اشۋ رايوندارىنىڭ جوعارى ساپالى دامۋ ارناسىندا گۇلدەنىپ ـ كوركەيۋىن ىلگەرىلەتۋ كەرەك
□ شين شىجيان
11 ـ ايدىڭ 3 ـ كۇنى اشىلعان شينجياڭنىڭ اشۋ رايوندارىنىڭ جوعارى ساپالى دامۋىن ىلگەرىلەتۋ قىزمەتى ٴماجىلىسى بۇكىل شينجياڭداعى اشۋ رايوندارى مەن باقشا رايوندارىنىڭ رەفورماسىن، دامۋىن ىشكەرىلەي ىلگەرىلەتۋ قىزمەتىن جۇيەلى اقىلداستى، جوسپارلاپ ورنالاستىردى، بۇل ٴبىزدىڭ ونان ارى يدەيانى ازات ەتىپ، رەفورمانى تەرەڭدەتىپ، ٴتۇرلى اشۋ رايوندارى مەن باقشا رايوندارىنىڭ دامۋ قابىلەت دەڭگەيىن كۇش سالا جوعارىلاتىپ، بازارداعى باسەكەلىك قۋاتىن، دەربەس جاڭالىق اشۋ قۋاتىن، جەتەكشىلىك شارپۋ قۋاتىن جانە وڭىرلىك ىقپالىن ۇزدىكسىز كۇشەيتۋىمىز جونىنەن ماڭىزدى مانگە يە.
اشۋ رايونى _ ەلىمىزدىڭ رەفورما جاساۋىنداعى، ەسىك اشۋىنداعى تاجىريبە اتىزى. ەلىمىزدە تۇڭعىش توپتاعى تەڭىز جاعالاۋى ەكونوميكالىق، تەحنيكالىق اشۋ رايوندارى قۇرىلعاننان بەرى، اشۋ رايوندارى جەر ـ جەردىڭ كاسىپ سالاسى ەڭ شوعىرلانعان، ەكونوميكاسى ەڭ جاندانعان تۇعىرىنا اينالدى. باس شۋجي شي جينپيڭ تاياۋدا مەملەكەت دارەجەلى ەكونوميكالىق، تەحنيكالىق اشۋ رايونى قىزمەتى جونىندە ماڭىزدى نۇسقاۋ بەرىپ، بىلاي دەپ باسا دارىپتەدى: ”جاڭالىق اشۋ ومىرشەڭدىك كۇشى مەن ىشكى قوزعاۋشى كۇشىن ۇزدىكسىز تاسقىنداتىپ، جاڭا دامۋ ارناسىن قالىپتاستىرۋعا بەلسەنە ات سالىسىپ، جوعارى دەڭگەيدە سىرتقا ەسىك اشۋ ارقىلى تەرەڭ قاتپارلى رەفورمانى، جوعارى ساپالى دامۋدى جەبەۋ كەرەك“. باس شۋجيدىڭ ماڭىزدى نۇسقاۋى _ جاڭا ٴداۋىردىڭ جاڭا جورىعىندا اشۋ رايوندارىنىڭ قىزمەتىن ويداعىداي ىستەۋدەگى ٴتۇبىرلى بويسۇنۋ ولشەمى جانە ارەكەت باعدارناماسى.
