جاڭا ەنەرگيالىق گەنەراتور اگراگاتتارىنىڭ سالىستىرماسى تۇڭعىش رەت تەڭ جارتىسىنان استى
انار بۇلت \ شينجياڭ گازەتىنىڭ ٴتىلشىسى چىن چياڭۋي 10 ـ ايدىڭ 27 ـ كۇنى ۇرىمجىدەن حابارلايدى. مەملەكەتتىك ەلەكتر تورى شينجياڭ ەلەكتر قۋاتى شەكتى سەرىكتەستىگىنەن ۇعىسۋىمىزشا، 10 ـ ايدىڭ 24 ـ كۇنى 110 كيلوۆولتتىق داتاڭ كۇنيۇي فوتوۆولتتىق 3 ـ ەلەكتر ستانسياسىنىڭ جەلىگە قوسىلىپ اينالىمعا تۇسۋىنە ىلەسە، شينجياڭنىڭ جاڭا ەنەرگيالىق گەنەراتور اگراگاتتارىنىڭ كولەمى 84 ميلليون 525 مىڭ كيلوۆاتقا جەتكەن، مۇنىڭ ىشىندە جەل ەلەكتر گەنەراتور اگراگاتتارى كولەمى 39 ميلليون 99 مىڭ كيلوۆات، فوتوۆولتتىق گەنەراتورلار كولەمى 45 ميلليون 426 مىڭ كيلوۆات بولعان. سونىمەن شينجياڭنىڭ جاڭا ەنەرگيالىق گەنەراتور اگراگاتتارىنىڭ كولەمى شينجياڭنىڭ تۇتاس ەنەرگيا قۇرىلىمىنداعى سالىستىرماسى تۇڭعىش رەت تەڭ جارتىسىنان اسقان.
بيىل الدىڭعى 3 ماۋسىمدا شينجياڭدا تىڭنان قوسىلعان جاڭا ەنەرگيالىق گەنەراتور اگراگاتتارىنىڭ كولەمى 19 ميلليون 985 مىڭ كيلوۆات بولدى، مۇنىڭ ىشىندە جەل ەلەكتر گەنەراتور اگراگاتتارى كولەمى 6 ميلليون 423 مىڭ كيلوۆات، كۇن ەنەرگيالى گەنەراتور اگراگاتتارى كولەمى 13 ميلليون 562 مىڭ كيلوۆات بولىپ، بيىل تىڭنان ارتقان جاڭا ەنەرگيالىق گەنەراتور اگراگاتتارىنىڭ كولەمى بۇكىل ەل بويىنشا ٴبىرىنشى ورىندى يەلەگەن.
شينجياڭ ەلىمىزدىڭ ماڭىزدى ەنەرگيا ٴوندىرىسى بازاسى رەتىندە، كۇن ەنەرگياسى مەن جەل ەنەرگياسى بايلىعىنىڭ قورى تۇگەلدەي بۇكىل ەل بويىنشا الدىڭعى قاتاردا تۇرادى. سوڭعى جىلدارى شينجياڭ جاڭا ەنەرگيا كاسىپ سالاسىن كۇش سالا دامىتىپ، ەنەرگيا قۇرىلىمىن رەتتەۋدى ۇزدىكسىز ىلگەرىلەتتى. شينجياڭ قۇمدى ٴشول، قۇبا ٴتۇز، ٴشول دالا وڭىرلەرىندە ٴىرى تيپتەگى جەل ەلەكتر، فوتوۆولت بازاسى نىسانىن قۇرۋدى جەدەلدەتىپ، قۇمىل، جۇندۇڭ، وڭتۇستىك شينجياڭ تارىمدى اينالعان 10 ميلليون كيلوۆات دارەجەلى جاڭا ەنەرگيا بازاسىن قۇردى، سالىنىپ جاتقان جاڭا ەنەرگيا نىساندارىنىڭ كولەمى 80 ميلليون كيلوۆاتتان استى. مەجەمەن 2024 ـ جىلدىڭ سوڭىنا بارعاندا شينجياڭنىڭ جاڭا ەنەرگيالىق گەنەراتور اگراگاتتارىنىڭ كولەمى 100 ميلليون كيلوۆاتتان اسادى.
جاڭا ەنەرگيا كاسىپ سالاسىنىڭ دامۋىنا بار كۇشپەن تىرەك بولۋ، قىزمەت وتەۋ ٴۇشىن، مەملەكەتتىك ەلەكتر تورى شينجياڭ ەلەكتر قۋاتى شەكتى سەرىكتەستىگى ەلەكتر تورىنىڭ وزەكتى، تىرەكتى تور جۇلگەسىن ۇزدىكسىز كەمەلدەندىرىپ، ”ىشكى جاقتى قامدايتىن بەس اينالمالى تور بولعان، سىرتقا جونەلتۋدە ٴتورت ارنا بولعان“ نەگىزگى تور جۇلگەسى ارناسىن قالىپتاستىردى. شينجياڭ ەلىمىزدەگى 750 كيلوۆولتتىق كەرنەۋ وزگەرتۋ ستانسياسىنىڭ سانى ەڭ كوپ، جەلىسى ەڭ ۇزىن، 220 كيلوۆولتتىق كەرنەۋ وزگەرتۋ ستانسياسىنىڭ قامتۋ كولەمى ەڭ كەڭ، ەلەكتر كەرنەۋى دارەجەسى پارقى ەڭ زور ولكە دارەجەلى ەلەكتر تورىنا اينالىپ، شينجياڭنىڭ شىعىس بولىگى مەن باتىس بولىگىنىڭ، وڭتۇستىك شينجياڭ مەن سولتۇستىك شينجياڭنىڭ كۇندىز ـ ٴتۇنى، ماۋسىم بويى جەل مەن جارىق جاعىندا ٴبىرىن ـ ٴبىرى تولىقتاۋىن، ەلەكتر قۋاتى جاعىندا ٴوزارا سايكەسۋىن جۇزەگە اسىرىپ، جاڭا ەنەرگيادان بارىنشا پايدالانۋدى جانە ساپالى ورنالاستىرۋدى جۇزەگە اسىردى.
قازىر مەملەكەتتىك ەلەكتر تورى شينجياڭ ەلەكتر قۋاتى شەكتى سەرىكتەستىگى مەملەكەتتىڭ 2 ـ، 3 ـ توپتاعى قۇمدى ٴشول، قۇبا ٴتۇز، ٴشول دالاداعى ٴىرى تيپتەگى جەل ەلەكتر، فوتوۆولت بازاسىن جەلىگە قوسۋ قىزمەتىن بار كۇشپەن ويداعىداي ىستەۋدە. فوتوۆولت، جەل ەلەكتر الاڭدارى مەن ستانسيالارى ىركەس ـ تىركەس سالىنىپ، جەلىگە قوسىلۋىنا بايلانىستى، شينجياڭنىڭ جاڭا ەنەرگيا گەنەراتور اگراگاتتارىنىڭ كولەمى مەن سالىستىرماسى تاعى دا تىڭ ورەگە كوتەرىلەتىن بولادى.