ما شيڭرۇي، يۋان جياجۇن قيمىلعا قاتىناستى ٴارى وندىرىسكە قوسۋدى بىرگە باستادى

ەركىن تۇنياز، حۋ حىڭحۋا، جاڭ جىگاڭ ارناۋ ٴسوز سويلەدى

　　6 ـ ايدىڭ 10 ـ كۇنى شينجياڭ مەن چۇڭچيڭ ٴبىر ۋاقىتتا قيمىل وتكىزىپ، ”شينجياڭ ەلەكترىن سىرتقا جەتكىزۋ“ 3 ـ ارناسى — قۇمىل - چۇڭچيڭ ±800 كيلوۆولتتىق ەرەكشە جوعارى كەرنەۋلى تۇراقتى توك جەتكىزۋ ينجەنەرياسىنىڭ وندىرىسكە قوسىلىپ ەلەكتر جەتكىزۋىن رەسمي باستادى. سۋرەتتە: اۆتونوميالى رايوندىق پارتكومنىڭ شۋجيى ما شيڭرۇي، اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى ەركىن تۇنياز، مەملەكەت ەلەكتر تورى شەكتى سەرىكتەستىگىنىڭ باس جوراسى جاڭ جىگاڭ ۇرىمجىدە وندىرىسكە قوسىلۋىن بىرگە باستادى.

□ سۋرەتتى انار بۇلت \ شينجياڭ گازەتىنىڭ ٴتىلشىسى سۇي جىجيان تۇسىرگەن

　　انار بۇلت \ شينجياڭ گازەتىنىڭ ٴتىلشىسى ۋاڭ شيڭرۇي 6 ـ ايدىڭ 10 ـ كۇنى ۇرىمجىدەن حابارلايدى. پارتيا ورتالىق كوميتەتىنىڭ پارمەندى باسشىلىعىندا، مەملەكەتتىڭ قاتىستى مينيسترلىكتەرىنىڭ، كوميتەتتەرىنىڭ، قاتىستى ولكە، قالالاردىڭ جانە ورتالىق كاسىپورىندارىنىڭ زور كۇشپەن قولداۋىندا، 2 جىلعا تاياۋ قاجىماي ـ تالماي قۇلشىنۋ ارقىلى ”شينجياڭ ەلەكترىن سىرتقا جەتكىزۋ“ 3 ـ ارناسى — قۇمىل - چۇڭچيڭ ±800 كيلوۆولتتىق ەرەكشە جوعارى كەرنەۋلى تۇراقتى توك جەتكىزۋ ينجەنەرياسى جۋىقتا ٴساتتى سالىنىپ بولدى ٴارى سىناقتان وتكىزىلدى. 6 ـ ايدىڭ 10 ـ كۇنى تۇستەن بۇرىن شينجياڭ مەن چۇڭچيڭ ٴبىر ۋاقىتتا قيمىل وتكىزىپ، ينجەنەريانىڭ وندىرىسكە قوسىلىپ ەلەكتر جەتكىزۋىن رەسمي باستادى. اۆتونوميالى رايوندىق پارتكومنىڭ شۋجيى ما شيڭرۇي، چۇڭچيڭ قالالىق پارتكومنىڭ شۋجيى يۋان جياجۇن جەكە ـ جەكە ەكى جەردە قيمىلعا قاتىناسىپ، ينجەنەريانىڭ سالىنىپ بولعاندىعىن قىزۋ قۇتتىقتادى ٴارى وندىرىسكە قوسۋدى بىرگە باستادى.

　　اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى ەركىن تۇنياز، چۇڭچيڭ قالالىق پارتكومنىڭ ورىنباسار شۋجيى، قالا باستىعى حۋ حىڭحۋا، مەملەكەت ەلەكتر تورى شەكتى سەرىكتەستىگىنىڭ باس جوراسى جاڭ جىگاڭ وندىرىسكە قوسۋدى بىرگە باستادى ٴارى ارناۋ ٴسوز سويلەدى. مەملەكەت ەلەكتر تورى شەكتى سەرىكتەستىگىنىڭ باس ديرەكتورى پاڭ شياۋگاڭ وندىرىسكە قوسۋدى بىرگە باستادى.

