انار بۇلت \ شينجياڭ گازەتىنىڭ ٴتىلشىسى ليۋ ي
بيىل الدىڭعى جارتى جىلدا شينجياڭ مەملەكەتتىك ساپالى ەگىن، مال شارۋاشىلىعى ونىمدەرىمەن ماڭىزدى قامداۋ بازاسىن تۇلعالاۋ ستراتەگيالىق ورنىن كوزدەپ، ٴتۇيىندى سالالاردى جانە شەشۋشى بۋىنداردى ٴجىتى قاداعالاپ، اۋىل شارۋاشىلىعىنىڭ قامداۋدى قامتاماسىزداندىرۋ قابىلەتىن ٴۇرتىس كۇشەيتىپ، اۋىل شارۋاشىلىعىندا قۋاتتى رايون قۇرىلىسىندا نىق قادام تاستادى.
ساناق ساندى مالىمەتىندە كورسەتىلۋىنشە، بيىل الدىڭعى جارتى جىلدا بۇكىل شينجياڭنىڭ ەگىن، ورمان، مال، بالىق شارۋاشىلىعى جالپى ٴونىم قۇنى 129 ميلليارد 575 ميلليون يۋان بولىپ، سالىستىرمالى باعا بويىنشا ەسەپتەگەندە، سايكەس مەزگىلدەگىدەن %5.6 ارتقان. اۋىل شارۋاشىلىعى ٴوندىرىسى ورنىقتى ارتۋدى جۇزەگە اسىرىپ، استىق، مال، ٴۇي قۇستارى، جەمىس ـ جيدەك، كوكونىس سياقتى بۇقارانىڭ ”كوجە قاتىق“ ونىمدەرىمەن قامتاماسىز ەتۋى پارمەندى بولىپ، ىرىقتىلىققا قول جەتكىزدى.
ٴوندىرىس قۇرىلىمىن ساپالىلاندىرىپ، استىقپەن قامداۋدى ورنىقتىردى
بيىل الدىڭعى جارتى جىلدا شينجياڭ استىق حاۋىپسىزدىگىندە پارتكوم مەن ۇكىمەت بىردەي جاۋاپكەرشىلىك ارقالاۋدى جاپپاي تياناقتاندىرىپ، استىق حاۋىپسىزدىگىنە شىنايى كەپىلدىك ەتۋ العى شارتىندا، ”جەر اۋدانىن ورنىقتىرۋ، قۇرىلىمدى ساپالىلاندىرۋ، بىرلىك ونىمنەن قامال الۋ، ٴوندىرىس قۋاتىن جوعارىلاتۋ“ قىزمەت وي جەلىسى، سونداي ـ اق ”ٴبيدايدى ورنىقتىرۋ، جۇگەرى كولەمىن كەڭەيتۋ“ جولى بويىنشا استىق ەگۋ قۇرىلىمىن ونان ارى رەتتەپ، جەمىس اعاشى مەن استىق قاتار ەگىلگەن تومەن ٴونىمدى اتىزدى ازايتۋ سياقتى شارالار ارقىلى نازاردى جوعارى ولشەمدى ەگىنجاي قۇرىلىسى مەن جۇگەرى سىندى جوعارى ٴونىمدى كۇزگى استىقتارعا شوعىرلاندىرىپ، استىق ٴوندىرىسىنىڭ ساپاعا، ونىمدىلىككە قاراي تيپ جاڭالاۋىن جۇزەگە اسىردى.
