چىن شياۋجياڭ باستالعاندىعىن جاريالادى، ەركىن تۇنياز، گاۋ جىڭ ارناۋ ٴسوز سويلەدى
انار بۇلت \ شينجياڭ گازەتىنىڭ ٴتىلشىسى لي ياڭ 7 ـ ايدىڭ 20 ـ كۇنى ۇرىمجىدەن حابارلايدى. جىبەك جولىندا اسقاق ٴۇن تارالىپ، تيانشان بيمەن تەربەلدى. 7 ـ ايدىڭ 20 ـ كۇنى كەشتە مادەنيەت جانە ساياحات مينيسترلىگى، مەملەكەتتىك كەڭەس اقپارات كەڭسەسى جانە اۆتونوميالى رايوندىق حالىق ۇكىمەتى بىرلەسىپ ۇيىمداستىرعان 7 ـ كەزەكتى جۇڭگو شينجياڭ حالىقارالىق ۇلتتار ٴبي فەستيۆالى شينجياڭ حالىق سارايىندا باستالدى.
اۆتونوميالى رايوندىق پارتكومنىڭ شۋجيى، بيڭتۋان پارتكومىنىڭ ٴبىرىنشى شۋجيى، ٴبىرىنشى جىڭۋي چىن شياۋجياڭ قاتىناستى ٴارى ٴبي فەستيۆالىنىڭ باستالعاندىعىن جاريالادى. اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى ەركىن تۇنياز، مادەنيەت جانە ساياحات مينيسترلىگى پارتيا باسشىلىق گرۋپپاسىنىڭ مۇشەسى، ورىنباسار مينيستر گاۋ جىڭ جەكە ـ جەكە ارناۋ ٴسوز سويلەدى. اۆتونوميالى رايوندىق پارتكومنىڭ تۇراقتى مۇشەسى، ۇگىت ٴبولىمىنىڭ باستىعى، ٴبي فەستيۆالىن ۇيىمداستىرۋ القاسىنىڭ مەڭگەرۋشىسى ۋاڭ جيانشين باسقاردى.
شينجياڭ حالىق سارايىندا الۋان شامدار جايناپ، جۇڭگولىق، شەتەلدىك سيلى قوناقتار مەن ٴار ۇلت كورەرمەندەرى ٴبىر ارادا باس قوسىپ، ٴبي سالتاناتىن بىرگە تاماشالادى.
ساعات 20دان 30 مينۋت وتكەندە ٴبي فەستيۆالىنىڭ باستالۋ سالتى باستالدى. زالدا جۇڭحۋا حالىق رەسپۋبليكاسىنىڭ مەملەكەت ٴانى ورىندالىپ، اسقاق اۋەن سارايدى جاڭعىرتتى.
ەركىن تۇنياز مىنانى ٴبىلدىردى: شي جينپيڭ جولداستى ۇيتقى ەتكەن پارتيا ورتالىق كوميتەتى شينجياڭ قىزمەتىنە ايرىقشا ٴمان بەرىپ، شينجياڭنىڭ مەملەكەتتىڭ جالپى جاعدايىنداعى ”بەس ۇلكەن ستراتەگيالىق ورنىن“ بەلگىلەپ، كورىكتى شينجياڭ قۇرۋدىڭ جوباسىن جاسادى. اۆتونوميالى رايوندىق پارتكوم شينجياڭداعى ٴار ۇلت كادرلارى مەن بۇقاراسىن ىنتىماقتاستىرىپ جانە باستاپ، جاڭا داۋىردەگى جۇڭگو كوممۋنيستىك پارتياسىنىڭ شينجياڭدى باسقارۋ جالپى جوباسىن تولىق، دالمە ـ ٴدال، جاپپاي دايەكتىلەندىرىپ، جۇڭحۋا ۇلتى ورتاق تۇلعا تانىمىن بەكەمدەۋدى نەگىزگى جەلى ەتۋگە تاباندى بولىپ، ەكونوميكانىڭ، قوعامنىڭ جوعارى ساپالى دامۋىن تىڭعىلىقتى ىلگەرىلەتتى، تيانشان الابىندا تىنىش، بەرەكەلى، ۇلتتار ىنتىماقتى، قارىشتاپ دامىعان جاڭا بەينە جارىققا شىقتى. جۇڭگو شينجياڭ حالىقارالىق ۇلتتار ٴبي فەستيۆالى 2008 ـ جىلى تۇڭعىش رەت وتكىزىلگەننەن بەرى، دۇنيە جۇزىنە اشىق، سيىسىمدى، ىنتىماقتى، ەكپىندەي ىلگەرىلەگەن جۇڭگو شينجياڭ وبرازىن ايگىلەپ، ٴار ەلدىڭ مادەنيەت ەرەكشەلىگىن ايگىلەيتىن، جۇڭگو حيكاياسىن ويداعىداي باياندايتىن تاماشا تانىسقىعا اينالىپ، ”ٴبىر بەلدەۋ، ٴبىر جولدى“ بىرگە قۇراتىن ەلدەر مەن وڭىرلەردىڭ وركەنيەتتەر اۋىس ـ كۇيىسىن، ٴوزارا ۇلگى الۋىن پارمەندى جەبەدى. بيىلعى فەستيۆال شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىعىنا تۋرا كەلىپ وتىر، ٴار ەلدەگى كوركەمونەرشى دوستاردىڭ ٴبي ارقىلى دوستاسىپ، ٴبي ارقىلى اۋىس ـ كۇيىس جاساپ، ٴبيدى دانەكەر ەتىپ، دۇنيە ٴجۇزىنىڭ شينجياڭداعى ۇلتتاردىڭ جاراسىمدى بىرگە بيگە باسقان ٴۇنىن تىڭداۋىنا، جۇڭگونىڭ توڭىرەكتەگى ەلدەرمەن مادەنيەت دانەكەرىن بىرگە ورناتۋداعى ادال نيەتىن كورۋىنە مۇمكىندىك جاساۋىن ٴۇمىت ەتەمىز.