اشۋ رايوندارى مەن باقشا رايوندارى _ شينجياڭنىڭ تۇلعالىق ەكونوميكانى زورايتۋداعى ماڭىزدى شەبى، كاسىپ سالالارى شوعىرىن جەتىلدىرۋدەگى ماڭىزدى دانەكەرى، سىرتقا ەسىك اشۋدى ىلگەرىلەتۋدەگى ماڭىزدى تۇعىرى، جوعارى ساپالى دامۋ بارىسىندا شەشۋشى رول اتقاردى. الايدا، سونىمەن بىرگە ٴبىز شينجياڭداعى ٴتۇرلى اشۋ رايوندارى مەن باقشا رايوندارىنىڭ كولەمى، قۋاتى، جوبالاپ قۇرۋ دەڭگەيى سياقتى جاقتاردا ٴالى دە كوپتەگەن پارىقتار جانە ولقىلىقتار ورىن تەۋىپ وتىرعاندىعىن تانىپ جەتۋىمىز كەرەك. رەفورمانى ونان ارى جاپپاي تەرەڭدەتىپ، جاڭالىق اشۋدىڭ ومىرشەڭ كۇشى مەن ىشكى قوزعاۋشى كۇشىن تاسقىنداتىپ، ارتىقشىلىقتى اناعۇرلىم ويداعىداي ساۋلەلەندىرىپ، ولقىلىقتاردى تولىقتاعاندا عانا، ٴبىز ٴتۇرلى اشۋ رايوندارى مەن باقشا رايوندارىنىڭ كوتەرىمدىلىك قۋاتىن، جەتەكشىلىك ەتۋ، قامتۋ قۋاتىن جانە باسەكەلىك قۋاتىن ۇزدىكسىز جوعارىلاتىپ، شينجياڭنىڭ ەرەكشەلىككە، باسىمدىققا يە وسىزاماندانعان كاسىپ سالاسى جۇيەسى قۇرىلىسىنىڭ قۋاتتى قوزعالتقىشىن جانە ماڭىزدى شەبىن كۇش سالا تۇلعالاپ، جاڭا جورىقتا جوعارى ساپالى دامۋدى ىلگەرىلەتۋگە پارمەندى تىرەك ازىرلەي الامىز.
جالپى جاعدايدى كوزدەمەگەندەر ٴبىر ٴوڭىردى دە جونگە سالا المايدى. شينجياڭنىڭ اشۋ رايونى، باقشا رايونى قىزمەتىن ويداعىداي ىستەۋدە شينجياڭعا شينجياڭ تۇرعىسىنان عانا قاراۋعا بولمايدى، سونداي ـ اق باقشا رايوندارىن باقشا رايوندارى تۇرعىسىنان عانا تالقىلاۋعا بولمايدى. ٴسوز جوق، پارتيا مەن مەملەكەت قىزمەتىنىڭ جالپى جاعدايىنا قىزمەت ەتۋدى شىعار ٴتۇيىن ەتىپ، مەملەكەتتىڭ ەنەرگيا، ستراتەگيالىق كەن ونىمدەرى بايلىعى جانە استىق حاۋىپسىزدىگىن قامتاماسىز ەتۋ ستراتەگيالىق بيىگى تۇرعىسىنان تانىپ، جوعارى دەڭگەيدە ەسىك اشۋدى كەڭەيتۋ، جاڭا دامۋ ارناسىنا قىزمەت وتەۋ جانە ونىمەن توعىسۋ سىندى ۇزاق بولاشاقتىق تۇرعىنى كوزدەي يگەرىپ، وسىزاماندانعان كاسىپ سالاسى جۇيەسىن قۇرۋدىڭ، جۇڭگو ۇلگىسىندەگى وسىزامانداندىرۋدىڭ شينجياڭ امالياتىن ىلگەرىلەتۋدىڭ رەال قاجەتىن تياناق ەتىپ ىلگەرىلەتۋ كەرەك.