جازعى استىق جيىن ـ تەرىن مەزگىلىنە وتكەننەن كەيىن، جەر ـ جەردىڭ اۋىل شارۋاشىلىعى، اۋىل ـ قىستاق تاراۋلارى ٴبيدايدىڭ پىسۋ ۋاقىتى، توپىراقتىڭ دىمقىلدىق دارەجەسى سياقتى جاعدايلاردى جاپپاي تەكسەرىپ، ۇيلەسىمدى جيىن ـ تەرىن ۋاقىتىن بەلگىلەپ، جەرگىلىكتى ورىنداعى اۋىل شارۋاشىلىق ماشينالارى قىزمەت وتەۋ ۇيىمدارىنىڭ جۇمىس جۇرگىزۋ قابىلەتىن دالمە ـ ٴدال يگەرىپ، شارۋا وتباسىلارىنا، جەر بولىكتەرىنە قاراي ماشينا جابدىقتارى جاعىنداعى قامداۋ ـ قاجەتسىنۋ جاعدايىن ۇشتاستىرۋ قىزمەتىن ويداعىداي ىستەپ، قوعام حاۋىپسىزدىگى، قاتىناس باسقارۋ، قاتىناس ـ تاسىمال سياقتى تاراۋلارمەن بىرلەسىپ، ٴوڭىر اتتاپ جۇمىس ىستەيتىن اۋىل شارۋاشىلىق ماشينالارىن تاسىمالدايتىن اۆتوكولىكتەردى جوعارى قارقىندى تاس جولدا تەگىن قاتىناتۋ ساياساتىن تياناقتاندىرىپ، كومباينعا، مايسا وتىرعىزۋ ماشيناسىنا ٴوڭىر اتتاپ جۇمىس جۇرگىزۋ كۋالىگىن دەر كەزىندە تاراتىپ، اۋىل شارۋاشىلىق ماشينالارىن ورنالاستىرۋدىڭ ىركىلىسسىز بولۋىنا، جازعى استىقتى ٴتۇيىر ٴدان قالدىرماي قامبالاۋعا شىنايى كەپىلدىك ەتتى. جازعى جيىن ـ تەرىن كەزىندە بۇكىل رايوندا 14 مىڭ اينالاسىندا كومباين جۇمىس ىستەپ، 5000نان استام كومباين ٴوڭىر اتتاپ جۇمىس ىستەۋگە قاتىناسىپ، جازعى استىقتى قامبالاۋعا پارمەندى جابدىق قولداۋىن ازىرلەدى.
ساندى مالىمەتتە كورسەتىلۋىنشە، بيىل شينجياڭنىڭ جازعى استىق وندىرىسىندە جالپى جاقتان ”كولەمىن رەتتەپ ازايتۋ، بىرلىك ٴونىم جوعارى بولۋ، جالپى ٴونىم ٴسال ازايۋ“ جاعدايى جارىققا شىققان. جازعى استىق ەگىلگەن جەر اۋدانى 16 ميلليون 621 مىڭ مۋعا جەتىپ، %5.4 تومەندەگەن، الايدا ەگۋ كولەمى ٴالى دە بۇكىل ەل بويىنشا 8 ـ ورىندا تۇر. جازعى استىق جالپى ٴونىمى (مەجەمەن) 6 ميلليون 840 مىڭ توننا بولىپ، مەملەكەت بويىنشا 6 ـ ورىندى يەلەپ، تاريحتاعى 4 ـ جوعارى ورىندا تۇرۋداي جوعارى دەڭگەيدى ساقتاعان. بۇكىل رايون تومەن ٴونىمدى داقىل ەگىلگەن 950 مىڭ مۋ جەردى ىرىقتىلىقپەن ازايتقان جاعدايدا، ٴالى دە بۇكىل مەملەكەتتىڭ جازعى استىق جالپى ونىمىنە %4.6 ۇلەس قوسىپ، استىق ٴوندىرىسى قۇرىلىمى ورنالاسۋى ونان ارى ساپالىلانىپ، ٴوندىرىس كومەسكى كۇشى ونان ارى اشىلىپ، ”باتىس بولىك استىق قامباسى“ ستراتەگيالىق ورنى اناعۇرلىم كورنەكتىلەندى.
