اۆتونوميالى رايوندىق حالىق قۇرىلتايى تۇراقتى كوميتەتى تىلشىلەر ٴماجىلىسىن وتكىزدى
جاڭادان ماقۇلدانعان 2 زاڭ ەرەجەگە قاتىستى جاعدايلاردى تانىستىردى
انار بۇلت \ شينجياڭ گازەتىنىڭ ٴتىلشىسى ليۋ شياڭ 6 ـ ايدىڭ 17 ـ كۇنى ۇرىمجىدەن حابارلايدى. 6 ـ ايدىڭ 17 ـ كۇنى اۆتونوميالى رايوندىق حالىق قۇرىلتايى تۇراقتى كوميتەتى تىلشىلەر ٴماجىلىسىن وتكىزدى، اۆتونوميالى رايوندىق حالىق قۇرىلتايى تۇراقتى كوميتەتى زاڭ ـ ٴتۇزىم قىزمەتى كوميتەتىنىڭ قاتىستى جاۋاپتىسى اۆتونوميالى رايوندىق 14 ـ كەزەكتى حالىق قۇرىلتايى تۇراقتى كوميتەتىنىڭ 21 ـ ماجىلىسىندە داۋىس بەرىپ ماقۇلدانعان «شينجياڭ ۇيعۇر اۆتونوميالى رايونىنىڭ شەكارا وتكەل ەكونوميكاسىن دامىتۋدى جەبەۋ ەرەجەسىنىڭ»، «جۇڭگو (شينجياڭ) ەركىن ساۋدا سىناق رايونى ەرەجەسىنىڭ» زاڭ شىعارۋ ارتقى كورىنىسى، زاڭ شىعارۋ بارىسى جانە باستى مازمۇنى سياقتىلاردى تانىستىردى.
«شينجياڭ ۇيعۇر اۆتونوميالى رايونىنىڭ شەكارا وتكەل ەكونوميكاسىن دامىتۋدى جەبەۋ ەرەجەسى» — ەل ىشىندەگى شەكارا وتكەل ەكونوميكاسىن دامىتۋ سالاسىنداعى تۇڭعىش جەرگىلىكتى زاڭ، جيىنى 6 تاراۋ، 43 تارماق، جالپى ەرەجە، جوبا جانە قۇرىلىس، دامۋ جانە ىلگەرىلەتۋ، قىزمەت وتەۋ جانە قامتاماسىز ەتۋ، زاڭدىق جاۋاپكەرشىلىك، قوسىمشا ەرەجە بولىپ ٴبولىندى، 7 ـ ايدىڭ 1 ـ كۇنىنەن باستاپ اتقارىلادى. «ەرەجەنىڭ» شىعارىلىپ اتقارىلۋى شينجياڭنىڭ شەكارا وتكەل ەكونوميكاسىن زاڭمەن باسقارۋ قۇرىلىسى جاعىندا نىق قادام تاستاعاندىعىنىڭ بەلگىسى بولىپ، شينجياڭنىڭ شەكارا وتكەلى ەكونوميكاسىن زور كۇشپەن دامىتۋدا، ىشكە، سىرتقا قوس باعىتتا ەسىك اشۋدى ىلگەرىلەتۋدە، سىرتقا باعىتتالعان ەكونوميكالىق جۇيە قۇرۋدا، جوعارى ساپالى دامۋدى ارتتىرۋدىڭ جاڭا ۇيەگىن تۇلعالاۋدا ماڭىزدى مانگە يە.
«جۇڭگو (شينجياڭ) ەركىن ساۋدا سىناق رايونى ەرەجەسى» 7 ـ ايدىڭ 1 ـ كۇنىنەن باستاپ اتقارىلادى، جيىنى 8 تاراۋ، 62 تارماق، ەركىن ساۋدا سىناق رايونى قۇرىلىسىنىڭ دامۋىن ارقاۋ ەتىپ، باسقارۋ ٴتۇزىلىسى، قارجى قوسۋدى اشىق ۇستاۋ جانە ساۋدانى قولايلىلاستىرۋ، ەرەكشە كاسىپ سالاسى، فينانس جونىنەن قىزمەت وتەۋ، ”ٴبىر بەلدەۋ، ٴبىر جول“ وزەكتى رايونى قۇرىلىسىنا قىزمەت وتەۋ جانە باتىسقا ەسىك اشۋ، شارۋاشىلىق ـ ساۋدا ورتاسى جانە زاڭمەن باسقارۋ ورتاسى سياقتى جاقتاردان بەلگىلەمە جاسالدى. شينجياڭ ەركىن ساۋدا سىناق رايونى قۇرىلىسىنىڭ جالپىلىق سيپاتتى، نەگىزدىك سيپاتتى زاڭ ەرەجەسى رەتىندە، «ەرەجە» ەركىن ساۋدا سىناق رايونىنىڭ الدىمەن اتقارۋىنا، الدىمەن سىناق جۇرگىزۋىنە، رەفورمادا جاڭالىق اشۋىنا ماڭىزدى زاڭمەن باسقارۋ قامتاماسىزدىعىن ازىرلەدى. «ەرەجە» اتقارىلعاننان كەيىن، مەملەكەتتىڭ ۇقىق بەرىلگەن رەفورما شارالارىن ونان ارى تۇيىلىستىرۋگە ٴتيىمدى بولىپ، ەركىن ساۋدا سىناق رايونىنىڭ باسقارۋ تۇزىلىسىنە جانە باسقارۋ تۇزىمىنە زاڭدىق قامتاماسىزدىق ازىرلەپ، ٴار دارەجەنىڭ، ٴارقايسى تاراۋلاردىڭ ەركىن ساۋدا سىناق رايونى رەفورماسىن، دامۋىن بىرگە ىلگەرىلەتەتىن بىرىككەن كۇشىن قالىپتاستىرىپ، ەڭ زور شەكتەمەدە شينجياڭ ەركىن ساۋدا سىناق رايونىنىڭ رەفورماسىن، دامۋىن قولدايدى.