7 ـ ايدىڭ 25 ـ كۇنى تۇستەن بۇرىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگودا تۇراتىن 16 باس ەلشى تاپسىرعان مەملەكەت حاتىن قابىلدادى. سۋرەتتە: سالت اياقتاعاننان كەيىن، شي جينپيڭ بەيجيڭ زالىندا ەلشىلەرگە ٴسوز سويلەدى.

□ سۋرەتتى شينحۋا اگەنتتىگىنىڭ ٴتىلشىسى شيە حۋانچى تۇسىرگەن

　　شينحۋا اگەنتتىگىنىڭ 7 ـ ايدىڭ 25 ـ كۇنى بەيجيڭنەن بەرگەن حابارى (تىلشىلەر شاۋ يبو، ساۋ جيايۋە). 7 ـ ايدىڭ 25 ـ كۇنى تۇستەن بۇرىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگودا تۇراتىن 16 باس ەلشى تاپسىرعان مەملەكەت حاتىن قابىلدادى.

　　حالىق سارايىنىڭ سولتۇستىك قاقپاسىنىڭ سىرتىندا قۇرمەت قاراۋىلدارى سالتاناتتى قاتار تۇزەدى، قوناق قارسى الۋ كەرنايى تارتىلدى، ەلشىلەر ىركەس ـ تىركەس جەتىپ، تۋ قاتارىنان ٴوتىپ، اق ٴمارمار باسپالداقپەن جوعارى كوتەرىلدى.

　　«تاۋ ـ وزەن نەتكەن كورىكتى» اتتى الىپ قابىرعا سۋرەت الدىندا شي جينپيڭ ەلشىلەر تاپسىرعان مەملەكەت حاتىن جەكە ـ جەكە قابىلدادى، سونداي ـ اق ولارمەن ٴبىر ـ بىردەن سۋرەتكە ٴتۇستى.

　　ولار مىنالار: ۆيەتنامنىڭ جۇڭگودا تۇراتىن باس ەلشىسى فان چيڭپيڭ، پانامانىڭ جۇڭگودا تۇراتىن باس ەلشىسى لەي ميڭ، دومينيكانىڭ جۇڭگودا تۇراتىن باس ەلشىسى گومىز، البانيانىڭ جۇڭگودا تۇراتىن باس ەلشىسى بودا، جاڭا زەلانديانىڭ جۇڭگودا تۇراتىن باس ەلشىسى چياۋ ۋىنبو، پاپۋا ـ جاڭا گۆينەياسىنىڭ جۇڭگودا تۇراتىن باس ەلشىسى كامباني، انگولانىڭ جۇڭگودا تۇراتىن باس ەلشىسى اللىن، ەگيپەتتىڭ جۇڭگودا تۇراتىن باس ەلشىسى نازمى، نيكاراگۋانىڭ جۇڭگودا تۇراتىن باس ەلشىسى كۇڭ لىران، يراننىڭ جۇڭگودا تۇراتىن باس ەلشىسى فازلى، چيليدىڭ جۇڭگودا تۇراتىن باس ەلشىسى ارييالان، ۋكراينانىڭ جۇڭگودا تۇراتىن باس ەلشىسى نەچيتايلو، بەنيننىڭ جۇڭگودا تۇراتىن باس ەلشىسى اجابا، امەريكانىڭ جۇڭگودا تۇراتىن باس ەلشىسى پاڭ دىۋي، يزرايلدىڭ جۇڭگودا تۇراتىن باس ەلشىسى بي يىلي، وڭتۇستىك سۋداننىڭ جۇڭگودا تۇراتىن باس ەلشىسى موريس. شي جينپيڭ تاعى شاڭحاي سەلبەستىك ۇيىمىنىڭ باس حاتشىسى ەرمەكبايەۆتى قابىلدادى.

　　سالت اياقتاعاننان كەيىن، شي جينپيڭ بەيجيڭ زالىندا ەلشىلەرگە ٴسوز سويلەدى.

