انار بۇلت \ شينجياڭ گازەتىنىڭ ٴتىلشىسى ساۋ حۋا 2 ـ ايدىڭ 11 ـ كۇنى ۇرىمجىدەن حابارلايدى. 2025 ـ جىلعى اۆتونوميالى رايوننىڭ ورمان شارۋاشىلىعى جانە جايلىم قىزمەتى بەينە ەكران ماجىلىسىنەن ۇعىسۋىمىزشا، شينجياڭ بيىل قۇربانتۇڭعىت قۇمدى ٴشولىن كەشەندى تىزگىندەۋدى باستاپ، وڭىرلەردىڭ بىرلەسىپ ساقتانۋدى، بىرلەسىپ تىزگىندەۋدى كۇشەيتۋ ارقىلى ”ٴۇش تەرىستىك“ ينجەنەرياسىنان قامال الۋ شايقاسى مەن تاكلاماكان ٴشول جيەگى توسقاۋىل شايقاسىن ۇزدىكسىز ويداعىداي جۇرگىزەدى ەكەن.
شينجياڭ بيىل ”ٴۇش تەرىستىك“ ينجەنەرياسىنىڭ 6 ـ مەرزىمدىك جوباسىن جوسپار، ”ٴۇش ٴتىزىمدى“ (جالعاستى سالىناتىن، جاڭادان سالىناتىن، زاپاس نىساندار ٴتىزىمى)، ”ٴۇش ۋاقىت كەستەسىن“ (جالعاستى سالىناتىن نىساندار قۇرىلىسىن اياقتاتۋ كەستەسى، جاڭادان سالىناتىن نىساندار قۇرىلىسىن باستاۋ كەستەسى، زاپاس نىسانداردى كادەگە جاراتۋ كەستەسى) تۇتقا ەتىپ، عىلمي جوسپارلاپ، ٴتۇرلى قۇرىلىس دايىندىقتارىن ويداعىداي ىستەپ، ”كوكتەم كەلىسىمەن قۇرىلىس باستاۋعا“ شىنايى كەپىلدىك ەتىپ، بۇكىل رايونداعى 11 ميلليون 940 مىڭ مۋ جەردى تىزگىندەۋ مىندەتىنىڭ تياناقتانۋىن ىلگەرىلەتىپ، 6 ميلليون 39 مىڭ 400 مۋ زاپاس نىساندى اتقارۋعا كۇش سالادى.
بىلتىر تاكلاماكان ٴشول جيەگىن تورلاپ تۇتاستىرۋدى اياقتاتقاننان كەيىن، بيىل شينجياڭ نازاردى تاكلاماكان ٴشول جيەگى توسقاۋىل شايقاسىنىڭ ”ٴبىر شەڭبەر، ەكى اۋماق، ٴۇش جەلى“ سىندى نەگىزگى شايقاس مايدانىنا شوعىرلاندىرىپ، قۇمدى ٴشولدىڭ ”جيەگىنىڭ كەڭەيۋىن“ ماڭىزدى ٴتۇيىن ەتىپ، كەشەندى شارا اتقارىپ، عىلمي ساقتانىپ ـ تىزگىندەپ، جيەگىن تورلاۋ ونىمدىلىگىن بەكەمدەيدى، جوعارىلاتادى. سونىمەن بىرگە اكىمشىلىك اۋماق شەكتەمەسىن بۇزىپ، وڭىرلەردىڭ بىرلەسىپ ساقتانۋىن، بىرلەسىپ تىزگىندەۋىن كۇشەيتىپ، قۇربانتۇڭعىت قۇمدى ٴشولىن جالپىلىق تىزگىندەۋدى باستاپ، گانسۋ ولكەسىندەگى، چيڭحاي ولكەسىندەگى قۇمتاع قۇمدى شولىمەن شەكارالاسقان وڭىرلەردىڭ ەكولوگياسىن وڭاۋدى جەدەل ىلگەرىلەتىپ، حوتان ايماعى، قاشقار ايماعى، بايىنعولين موڭعۇل اۆتونوميالى وبلىسى سياقتى جەرلەردەگى بيڭتۋان مەن جەرگىلىكتى ورىننىڭ بىرلەسىپ ساقتانۋىن، بىرلەسىپ تىزگىندەۋىن ىلگەرىلەتەدى. قۇم كاسىپ سالاسىنىڭ دامۋىن جەدەلدەتىپ، بازاردى باعدار ەتىپ، اۋدان اۋماعىن بىرلىك ەتىپ، ەگىلەتىن سورتتى ۇيلەسىمدى ورنالاستىرىپ، ”كاسىپورىن + سەلبەستىك كووپەراتيۆى + شارۋالار“ سىندى مۇددەدەن ورتاق يگىلىكتەنۋ ۇلگىسىن ورناتىپ، ”ەگىمشىلىك _ وڭدەۋ _ ساتۋ“ ٴبىر تۇلعالانعان دامۋ تىزبەگىن قۇرىپ، قۇمدى ٴشولدى تىزگىندەپ، حالىقتى بايىتۋدىڭ باياندى دامۋىن جۇزەگە اسىرادى.
شينجياڭ — ەلىمىزدەگى قۇمايتتانعان، شولەيتتەنگەن جەر اۋدانى ەڭ ۇلكەن ولكە، رايون، قۇمايتتانعان جەر ٴبىر ميلليون 68 مىڭ 600 شارشى كيلومەتر بولىپ، شينجياڭ جەر اۋدانىنىڭ %64.18ىن يەلەيدى. تاياۋ جىلداردان بەرى، شينجياڭ ”ٴۇش تەرىستىك“ ىقتاسىن ورمانى، ەگىستىك جەردى ورمانعا قايتارۋ سياقتى ٴتۇيىندى ينجەنەريالاردى اتقارۋ ارقىلى قۇمدى ٴشولدىڭ الدىڭعى شەبىندەگى بوگەت بەلدەۋى، ارالىق اۋماقتاعى قۇمدى بوگەۋ بەلدەۋى، جاسىل القاپ توڭىرەگىندەگى ىقتاسىن ورمان، جاسىل القاپتىڭ ىشكى بولىگىندەگى ىقتاسىن ورمان تورى سىندى 4 دارەجەلى ىقتاسىن جۇيەسىن ورناتىپ، قۇمدى ٴوڭىردىڭ ەكولوگيالىق ورتاسىن پارمەندى جاقسارتتى.