انار بۇلت \ شينجياڭ گازەتىنىڭ ٴتىلشىسى لي ياڭ 8 ـ ايدىڭ 13 ـ كۇنى ۇرىمجىدەن حابارلايدى. 8 ـ ايدىڭ 13 ـ كۇنى تۇستەن كەيىن اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى ەركىن تۇنياز ۇرىمجىدە پاكيستاننىڭ گيلگيت ـ بالتيستان رايونىنىڭ باس مينيسترى حاجي گۇربورحانمەن جانە ونىڭ ساپارلاستارىمەن كەزدەستى.
ەركىن تۇنياز بىلاي دەدى: جۇڭگو مەن پاكيستان تاۋ ـ وزەنى تۇتاسقان، ٴبىر ـ بىرىنە سەنىم ارتاتىن، ٴوزارا قارايلاساتىن جاقسى سەرىك، تار جول، تايعاق كەشۋلەردى بىرگە وتكەرگەن جاقسى باۋىرلاس. تاياۋ جىلداردان بەرى، جۇڭگو شينجياڭى جاڭا داۋىردەگى جۇڭگو كوممۋنيستىك پارتياسىنىڭ شينجياڭدى باسقارۋ جالپى جوباسىن تولىق، دالمە ـ ٴدال، جاپپاي دايەكتىلەندىردى، ٴتۇرلى ىستەرى جەدەل دامىدى، ٴار ۇلت بۇقاراسىنىڭ تابىس سەزىمى، باقىت سەزىمى، حاۋىپسىزدىك سەزىمى ۇزدىكسىز جوعارىلادى. جۇڭگو شينجياڭى مەن پاكيستان جەرگىلىكتى ورىندارى ەكى ەلدىڭ مەملەكەت باسشىلارى كەلىسكەن ماڭىزدى ورتاق تانىمدى مۇقيات تياناقتاندىرىپ، جۇڭگو - پاكيستان ەكونوميكالىق ٴدالىزى قۇرىلىسىمەن بەلسەنە توعىستى، ەكى جاق ٴار سالادا ناقتى ىستەر سەلبەستىگىن ورىستەتىپ، كورنەكتى ونىمدىلىككە قول جەتكىزدى. ٴبىز گيلگيت ـ بالتيستان رايونىمەن ۇدايىلانعان بايلانىستى، اۋىس ـ كۇيىستى ونان ارى كۇشەيتىپ، جۇڭگو - پاكيستان حونچيراپ - سوست شەكارا وتكەلىنىڭ جىل بويى اشىق ۇستالۋ ورايىن مىقتى يگەرىپ، شەكارا وتكەلىندە كەدەننەن ٴوتۋ ونىمدىلىگىن جوعارىلاتۋدى قالايمىز. وقۋ ـ اعارتۋ، ەمدەۋ، دوس قالا، شەكارا اتتاعان ساياحات سياقتى سالالاردا سەلبەستىكتى تەرەڭدەتىپ، جۇڭگو مەن پاكيستاننىڭ ٴداستۇرلى دوستىعىن جالعاستىرامىز.
حاجي گۇربورحان مىنالاردى ٴبىلدىردى: پاكيستان مەن جۇڭگونىڭ دوستىعى ارىدان باستاۋ الادى، گيلگيت ـ بالتيستان رايونى مەن جۇڭگو شينجياڭى اراسىنداعى قارىم ـ قاتىناس باستان ـ اياق تاتۋ ٴارى بەرىك بولىپ كەلەدى. جۇڭگو - پاكيستان ەكونوميكالىق ٴدالىزى قۇرىلىسى ەكى جاققا تاماشا سەلبەستىك ورايىن ازىرلەدى. جۇڭگو شينجياڭىمەن اۋىل شارۋاشىلىعى، دەنساۋلىق ساقتاۋ، سالاماتتىق، ساياحات، كەن اشۋ، سۋ يگىلىگى، قاتىناس سياقتى جاقتاردا سەلبەستىكتى تەرەڭدەتۋدى ٴۇمىت ەتەمىن. جۇڭگو شينجياڭ كاسىپورىندارىنىڭ گيلگيت ـ بالتيستان رايونىنا كەلىپ قارجى قوسىپ، شارۋاشىلىعىن گۇلدەندىرۋىن قىزۋ قارسى الامىز.
چىن ۋيجۇن، جۋ ليفان، اۆتونوميالى رايوننىڭ قاتىستى تاراۋلارىنداعى جاۋاپتى جولداستار كەزدەسۋگە قاتىناستى.