عىلىم ـ تەحنولوگيا تىرەگى پارمەندى بولىپ، بىرلىك ونىمدە تاعى دا تىڭ دەڭگەي جاراتىلدى
بيىل شينجياڭنىڭ كليمات شارت ـ جاعدايى جالپى جاقتان استىقتىڭ وسۋىنە ٴتيىمدى بولدى، جەر ـ جەر بىرلىك ٴونىمدى كەڭ كولەمدە جوعارىلاتۋ ارەكەتىن ىشكەرىلەي ىلگەرىلەتىپ، ٴبيدايدىڭ قاتارىن كىشىرەيتىپ، تىعىزدىعىن ارتتىرۋ، نەگىزگى ساباعىن ماساققا اينالدىرۋ سياقتى شەشۋشى تەحنولوگيالاردى جالپىلاستىرىپ، كەڭەيتىپ، استىق ساپالى تۇقىمىمەن قامتۋ سالىستىرماسى ۇزدىكسىز جوعارىلاپ، جوعارى ولشەمدى ەگىنجايدا ٴبيداي ەگۋدىڭ يەلەيتىن سالىستىرماسى ۇزدىكسىز جوعارىلاپ، ”سۋ، جەر، تۇقىم، اۋىل شارۋاشىلىعى ماشينالارى، تەحنولوگيانى“ تەرەڭدەي توعىستىرۋ ارقىلى استىقتىڭ بىرلىك ٴونىمىن جوعارىلاتۋدى جەبەۋ اۋقىمى اناعۇرلىم كورنەكتىلەندى.
عىلىم ـ تەحنولوگيانىڭ بىرلىك ٴونىمدى جوعارىلاتۋداعى جەبەۋ رولىن اناعۇرلىم ويداعىداي ساۋلەلەندىرۋ ٴۇشىن، بيىل 4 ـ ايدا اۆتونوميالى رايوندىق اۋىل شارۋاشىلىعى، اۋىل ـ قىستاق مەڭگەرمەسى، ورمان شارۋاشىلىعى جانە جايلىم مەكەمەسى 2025 ـ جىلعى اۆتونوميالى رايوننىڭ استىق، ماقتا، جەمىس ـ جيدەك، مال شارۋاشىلىعى جەتەكشى تۇقىمىن جانە نەگىزگى جالپىلاستىرۋ تەحنولوگياسىن جاريالاپ، جالپىلاستىرۋ كولەمى كەڭ، ەكولوگيالىق ۇيلەسىمدىلىگى جاقسى، ٴونىم ساپاسى بەينەلەرى ساپالى جەتەكشى تۇقىمداردى سۇرىپتاپ، ەگىمشىلىك وڭىرلەرى بويىنشا ورنالاستىرۋ جاساپ، جەر ـ جەردىڭ ساپالى تۇقىمدى جانە وزىق قولدانىلمالى تەحنولوگيالاردى جالپىلاستىرۋىنا، قولدانۋىنا جەتەكشىلىك ەتتى. مۇندا جازعى استىق نەگىزگى داقىلى سورتتى ٴبيدايعا مەڭزەس، وڭتۇستىك شينجياڭ دۇمبە ٴبيداي، سولتۇستىك شينجياڭ دۇمبە ٴبيداي، ىلە اڭعارى دۇمبە ٴبيداي، جازعى ٴبيداي ٴوڭىرى سىندى 4 ەگىمشىلىك ٴوڭىرى بويىنشا ورنالاستىرىپ، 16 جەتەكشى تۇقىمدى تۇراقتاندىردى ٴارى ۇيلەسىمدى ٴوسىرۋ تەحنولوگياسىن سايكەستىرىپ، جەر ـ جەردىڭ ٴبيداي ٴوندىرىس دەڭگەيىن جوعارىلاتىپ، جازعى استىق ٴونىمىن ورنىقتىرۋعا، ٴونىمىن ارتتىرۋعا تىرەك بولدى.