باستالۋ سالتىنان كەيىن «الىستا، وسىندا» اتتى ٴبي ـ ولەڭ تەاترى تارتىمدى قويىلدى. بۇل تەاتر ”كەزدەسۋ“، ”اكەگە ارناۋ“، ”اناعا ارناۋ“، ”ماحاباتقا ارناۋ“، ”الىسقا ارناۋ“، ”وسى جەرگە ارناۋ“ سىندى 6 تاراۋ ارقىلى ۇيعۇر، سىبە، تاجىك سياقتى ۇلتتاردىڭ ٴبي ەلەمەنتتەرىن توعىستىرىپ، شينجياڭداعى ٴار ۇلتتىڭ بىرگە تۇرىپ، بىرگە شارۋاشىلىق قۇرعان، ەتەنە ارالاسقان جاندى كورىنىسىن ايگىلەدى.
وسى كەزەكتى ٴبي فەستيۆالىنىڭ نەگىزگى تاقىرىبى ”بيگە باسايىق“، جۇڭگو مەن شەتەلدىڭ 24 كوركەمونەر ۇيىرمەسى 52 رەت تارتىمدى كونسەرت قويادى، بۇل ٴبي تەاترى، وپەرا، بالەت، وسى زامانعى ٴبي سياقتى كوپ ٴتۇرلى كوركەمونەر فورماسىن قامتيدى. سونىمەن بىرگە ”كوركەمونەرمەن كەزدەسۋ“ شەبەرلەر ساباعى جانە ”تىنباي بيلەۋ _ تۋىندى يەسىمەن اڭگىمە“ وي ٴبولىسۋ جينالىسى، 2025 ـ جىلعى شينجياڭ جىبەك جولى كوشە ٴبيى كورمەلىك قويىلىمى، ”قىستاعىمىزدىڭ ٴبيى“ بۇقارالىق ٴبي كورمەلىك قويىلىمى، ”بيگە باسايىق“ جۇڭگو، شەتەل ٴبي سالتاناتى، ٴۇرىمجى 3 ـ كەزەكتى ”جىبەك جولىنداعى شيچۇي تەاترىنىڭ كوركەم بەينەسى تيانشاندا بوي كورسەتتى“ شيچۇي تەاترى كوركەمونەر اپتالىعى سياقتى سايكەستى قيمىلدار وتكىزىلەدى.
جۇڭگو ادەبيەت ـ كوركەمونەرشىلەر بىرلەستىگى پارتيا باسشىلىق گرۋپپاسىنىڭ مۇشەسى، ورىنباسار ٴتوراعا، شۋجيچۋىنىڭ شۋجيى شۇي يۇڭجۇن، ورتالىق پەن مەملەكەت ورگاندارىنىڭ قاتىستى مينيسترلىكتەرى مەن كوميتەتتەرىندەگى جولداستار، كامبودجانىڭ، قازاقستاننىڭ جۇڭگودا تۇراتىن قاتىستى ەلشىلەرى اشىلۋ سالتىنا قاتىناستى.
ەلزات احىمەتجان، قادەن كابەن، اۆتونوميالى رايوندىق حالىق قۇرىلتايىنىڭ، ۇكىمەتتىڭ، ساياسي كەڭەستىڭ، بيڭتۋاننىڭ قاتىستى باسشىلارى، تۋىسقان ولكە، اۆتونوميالى رايون، قالالاردىڭ ۇگىت جانە مادەنيەت، ساياحات تاراۋلارىنداعى قاتىستى جاۋاپتى جولداستار، ٴبي فەستيۆالىن ۇيىمداستىرۋ القاسىنداعى جانە وعان مۇشە ورىندارداعى، قاتىستى ورىندارداعى جاۋاپتى جولداستار، ٴار سالاداعى تاڭداۋلى ۇلگىلەر جانە كادرلاردىڭ، جۇمىسشى ـ قىزمەتكەرلەردىڭ ۋاكىلدەرى قاتارلىلار باستالۋ سالتىنا قاتىناستى.