　　قۇمىل - چۇڭچيڭ ±800 كيلوۆولتتىق ەرەكشە جوعارى كەرنەۋلى تۇراقتى توك جەتكىزۋ ينجەنەرياسى — جاڭا داۋىردە شينجياڭنىڭ بايلىق باسىمدىعىن كادەگە جاراتۋدى جەدەلدەتۋدەگى، مەملەكەتتىڭ ەنەرگيا حاۋىپسىزدىگىن بار كۇشپەن قامتاماسىز ەتۋدەگى، مەملەكەتتىك ەنەرگيا بايلىعى ستراتەگيالىق قامتاماسىزدىق بازاسىن بەلسەنە قۇرۋداعى كەلەلى بەلگى سيپاتتى ينجەنەريا بولىپ، شينجياڭ باركول، چۇڭچيڭ يۇيبەي سىندى ±800 كيلوۆولتتىق ەكى توك اۋىستىرۋ پۋنكتى جاڭادان سالىندى، ەلەكتر جەتكىزۋ ارالىعى 2260 كيلومەتر. مەملەكەتتىڭ تۇڭعىش توپتاعى قۇمدى ٴشول، قۇبا ٴتۇز، قۋاڭ دالا ٴىرى تۇرپاتتى جەل ەلەكترىن، فوتوۆولتتىق ەلەكتردى سىرتقا جەتكىزۋ ينجەنەرياسى رەتىندە، بۇل ينجەنەرياعا سايكەستى جەل ەلەكتر، فوتوۆولت، جارىق، جىلۋ سياقتى 10 ميلليون 200 مىڭ كيلوۆات جاڭا ەنەرگيا قوسىلعان بولىپ، جاڭا ەنەرگيا ەلەكتر مولشەرىنىڭ يەلەگەن سالىستىرماسى %70تەن اسادى. ينجەنەريا وندىرىسكە قوسىلىپ ەلەكتر جەتكىزگەننەن كەيىن، ٴار جىلى چۇڭچيڭگە 36 ميلليارد كيلوۆات ساعاتتان استام ەلەكتر جەتكىزەدى، بۇل قۇمىلدىڭ سولتۇستىگىندەگى ەنەرگيا بايلىعىن اشۋدى جانە سىرتقا جەتكىزۋدى جۇزەگە اسىرۋدا، تازا ەنەرگيانى كەڭ كولەمدە ورنالاستىرۋدى، تۇتىنۋدى جەبەۋدە، چۇڭچيڭنىڭ ەلەكترمەن قامداۋدى قامتاماسىز ەتۋ قۋاتىن جوعارىلاتۋدا، كومىر قىشقىل گازىنىڭ شىعارىلۋىن ەڭ جوعارى مانگە جەتكىزۋ، كومىر قىشقىل گازىن بەيتاراپتاندىرۋ نىساناسىن جۇزەگە اسىرۋعا دەم بەرۋدە ماڭىزدى مانگە يە.