ٴار دارەجەلى اۋىل شارۋاشىلىعى، اۋىل ـ قىستاق تاراۋلارى تاعى كاسىپتىك تەحنيكتەردى ٴبىرىنشى شەپكە جىبەرىپ تەحنولوگيالىق جاقتان كوتەرمەگە الىپ بايلانىس جاساۋعا ۇيىمداستىرىپ، شەشۋشى ەگىس ۋاقىتىن، شەشۋشى فاكتوردى ٴتۇيىن ەتىپ، جەتەكشى تۇقىم، نەگىزگى جالپىلاستىرىلاتىن تەحنولوگيادان ۇلگى كورسەتۋ جانە جەتەكشىلىك ەتۋ تاربيەسىن ورىستەتىپ، اۋىل شارۋاشىلىق وندىرىسىنە قىزمەت وتەۋدىڭ، جەتەكشىلىك ەتۋدىڭ، اسىرەسە، دەرت ـ دەربەزدەن، زياندى جاندىكتەردەن ساقتانۋدىڭ جانە ونى تىزگىندەۋدىڭ ”سوڭعى ٴبىر كيلومەترىن“ تىڭعىلىقتى تياناقتاندىرۋدى ىلگەرىلەتىپ، شارۋالاردىڭ عىلمي جولمەن ەگىن ەگۋ قابىلەتىن شىنايى كۇشەيتىپ، اناعۇرلىم كوپ تاجىريبە اتىزىنداعى تەحنولوگيالىق جاڭالىق اشۋ جەتىستىكتەرىن كەڭ اتىزدا ٴونىمدى ارتتىرۋدىڭ كومەسكى كۇشىنە اينالدىردى.
ساندى مالىمەتتە كورسەتىلۋىنشە، بيىل شينجياڭدا جازعى استىقتىڭ بىرلىك ٴونىمى تاعى دا تىڭ دەڭگەي جاراتىپ، مۋ باسىندىق ٴونىمى 411.5 كيلوگرامعا جەتىپ، بىلتىرعىدان مۋ باسىنا 11.1 كيلوگرام ارتىپ، %2.8 جوعارىلاپ، ٴۇرتىس 3 جىل 10 كيلوگرامنان استام ارتىپ، بۇكىل ەلدەگى جازعى استىقتىڭ ورتاشا بىرلىك ونىمىنەن 35.9 كيلوگرام جوعارىلاپ، جازعى استىقتىڭ بىرلىك ٴونىم دەڭگەيى بۇكىل ەل بويىنشا 6 ـ ورىنعا كوتەرىلگەن؛ بىرلىك ٴونىمنىڭ ارتۋ مولشەرى، ارتۋ قارقىنى دەرلىكتەي بۇكىل ەل بويىنشا 1 ـ ورىندى يەلەگەن.
قامداۋ قابىلەتى جوعارىلاپ، ”كوجە قاتىق“ اناعۇرلىم مولايدى
بيىل الدىڭعى جارتى جىلدا شينجياڭ جازعى استىقتان مول ٴونىم الدى، جەمىس ـ جيدەك، كوكونىس، مال، ٴۇي قۇسى، سۋ ونىمدەرى سياقتى بۇقارانىڭ تۇرمىسىمەن تىعىز قاتىستى ”كوجە قاتىق“ ونىمدەرىمەن قامداۋ جەتكىلىكتى بولىپ، ٴوندىرىس قۋاتى ۇزدىكسىز ارتتى.
ساندى مالىمەتتە كورسەتىلۋىنشە، الدىڭعى جارتى جىلدا بۇكىل شينجياڭدا كوكونىس جانە ازىقتىق ساڭىراۋقۇلاقتىڭ ٴونىم مولشەرى 2 ميلليون 826 مىڭ 600 تونناعا جەتىپ، سايكەس مەزگىلدەگىدەن %6.1 ارتقان؛ جەمىس ـ جيدەك تۇرىندەگىلەردىڭ ٴونىم مولشەرى ٴبىر ميلليون 505 مىڭ 100 توننا بولىپ، سايكەس مەزگىلدەگىدەن %9.5 ارتقان؛ باۋ ـ باقشا جەمىستەرىنىڭ ٴونىم مولشەرى 837 مىڭ 500 توننا بولىپ، سايكەس مەزگىلدەگىدەن %8.1 ارتقان.
