوۆولتتىق ەلەكتر تاراتۋ نىسانىنا قوسىلعان قارجىنىڭ بۇكىل شينجياڭنىڭ جاڭا ەنەرگياعا قوسقان قارجىسىنداعى ۇستاعان ارا سالماعى %70تەن اسىپ، سايكەس مەزگىلدەگىدەن %36.5 ارتىپ، جاڭا ەنەرگيا كاسىپ سالاسى ورنالاسىمىنىڭ نەگىزگى تۇلعاسىنا اينالدى.

　　اۆتونوميالى رايوندىق دامۋ جانە رەفورما كوميتەتى جاڭا ەنەرگيا جانە قايتا تۋىندايتىن ەنەرگيا باسقارماسىنىڭ ورىنباسار باستىعى جىڭ زىۋىن بىلاي دەپ تانىستىردى: قازىرگە دەيىن شينجياڭدا جاڭا ەنەرگيا گەنەراتورلارىنىڭ سيىمدىلىعى 80 ميلليون كيلوۆاتتان اسىپ، ەلەكتر كوزى جالپى گەنەراتورلارى كولەمىندە ۇستاعان ارا سالماعى %50تەن استى. شينجياڭداعى 14 ايماق، وبلىس، قالانىڭ جاڭا ەنەرگيا گەناراتورلارىنىڭ سيىمدىلىعى تۇگەلدەي ميلليون كيلوۆاتتان استى، قۇمىل قالاسىندا، سانجى حۇيزۋ اۆتونوميالى وبلىسىندا 10 ميلليون كيلوۆاتتان استى. قۇمىل، جۇندۇڭ، وڭتۇستىك شينجياڭنىڭ تارىمدى اينالاتىن 10 ميلليون كيلوۆاتتىق 3 جاڭا ەنەرگيا بازاسى تۇگەلدەي سالىنىپ ٴبىتىپ، مەملەكەتتىڭ قايتا تۋىندايتىن ەنەرگيا جونىندەگى ”14 ـ بەسجىلدىق“ جوباسىنداعى ”شينجياڭدا ٴىرى تيپتى تازا ەنەرگيا بازاسىن قۇرۋعا“ قاتىستى مىندەتتەرى كۇنى بۇرىن ورىندالدى.

　　مەملەكەتتىڭ قايتا تۋىندايتىن ەنەرگيا ينفورماتسياسىن باسقارۋ ورتالىعىنىڭ ساندى مالىمەتىنە نەگىزدەلگەندە، بيىلدىڭ الدىڭعى جارتى جىلىندا شينجياڭدا تىڭنان ارتقان جاڭا ەنەرگيا گەنەراتورلار سيىمدىلىعى 14 ميلليون 80 مىڭ كيلوۆات بولىپ (جەل ەلەكترى 4 ميلليون 280 مىڭ كيلوۆات، فوتوۆولت 9 ميلليون 800 مىڭ كيلوۆات) سايكەس مەزگىلدەگىدەن %103 ارتقان؛ شينجياڭدا تىڭنان ارتقان جاڭا ەنەرگيا گەنەراتورلارى سيىمدىلىعىنىڭ بۇكىل ەلدە ۇستايتىن ارا سالماعى %10تەن اسقان.

　　جىڭ زىۋىن مىنالاردى ٴبىلدىردى: كەلەر قادامدا، پارتيا 20 ـ كەزەكتى ورتالىق كوميتەتى ٴۇشىنشى جالپى ٴماجىلىسىنىڭ رۋحىن ىشكەرىلەي دايەكتىلەندىرىپ، تياناقتاندىرىپ، جۇڭگو ۇلگىسىندەگى وسىزامانداندىرۋدىڭ شينجياڭ امالياتىن ىلگەرىلەتۋ بيىگىنەن جاڭا دامۋ ۇستانىمى ارقىلى رەفورماعا جەتەكشىلىك ەتۋگە تاباندى بولىپ، بۇكىل ەلدىڭ ەنەرگيا حاۋىپىسىزدىگىنە جانە جاسىل، تومەن كومىر قىشقىل گازدى دامۋ كەلەلى جاعدايىنا قىزمەت وتەۋدى ارقاۋ ەتىپ، رەفورمانى ونان ارى تەرەڭدەتۋ ارقىلى جاڭا ەنەرگيا كاسىپ سالاسىنىڭ اناعۇرلىم ٴادىل، اناعۇرلىم جاندى بازار ورتاسىن بەلسەنە جاراتىپ، ”ەركىنە جىبەرە دە“، ”باسقارا دا“ الاتىن بولۋعا شىنايى كەپىلدىك ەتىپ، دامۋدىڭ جاڭا قوزعاۋشى قۋاتىن، جاڭا باسىمدىعىن ۇزدىكسىز كۇشەيتىپ، جاڭا ەنەرگيا دامۋىنىڭ تىڭ ساتىعا كوتەرىلۋىن ىلگەرىلەتەمىز.

جالعانىم