ٴتۇيىندى يگەرگەندە عانا از كۇش جۇمساپ، كوپ تابىسقا كەنەلۋگە بولادى، تەتىكتى ويداعىداي يگەرگەندە عانا بارلىعىنا جەتەكشىلىك ەتۋگە بولادى. شينجياڭنىڭ اشۋ رايونى، باقشا رايونى قىزمەتىن ويداعىداي ىستەۋدە جوعارى دەڭگەيلى جوبانى ويداعىداي جاساپ، جەرگىلىكتى جاعدايعا قاراي ىستەۋگە تاباندى بولىپ، اشۋ رايوندارىنىڭ، باقشا رايوندارىنىڭ قىزمەتىن جوعارى دەڭگەيدە ىلگەرىلەتۋ كەرەك. دامۋعا جاڭالىق اشۋ ارقىلى دەم بەرۋگە تاباندى بولىپ، اشۋ رايوندارىنىڭ، باقشا رايوندارىنىڭ جوعارى ساپالى دامۋىنداعى ٴبىرىنشى قوزعاۋشى كۇشتى سومداۋ، زورايتۋ كەرەك. كاسىپ سالالارىن شوعىرلاندىرۋ، كاسىپورىنداردى كۇشەيتۋ سىندى تەتىكتى يگەرىپ، اشۋ رايوندارىنىڭ، باقشا رايوندارىنىڭ كولەمىن، قابىلەت دەڭگەيىن جانە باسەكەلىك قۋاتىن جوعارىلاتۋ كەرەك. جوعارى دەڭگەيدە ەسىك اشۋدى بەلسەنە كەڭەيتىپ، جاڭا دامۋ ارناسىنا قىزمەت وتەۋدىڭ جانە ونىمەن توعىسۋدىڭ اشىق بيىگىن تۇلعالاۋ كەرەك. باسقارۋ مەحانيزمى رەفورماسىن ٴۇرتىس تەرەڭدەتىپ، اشۋ رايوندارىنىڭ، باقشا رايوندارىنىڭ باسقارۋ، جۇمىس جۇرگىزۋ دەڭگەيىن جوعارىلاتۋ كەرەك. دامۋ مەن حاۋىپسىزدىكتى ٴبىر تۇتاس جوسپارلاپ، جوعارى ساپالى دامۋعا تاماشا ورتا جاراتۋ كەرەك.
پارتيانىڭ باسشىلىعى _ رەفورمانى ونان ارى جاپپاي تەرەڭدەتۋدىڭ، جۇڭگو ۇلگىسىندەگى وسىزامانداندىرۋدى ىلگەرىلەتۋدىڭ ٴتۇبىرلى كەپىلى. شينجياڭنىڭ اشۋ رايونى، باقشا رايونى قىزمەتىن ويداعىداي ىستەۋدە پارتيانىڭ باسشىلىعىن كۇشەيتىپ، پارتكوم ٴبىر تۇتاس جوسپارلايتىن، ۇكىمەت باستاماشى بولاتىن، تاراۋلار، ورىندار تەڭ يگەرىپ، بىرگە باسقاراتىن قىزمەت ارناسىن قالىپتاستىرۋ كەرەك. ٴار دارەجەلى پارتكومدار مەن ۇكىمەتتەر، اسىرەسە، ”ٴبىرىنشى باسشىلار“ ويداعىداي ”قۇرىلىس اترەتى باستىعى“ بولىپ، اشۋ رايونى، باقشا رايونى قىزمەتىن تۇگەلدەي وزدەرى كىرىسىپ يگەرۋى كەرەك.
شينجياڭ ەنەرگيا بايلىعى شوعىرلانۋ سياقتى كوپتەگەن وزگەشە باسىمدىققا يە، اسىرەسە، ”ٴبىر بەلدەۋ، ٴبىر جولدى“ بىرگە قۇرۋدىڭ جانە جاڭا داۋىردە باتىس بولىكتى قاۋىرت اشۋدى ىلگەرىلەتۋدىڭ ىشكەرىلەي اتقارىلۋىنا ىلەسە، شينجياڭداعى اشۋ رايوندارىنىڭ جانە باقشا رايوندارىنىڭ دامۋ بولاشاعى اناعۇرلىم جارقىن بولادى. ٴبىز سەنىمدى بەكەمدەپ، ورايدى مىقتى يگەرىپ، اشۋ رايوندارى مەن باقشا رايوندارىنىڭ جوعارى ساپالى دامۋ ارناسىندا گۇلدەنىپ ـ كوركەيۋىن ىلگەرىلەتىپ، اناعۇرلىم تاسقىنداعان تىرشىلىك تىنىسى مەن ومىرشەڭ كۇشتى ايگىلەپ، ەكونوميكانىڭ جوعارى ساپالى دامۋىنا كۇشتى قۋات ۇستەۋىمىز كەرەك.