　　ەركىن تۇنياز بىلاي دەدى: قۇمىل - چۇڭچيڭ ەرەكشە جوعارى كەرنەۋلى تۇراقتى توك جەتكىزۋ ينجەنەرياسىن سالۋ — باس شۋجي شي جينپيڭنىڭ مەملەكەتتىڭ ەنەرگيا حاۋىپسىزدىگى جونىندەگى ماڭىزدى بايىمداۋلارىن دايەكتىلەندىرۋدىڭ جاندى امالياتى. ينجەنەريانىڭ وندىرىسكە قوسىلىپ ەلەكتر جەتكىزۋى شينجياڭ ەلەكترىن سىرتقا جەتكىزۋدىڭ، شينجياڭ - چۇڭچيڭ سەلبەستىگىنىڭ تىڭ تاراۋىن اشىپ، ەكى جاقتىڭ اناعۇرلىم كەڭ سالادا، اناعۇرلىم تەرەڭ ساتىدا سەلبەستىك ورىستەتۋىنە تىڭ ٴورىس اشتى. بيىل شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىعى. ٴبىز مەملەكەتتىڭ ەنەرگيا حاۋىپسىزدىگى جاڭا ستراتەگياسىن ىشكەرىلەي دايەكتىلەندىرىپ، جاڭا دامۋ ۇستانىمى مەن جاڭا داۋىردەگى پارتيانىڭ شينجياڭدى باسقارۋ جالپى جوباسىن تولىق، دالمە ـ ٴدال، جاپپاي دايەكتىلەندىرىپ، بايلىق ارتىقشىلىعى مەن وڭىرلىك ورىن باسىمدىعىن تياناق ەتىپ، ەنەرگيا بايلىعى كاسىپ سالاسىن ۇزدىكسىز زورايتىپ، كۇشەيتىپ، مەملەكەتتىك ەنەرگيا بايلىعى ستراتەگيالىق قامتاماسىزدىق بازاسىن قۇرۋدامىز. چۇڭچيڭمەن ستراتەگيالىق ىستەستىكتى ونان ارى تەرەڭدەتىپ، سەلبەستىكتىڭ تەرەڭدىگىن، كەڭدىگىن ۇلعايتىپ، مەملەكەت ەلەكتر تورى سەرىكتەستىگىنىڭ دامۋىن بار كۇشپەن قولداپ، مەملەكەتتىڭ ٴىرى تازا ەنەرگيا بازاسىن قۇرىپ، مەملەكەتتىڭ ستراتەگيالىق جالپى جاعدايىنا قول ۇستاسا قىزمەت ەتەمىز.

　　حۋ حىڭحۋا بىلاي دەدى: قۇمىل - چۇڭچيڭ ±800 كيلوۆولتتىق ەرەكشە جوعارى كەرنەۋلى تۇراقتى توك جەتكىزۋ ينجەنەرياسىنىڭ وندىرىسكە قوسىلىپ ەلەكتر جەتكىزۋى باس شۋجي شي جينپيڭنىڭ جاڭا داۋىردە باتىس بولىكتى قاۋىرت اشۋدى ىلگەرىلەتۋ اڭگىمە ماجىلىسىندە سويلەگەن ماڭىزدى ٴسوزىنىڭ رۋحىن ىشكەرىلەي دايەكتىلەندىرىپ، ورتالىق پەن جەرگىلىكتى ورىننىڭ سەلبەستىگىن تەرەڭدەتۋدەگى چۇڭچيڭ - شينجياڭ سەلبەستىگىنىڭ بەلگى سيپاتتى جەتىستىگى بولىپ، چۇڭچيڭنىڭ ەلەكترمەن قامتاماسىز ەتۋ قۋاتىن بارىنشا جوعارىلاتىپ، باتىس بولىكتەگى وڭىرلەردىڭ ەنەرگيا بايلىعىن ورنالاستىرۋدى ساپالىلاندىرۋدا، كومىر قىشقىل گازىنىڭ شىعارىلۋىن ەڭ جوعارى مانگە جەتكىزۋ، كومىر قىشقىل گازىن بەيتاراپتاندىرۋ نىساناسىن تياناقتاندىرۋدا، وڭىرلەردىڭ سايكەستى دامۋىن جەبەۋدە ماڭىزدى مانگە يە. چۇڭچيڭ ينجەنەريانىڭ وندىرىسكە قوسىلىپ ەلەكتر جەتكىزۋىن جاڭا باستاما ەتىپ، مەملەكەت ەلەكتر تورى سەرىكتەستىگىمەن جانە شينجياڭ سياقتى باۋىرلاس ولكە، اۆتونوميالى رايون، قالالارمەن سەلبەستىكتى اناعۇرلىم كۇشەيتىپ، ”شينجياڭ ەلەكترىن چۇڭچيڭگە جەتكىزۋ“ سايكەستى ەلەكتر كوزى قۇرىلىسىن كۇش بىرىكتىرە ىلگەرىلەتىپ، جاڭا كەزەكتى ەلەكتر نىسانىن جوبالاۋدى جانە جاسىل، تومەن كومىر قىشقىل گازدى تيپ جاڭالاپ دامۋدى كۇش بىرىكتىرە ىلگەرىلەتىپ، جاڭا داۋىردە باتىس بولىكتى قاۋىرت اشۋدى ىلگەرىلەتىپ جاڭا جاعداي قالىپتاستىرۋعا اناعۇرلىم زور كۇش قوسادى.