　　شي جينپيڭ ەلشىلەردىڭ جۇڭگوعا جاڭا مىندەت وتەۋگە كەلگەندىكتەرىن قارسى الىپ، ولارعا ٴوز ەلدەرىنىڭ باسشىلارى مەن حالقىنا تاماشا تىلەگىن جەتكىزۋدى تاپسىردى، ەلشىلەردىڭ جۇڭگونى جان ـ جاقتى، ىشكەرىلەي ٴتۇسىنىپ، جۇڭگومەن ٴار ەلدىڭ دوستىعىن تەرەڭدەتۋگە، جۇڭگونىڭ دۇنيە جۇزىمەن بارىس ـ كەلىسىن نىعايتۋعا بەلسەندى ۇلەس قوسۋىن ٴۇمىت ەتتى.

　　شي جينپيڭ بىلاي دەپ اتاپ كورسەتتى: جۇڭگو قاي ـ قاشان دا دۇنيە جۇزىندەگى ٴار ەل حالقىمەن دوستىق سۇيىسپەنشىلىگىن قاستەرلەپ، ٴوزارا قۇرمەت ەتۋ، تەڭ تۇرعىدا مامىلە جاساۋ، ٴوزارا پايدا جەتكىزىپ تەڭ يگىلىككە كەنەلۋ نەگىزىندە ٴار ەلمەن جان ـ جاقتى سەلبەستىك ورىستەتىپ، ٴار سالاداعى اۋىس ـ كۇيىستى كۇشەيتۋدى قالايدى. كوز الدا جۇڭگو جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋدە، ەكونوميكا ۇزدىكسىز ورنىقتىلىق بارىسىندا جاقسارۋدا. جۇڭگو جوعارى دەڭگەيدە سىرتقا ەسىك اشۋدى كەڭەيتىپ، اسا ٴىرى كولەمدى بازار پايداسىن جارىققا شىعارىپ، جۇڭگونىڭ جاڭا دامۋىن ٴار ەلدىڭ جاڭا ورايىنا اينالدىرىپ، دۇنيە ٴجۇزى ەكونوميكاسىنىڭ ارتۋىنا اناعۇرلىم مول ايقىندىلىق ۇستەيدى.

　　شي جينپيڭ بىلاي دەپ باسا دارىپتەدى: جەدەل قۇبىلعان دۇنيە ٴجۇزىنىڭ 100 جىلدىق وزگەرىسى جانە وزگەرىس پەن بىلىقپالىق قاباتتاسقان حالىقارالىق جاعداي الدىندا، ٴار ەل بۇرىنعى ٴارقانداي كەزدەگىدەن دە اناعۇرلىم ىنتىماقتاسىپ سەلبەسۋى، دارقان پەيىل ارقىلى ارازدىقتان، قاقتىعىستان اتتاپ ٴوتۋى، ادامزاتتىڭ تاعدىرىنا كەڭ پەيىلمەن قامقور بولۋى قاجەت. بيىل — جۇڭگو حالقىنىڭ جاپون شاپقىنشىلارىنا قارسى سوعىسى جانە دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعى، سونداي ـ اق بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى. جۇڭگو ٴار ەلمەن بىرگە بىرلەسكەن مەملەكەتتەر ۇيىمىن وزەك ەتكەن حالىقارالىق جۇيە مەن حالىقارالىق زاڭدى نەگىز ەتكەن حالىقارالىق ٴتارتىپتى باتىل قورعاپ، دوستىق سەلبەستىكتى امالياتتا ايگىلەۋشى، وركەنيەتتە ٴوزارا ۇلگى الۋدى ىلگەرىلەتۋشى، ادامزاتتىڭ تاعدىرلاس ورتاق تۇلعاسىن قۇرۋشى بولىپ، وسى عالامشاردىڭ اناعۇرلىم كوركەم بولاشاعىن قول ۇستاسا بىرگە اشۋدى قالايدى.

　　ۋاڭ ي جوعارىداعى قيمىلعا قاتىناستى.

جالعانىم