بيىل جىل باسىنان بەرى، شينجياڭ ۇزدىكسىز ”مال شارۋاشىلىعىنداعى توعىز تارماق“ ساياساتىن ساپالىلاندىرۋدى، تياناقتاندىرۋدى بەتالىس ەتىپ، سويىس قويدىڭ ٴتۇسىمىن ارتتىرۋدى، سويىس سيىردىڭ ساپاسىن جوعارىلاتۋدى جەبەدى، جەر ـ جەر ٴونىمدى شارالار قولدانىپ، جەم ـ ٴشوپ ٴوندىرىس قابىلەتىن جوعارىلاتىپ، اماناتتاپ باعۋ ـ باسقارۋدى، كاسىپتىك باعۋدى، قوعامدانعان قىزمەت وتەۋدى ٴبىر تۇلعالاندىرا دامىتۋدى ىلگەرىلەتىپ، جايلىم مال شارۋاشىلىعىنىڭ تيبىن وزگەرتىپ دارەجەسىن جوعارلاتۋدى جەدەلدەتتى.
الدىڭعى جارتى جىلدا تۇتاس شينجياڭنىڭ شوشقا، سيىر، قوي، قۇس ەتى ٴونىم مولشەرى ٴبىر ميلليون 23 مىڭ 700 توننا بولىپ، سايكەس مەزگىلدەگىدەن %2.6 ارتتى؛ ٴۇي قۇستارى جۇمىرتقاسىنىڭ ٴونىم مولشەرى 250 مىڭ 900 توننا بولىپ، سايكەس مەزگىلدەگىدەن %28.4 ارتتى. 6 ـ ايدىڭ سوڭىندا تۇتاس شينجياڭدا قولداعى شوشقا 5 ميلليون 365 مىڭ 200 بولىپ، سايكەس مەزگىلدەگىدەن %8.6 ارتتى؛ قولداعى سيىر 8 ميلليون 486 مىڭ 500 بولىپ، سايكەس مەزگىلدەگىدەن %2.6 ارتتى؛ قولداعى قوي 42 ميلليون 805 مىڭ 400 بولىپ، سايكەس مەزگىلدەگىدەن %3.6 ازايدى؛ قولداعى ٴۇي قۇسى 73 ميلليون 855 مىڭ 400 بولىپ، سايكەس مەزگىلدەگىدەن %11.5 ارتتى.
نازار اۋدارۋعا تاتيتىنى، بيىل شينجياڭ 46 ميلليون مۋدان استام بالىق باعۋعا قولايلى سۋ ايدىنىنا، اسىرەسە، اسقار تاۋلارداعى قار ـ مۇزدىڭ ەرۋىنەن قالىپتاسقان سۋىق سۋ بايلىعىنا سۇيەنىپ، سۋىق سۋ بالىعى باعىمشىلىعىن نەگىز ەتكەن وسى زامانعى بالىق شارۋاشىلىعى كاسىپ سالاسىن بار كۇشپەن دامىتتى. جەر ـ جەر اۆتونوميالى رايوننىڭ سۋىق سۋ بالىعى كاسىپ سالاسى تەحنولوگيالىق جۇيەسىنىڭ تىرەك بولۋىنا سۇيەنىپ، تۇقىم قۋالاۋ بويىنشا ساپالى تۇقىم جەتىلدىرۋ، قورەكتىك جانە جەم، باعىمشىلىق ۇلگىسى، دەرت ـ دەربەزدەن ساقتانۋ جانە ونى تىزگىندەۋ، ٴونىم ساپاسى حاۋىپسىزدىگى سياقتى سالالاردا تەحنولوگيالىق زەرتتەۋ ـ اشۋدى جانە ۇلگى كورسەتۋدى، قىزمەت وتەۋدى بەلسەنە ورىستەتىپ، بالىق شارۋاشىلىعى تەحنولوگياسىنداعى ولقىلىقتاردى جەدەل تولىقتاپ، ەكولوگيالانعان، جوعارى قۇندى ەرەكشەلىككە يە دامۋ جولىن تاپتى.
بيىل الدىڭعى جارتى جىلدا تۇتاس رايوندا سۋ ونىمدەرىنىڭ جالپى ٴونىم مولشەرى 74 مىڭ 800 تونناعا جەتىپ، سايكەس مەزگىلدەگىدەن %6.49 ارتتى. سالمون بالىعى، سايرام اق بالىعى، الاشورتان سياقتى سۋىق سۋ بالىعى مەن جەرگىلىكتى بالىق كاسىپ سالاسىنىڭ بولاشاعى ۇزدىكسىز جاقسارۋعا بەت الدى.