　　جاڭ جىگاڭ بىلاي دەدى: قۇمىل - چۇڭچيڭ ەرەكشە جوعارى كەرنەۋلى تۇراقتى توك جەتكىزۋ ينجەنەرياسىنىڭ وندىرىسكە قوسىلۋى باتىس بولىكتەگى وڭىرلەردىڭ ەنەرگيا كاسىپ سالاسىنىڭ دامۋىنا ٴونىمدى جەتەكشىلىك ەتىپ، جاڭا ەنەرگيانى تۇتىنۋدى، پايدالانۋدى اناعۇرلىم كەڭ كولەمدە جەبەپ، شينجياڭنىڭ ەنەرگيا بايلىعى باسىمدىعىنىڭ ەكونوميكالىق باسىمدىققا، دامۋ باسىمدىعىنا اينالۋىنا پارمەندى تىرەك بولىپ، چىڭدۋ - چۇڭچيڭ قوس قالا ەكونوميكالىق شەڭبەرىنىڭ جوعارى ساپالى دامۋىنا قىزمەت وتەپ، چۇڭچيڭنىڭ جازدا ەلەكتردەن پايدالانۋدىڭ قاۋىرت كەزىندەگى قاجەتىن قاناعاتتاندىرىپ، ەلەكترمەن قامداۋ قۋاتىن كورنەكتى كۇشەيتەدى. سەرىكتەستىك ينجەنەريانىڭ قامداۋدى قامتاماسىز ەتۋدەگى، تيپ جاڭالاۋدى جەبەۋدەگى ماڭىزدى رولىن تولىق ساۋلەلەندىرىپ، باتىس بولىكتى قاۋىرت اشۋدىڭ جاڭا تاراۋىن قۇلشىنا جازۋعا تىڭ دا اناعۇرلىم زور ۇلەس قوسادى.

　　قيمىلدىڭ نەگىزگى ٴماجىلىس الاڭى جەكە ـ جەكە ٴۇرىمجى مەن چۇڭچيڭدە ورنالاستىرىلدى. اۆتونوميالى رايوننىڭ باسشىلارىنان چىن ۋيجۇن، قادەن كابەن، جين جىجىن، چۇڭچيڭ قالاسىنىڭ باسشىلارىنان چىن شين ـ ۋ، ليۋ شاڭجين قاتىناستى. مەملەكەت ەلەكتر تورى شەكتى سەرىكتەستىگىنىڭ ورىنباسار باس ديرەكتورى پان جيڭدۇڭ باسقاردى.

　　شينجياڭ مەن چۇڭچيڭنىڭ قاتىستى تاراۋلارى مەن جەرگىلىكتى ورىندارىنداعى، قاتىستى كاسىپورىندارداعى جاۋاپتى جولداستار، مەملەكەت ەلەكتر تورى شەكتى سەرىكتەستىگىندەگى قاتىستى جولداستار قيمىلعا قاتىناستى. باركول توك اۋىستىرۋ پۋنكتى مەن يۇيبەي توك اۋىستىرۋ پۋنكتى ٴبىر ۋاقىتتا قيمىل وتكىزدى.

جالعانىم